༢༠༡༣ ཟླ་ ༢ ཚེས་ ༢ རེས་གཟའ་སྤེན་པ།
༄༅། །ཨ་རིའི་གཞུང་འབྲེལ་མགྲིན་ཚབ་པ་ལྕམ་སྐུ་ཝིཀ་ཊོ་རི་ཡ་ནུ་ལན་ཌེ་མཆོག་གིས་(Victoria Nuland)བོད་ནང་གི་བོད་མི་ཚོས་རང་གི་བདེ་སྡུག་གནས་སྟངས་སྤྱི་ཚོགས་དང་གཞུང་སོགས་ལ་ཞེད་སྣང་མི་དགོས་པར་ཞི་བ་དང་རང་དབང་སྒོ་ནས་ཞུ་གཏུག་བརྒྱབ་ཆོག་པ་ཞིག་བཟོ་དགོས་སྐོར་རྒྱ་ནག་གཞུང་ལ་རེ་སྐུལ་ཞུས་འདུག
དེ་ཡང་ཕྱི་ལོ་ ༢༠༡༣ ཟླ་ ༢ ཚེས་ ༡ ཉིན་ཨ་རིའི་གཞུང་འབྲེལ་མགྲིན་ཚབ་པ་ལྕམ་སྐུ་ཝིཀ་ཊོ་རི་ཡ་ནུ་ལན་ཌེ་མཆོག་གིས་གསར་འགོད་འདུ་འཛོམས་སར་གསར་འགོད་པས་བོད་ནང་ཉེ་ཆར་རྒྱ་ནག་གཞུང་ནས་བོད་མི་གཉིས་ལ་རང་ལུས་མེར་སྲེག་གི་དོན་རྐྱེན་དང་འབྲེལ་བ་ཡོད་པའི་ཉེས་མིང་འོག་ཁྲིམས་ཐག་བཅད་པའི་སྐོར་གྱི་དྲི་བར་ལན་འདེབས་གནང་དོན། ང་ཚོ་ཨ་རིའི་གཞུང་ཕྱོགས་ནས་བོད་ནང་གི་བོད་མིས་རང་ལུས་མེར་སྲེག་བཏང་དང་གཏོང་མུས་ཡིན་པའི་ཧ་ཅང་ཛ་དྲག་ཆེ་བའི་གནས་སྟངས་དེ་དག་མཚམས་འཇོག་ཡོང་རྒྱུར་མཐོང་འདོད་ཡོད་པ་མ་ཟད།
ང་ཚོས་ག་དུས་ཡིན་རུང་ཡོངས་གྲགས་དང་ཡོངས་གྲགས་མིན་པ་གཉིས་ཀྱི་ཐོག་ནས་རྒྱ་ནག་གཞུང་གི་རིམ་པ་ཁག་ལ། བོད་ནང་གི་བོད་མི་མང་དག་ཅིག་གིས་རང་ལུས་མེར་སྲེག་གཏོང་བཞིན་པའི་བློ་འཚབ་ཆེ་བའི་གནས་ཚུལ་དེ་ཚོའི་ཐོག་རྒྱ་ནག་གཞུང་ནས་བོད་མིའི་རང་དབང་ཐོབ་ཐང་དང་བོད་མིའི་ཆོས་དང་རིག་གཞུང་རྩ་བརླག་འགྲོ་བའི་ཉེན་ཁའི་རང་བཞིན་དེར་རྩ་ཁྲིམས་ཐོག་ནས་སྲུང་སྐྱོབ་གནང་རྒྱུའི་རེ་བ་ཞུ་བཞིན་ཡོད། དེ་བཞིན་ངས་ཐེངས་འདིའི་གསར་འགོད་འདུ་འཛོམས་ཐོག་ནས་ཀྱང་རེ་སྐུལ་མུ་མཐུད་ཞུ་རྒྱུར། བོད་ནང་གི་བོད་མི་ཚོས་རང་གི་བདེ་སྡུག་གནས་སྟངས་སྤྱི་ཚོགས་དང་གཞུང་སོགས་ལ་ཞེད་སྣང་མི་དགོས་པར་ཞི་བ་དང་རང་དབང་སྒོ་ནས་ཞུ་གཏུག་བརྒྱབ་ཆོག་པ་ཞིག་བཟོ་དགོས་པའི་རྒྱ་ནག་གཞུང་ལ་རེ་སྐུལ་ཞུ་རྒྱུ་ཡིན། ཞེས་གསུང་འདུག་པ་བཅས། །
