༢༠༡༣ ཟླ་ ༡ ཚེས་ ༩ རེས་གཟའ་ལྷག་པ།

༄༅། །རྒྱ་གར་ལྷོ་ཕྱོགས་བོད་མིའི་གཞིས་ཆགས་དང་ཚོགས་སྡེ་ཁག་ལ་ཨ་རིར་རྟེན་གཞི་བྱས་པའི་རྩོད་རྙོག་སྣ་ཚོགས་ལ་གདོང་ལེན་བྱེད་ཕྱོགས་ཀྱི་སློབ་སྟོན་ཚོགས་པ་དང་ལྷོ་སྤྱི་ལས་ཁུངས་ཟུང་འབྲེལ་ཐོག་རྩོད་རྙོག་འགྲིག་ཆགས་བཟོ་རྒྱུའི་ཟབ་སྦྱོང་ཞིག་གནང་འགོ་ཚུགས་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ཁྱབ་ཁོངས་ལྷོ་ཕྱོགས་གཞིས་སྤྱི་ལས་ཁུངས་དང་ཨ་རིར་རྟེན་གཞི་བྱས་པའི་(Institute for

Muti-Track Diplomacy)ཞེས་པ་གཉིས་ཟུང་འབྲེལ་ཐོག་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་ཕྱི་ལོ་ ༢༠༡༣ ཟླ་ ༡ ཚེས་ ༧ ཉིན་ནས་འགོ་འཛུགས་ཀྱིས་ཕྱི་ཚེས་ ༡༡ བར་ཉིན་གྲངས་ལྔའི་རིང་ལྷོ་ཕྱོགས་སྦེལ་ཀོབ་ལུགས་བདེ་གཞིས་ཁོངས་གཉིས་དང་མོན་གྷོ་འདོད་རྒུ་གླིང་། ཧུན་སུར་རབ་རྒྱལ་གླིང་། ཀོ་ལེ་གྷལ་དོན་ལྡན་གླིང་བཅས་ལྷོ་ཕྱོགས་བོད་མིའི་གཞིས་སྒར་ཁག་ལྔའི་ས་གནས་འགོ་འཛིན་ཁག་གཅིག་གཙོ་བོར་གྱུར་བའི་ས་གནས་འཐུས་མིའི་ཚོགས་འདུའི་ཚོགས་མི་ཁག་གཅིག མཉམ་འབྲེལ་དྲུང་ཆེ་ཁག་གཅིག དགོན་སྡེ་ཁག་གི་དགེ་འདུན་པ་ཁག་གཅིག དེ་བཞིན་ས་གནས་བརྒྱ་དཔོན་སྤྱི་མི་བཅས་ཁྱོན་མི་གྲངས་ ༢༠ སྐོར་ཞིག་ལ་རྩོད་རྙོག་འདུམ་འགྲིག་དང་འབྲེལ་བའི་ཟབ་སྦྱོང་ཞིག་གནང་འགོ་ཚུགས་འདུག
དེ་བཞིན་ཟབ་སྦྱོང་དེའི་ཐོག་(Institute for Muti-Track Diplomacy)ཞེས་པའི་ཚོགས་པ་དེའི་འགན་འཛིན་ཌོཀ་ཊར་ཨ་ལན་བྷི་རི་སི་ལགས་དང་ཚོགས་པ་དེའི་ལས་བྱེད་མཱ་རིན་ལགས་རྣམ་གཉིས་ཀྱིས་རྩོད་རྙོག་ལ་གདོང་ལེན་བྱས་ཏེ་བཟང་ཕྱོགས་ནས་རྩོད་རྙོག་འདུམ་འགྲིག་བྱེད་ཕྱོགས་དང་འབྲེལ་བའི་དོན་གནད་ཁག་ལ་ཟབ་སྦྱོང་སྤྲོད་རྒྱུ་ཡིན་འདུག་པ་བཅས། །