༢༠༡༣ ཟླ་ ༢ ཚེས་ ༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༢ ཚེས་ ༦ ཉིན་བཀའ་ཤག་གི་ཚོགས་ཁང་ནང་ཕྱི་དྲིལ་འགྲེམས་སྟོན་ཚན་པས་གོ་སྒྲིག་ཐོག་རྒྱ་གར་རྒྱལ་ས་ལྡི་ལིའི་དཔར་མཛོད་ཉར་ཚགས་ཁང་གི་འགན་འཛིན་སྐུ་
ཞབས་ཨར་ཡ་ (Mr. Aditya Arya,) ལགས་ཀྱིས་དཔར་མཛོད་ཉར་འཇོག་སྐོར་ལ་ཟབ་སྦྱོང་ཞིག་སྤྲད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ ༩།༣༠ ཐོག་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲིས་ཕུན་ཚོགས་ལགས་ཀྱིས་ཟབ་སྦྱོང་གི་དགོས་དམིགས་ངོ་སྤྲོད་སྙིང་བསྡུས་ཤིག་གནང་གྲུབ་མཚམས་རྒྱ་གར་རྒྱལ་ས་ལྡི་ལིའི་དཔར་རིགས་ཉར་ཚགས་ཁང་གི་འགན་འཛིན་སྐུ་ཞབས་ཨར་ཡ་ ལགས་ཀྱིས་ལོ་རྒྱུས་རང་བཞིན་ལྡན་པའི་དཔར་རྙིང་དག་བརྙན་པར་བརྒྱུད་སྟོན་བཞིན་ཟབ་སྦྱོང་བ་རྣམས་ལ་དེང་དུས་ཀྱི་འཕྲུལ་ཆས་བརྒྱུད་དཔར་རིགས་ཉར་ཚགས་ཚད་ལྡན་ཡོང་ཐབས་སྐོར་ཟབ་སྦྱོང་དབུ་འཛུགས་གནང་ཡོད།
ཐེངས་འདིའི་ཟབ་སྦྱོང་ནང་ཕྱི་དྲིལ་འགྲེམས་སྟོན་ཚན་པའི་ལས་བྱེད་ཀྱིས་གཙོས་དགའ་ལྡན་ཕོ་བྲང་ཡིག་ཚང་དང་། བོད་ཀྱི་ཟློས་གར་ཚོགས་པ། སྐུ་བཅར་ཕན་བདེ་རྣམ་རྒྱལ་གྲྭ་ཚང་། བོད་ཀྱི་སྨན་རྩིས་ཁང་། བོད་ཀྱི་དཔེ་མཛོད་ཁང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་བཅས་ཀྱི་བརྙན་པར་ཐོག་ལས་དོན་གཉེར་བཞིན་པའི་ལས་བྱེད་རྣམས་མཉམ་ཞུགས་གནང་འདུག་པ་བཅས། །
