༢༠༡༣ ཟླ་ ༢ ཚེས་ ༢༨ རེས་གཟའ་ཕུར་བུ།
༄༅། །དབྱིན་ཡུལ་གྱི་ཡི་ཤུ་ཆོས་དཔོན་ཌོཀ་ཊར་ཇོན་སན་ཌར་མོཀ་མཆོག་གིས་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་ཆོས་ཕྱོགས་ཀྱི་དབུ་ཁྲིད་ཅིག་ཡིན་པ་ངོས་འཛིན་དང་འབྲེལ་མགོན་པོ་གང་ཉིད་མཆོག་ལ་གུས་བརྩི་ཞུ་དགོས་སྐོར་དབྱིན་ཡུལ་གཞུང་ཕྱོགས་ནས་རྒྱ་ནག་གཞུང་གི་དཔོན་ཚོར་གླེང་སློང་དགོས་སྐོར་གསུངས་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། དབྱིན་ཡུལ་གྱི་གྲོས་ཚོགས་གོང་མའི་ནང་བོད་དོན་སྐོར་གླེང་སློང་གནང་སྐབས། ཌོཀ་ཊར་ཇོན་སན་ཌར་མོཀ་མཆོག་གིས་༸གོང་ས་༸སྐྱབས་མགོན་ཏཱ་ལའི་བླ༌མ་མཆོག་ནི་བོད་ཀྱི་ཆོས་ཕྱོགས་ཀྱི་དབུ་ཁྲིད་ཙམ་མ་ཟད། འཛམ་གླིང་གི་རྒྱལ་ཡོངས་ནས་ཆོས་ཕྱོགས་ཀྱི་དབུ་ཁྲིད་ཅིག་ཡིན་པར་ངོས་འཛིན་ཞུ་བཞིན་ཡོད།
དེར་བརྟེན་དབྱིན་ཡུལ་གཞུང་ཕྱོགས་ནས་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་ཆོས་ཕྱོགས་ཁོ་ནའི་དབུ་ཁྲིད་ཡིན་པ་རྒྱ་ནག་གཞུང་ནས་ངོས་འཛིན་ཐུབ་པ་ཞིག་བཟོ་དགོས་པ་མ་ཟད། རྒྱ་ནག་གཞུང་གི་དཔོན་རིགས་ཚོའི་སེམས་ནང་༸གོང་ས་ཏཱ་ལའི་བླ་མ་མཆོག་ལ་གུས་བཀུར་ཞུ་རྒྱུའི་ངེས་ཤེས་རྙེད་པ་ཞིག་བཟོ་ཐུབ་ན། དེས་བོད་རྒྱ་གཉིས་དབར་ཞི་བའི་གྲོས་མོལ་བསྐྱར་གསོ་ཐུབ་སྲིད་པ་ཞིག་ཡིན། ཞེས་སོགས་གསུང་འདུག་པ་བཅས། །
