༢༠༡༣ ཟླ་ ༢ ཚེས་ ༢༢ རེས་གཟའ་པ་སངས།
༄༅།  །ཨ་རིའི་ནང་རྟེན་གཞི་བྱས་པའི་མ་རི་ལན་ཌེ་ (University of Maryland community) གཙུག་ལག་སློབ་གཉེར་ཁང་གི་གཙོ་འཛིན་མཆོག་གིས་གསལ་བསྒྲགས་ཤིག་སྤེལ་ཡོད་པའི་ནང་འཁོད་དོན། སྤྱིར་བཏང་ང་ཚོའི་སློབ་གཉེར་ཁང་དུ་ (Anwar Sadat Lecture) ཞེས་ལོ་ལྟར་འཛམ་གླིང་འདིའི་སྟེང་གྲགས་ཅན་མི་སྣས་གསུང་བཤད་གནང་སྲོལ་ཡོད་པ་བཞིན། ཕྱི་ལོ་ ༢༠༡༣ ཟླ་ ༥ ཚེས་ ༧ ཉིན་སློབ་གྲྭ་དེའི་ (Comcast Center) ཞེས་པའི་ཚོགས་ཁང་ནང་བོད་ཀྱི་༸སྐྱབས་མགོོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཞི་བདེའི་སྐོར་བཀའ་སློབ་སྩལ་གཏན་འཁེལ་ཡོད།

བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་འདི་གར་གདན་འདྲེན་ཞུ་དགོས་དོན་ནི་ཚང་མས་ཤེས་གསལ་ལྟར། ཁོང་ནི་འཛམ་གླིང་ཞི་བདེའི་གཟེངས་རྟགས་བཞེས་མྱོང་མཁན་ཞིག་ཡིན་པ་མ་ཟད། ༸གོང་ས་ཏཱ་ལའི་བླ་མ་མཆོག་གིས་དུས་རྟག་ཏུ་དུས་རབས་ཉི་ཤུ་པ་དེ་ནི་དམག་འཁྲུག་གིས་རྐྱེན་པས་མི་མང་དག་ཅིག་གི་ཚེ་སྲོག་ཤོར་ཡོད་པར་བརྟེན་དུས་རབས་ཉེར་གཅིག་པ་འདི་བཞིན་དཀའ་ངལ་གང་ཞིག་ཡིན་རུང་གྲོས་མོལ་ལམ་ནས་སེལ་དགོས་པའི་དུས་རབས་བཟོ་དགོས་སྐོར་བཀའ་སློབ་སྩོལ་བཞིན་ཡོད།

དེ་བཞིན་ཁོང་གིས་འཛམ་གླིང་ནང་གི་ཚན་རིག་པ་གྲགས་ཅན་དང་ལྷན་བཀའ་བསྡུར་མཛད་དེ་ཆོས་དང་། ཚན་རིག ཁོར་ཡུག འབྱུང་ཁམས་སྲུང་སྐྱོབ། མཛའ་མཐུན་མཉམ་གནས་སོགས་ཀྱི་སྐོར་ལ་བཀའ་སློབ་རབ་དང་རིམ་པ་སྩལ་ཡོད།  དེར་བརྟེན་ང་ཚོའི་གཙུག་ལག་སློབ་གཉེར་ཁང་གི་ཚན་རིག་མཁས་དབང་གིས་དམིགས་བསལ་འཆར་འགོད་གནང་སྟེ་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་གཙུག་ལག་སློབ་གཉེར་ཁང་དུ་གདན་ཞུས་ལྟར་ཆིབས་སྒྱུར་གྱིས་བཀའ་སློབ་སྩལ་གཏན་འཁེལ་ཡོད། ཅེས་སོགས་བཀོད་འདུག་པ་བཅས། །