༢༠༡༣ ཟླ་ ༡ ཚེས་ ༢༨ རེས་གཟའ་ཟླ་བ།
༄༅། །འདི་གར་བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས་བཏང་གནས་ནང་འཁོད་དོན། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་རྒྱ་གར་བྱང་ཕྱོགས་ལས་འགུལ་ཚོགས་ཆུང་གིས་གོ་སྒྲིག་འོག་ (MP) ཨེམ་པི་མངའ་སྡེའི་རྒྱལ་ས་བྷོ་པལ་ནང་རྒྱ་གར་བོད་དོན་རྒྱབ་སྐྱོར་བ་དང་། བོད་མི་སུལ་འཚོང་བ་སོགས་མི་གྲངས་བརྒྱ་དང་ལྔ་བཅུ་ལྷག་གིས་བོད་ནང་རང་ལུས་མེར་སྲེག་གནང་བཞིན་པའི་རྒྱལ་གཅེས་དཔའ་བོ་དཔའ་མོ་ཤུལ་ལུས་ནང་མི་དང་བཅས་པར་གདུང་སེམས་མཉམ་སྐྱེ་དང་། ད་ཆར་རྒྱ་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་ཆེད་བྱང་ཆུབ་སེམས་མཆོག་སྐྱོར་བཞིན་གྲོང་ཁྱེར་ནང་མར་མེ་ཁྲོམ་སྐོར་གནང་ཡོད།།

ཕྱི་ཚེས་ ༢༦ ཉིན་གྱི་དགོང་དྲོ་ཆུ་ཚོད་ ༦ དང་ཕྱེད་ཀའི་ཐོག་ཀ་རོ་ན་བྷོ་དྷི་བྷེ་ཧར་ཞེས་པའི་ནང་པའི་དགོན་པའི་ནང་རྒྱ་གར་བོད་དོན་རྒྱབ་སྐྱོར་བ་དང་བོད་མི་སུལ་འཚོང་བ་སོགས་མི་གྲངས་ ༡༥༠ ལྷག་མཉམ་འཛོམས་ཀྱིས་མར་མེ་ཁྲོམ་སྐོར་གནང་། འདུ་འཛོམས་ཀྱི་ཐོག་མར་ས་གནས་སུལ་ཚོང་བའི་ཚོགས་གཙོ་བསོད་ནམས་རྡོ་རྗེ་ལགས་ཀྱིས་མར་མེའི་ཁྲོམ་སྐོར་བྱེད་དགོས་པའི་གནས་བབ་ངོ་སྤྲོད་གནང་བ་དང་། བྱང་ཕྱོགས་ཚོགས་ཆུང་གི་ཚོགས་གཙོ་ཟླ་བ་ཚེ་རིང་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ནས་ཚོགས་ཆུང་ཆ་བགོས་ཐོག་ཞུ་གཏུག་ལས་འགུལ་སྤེལ་བཞིན་པ་དང་། བོད་ནང་གི་ཛ་དྲག་གནས་བབ་སོགས་ངོ་སྤྲོད་གསུང་བཤད་གནང་ཡོད་འདུག དེ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་དང་། བདེན་ཚིག་སྨོན་ལམ་དབྱངས་སུ་འཐེན་ཏེ་ངག་བཅད་ཀྱིས་རྒྱལ་གཅེས་དཔའ་བོ་དཔའ་མོ་རྣམས་པར་མྱ་ངན་དྲན་གསོ་གནང་རྗེས་མར་མེ་ཁྲོམ་སྐོར་གྱི་འགོ་འཛུགས་གནང་ཡོད།

མར་མེ་ཁྲོམ་སྐོར་གྱི་མཇུག་ཏུ་རྒྱ་གར་རྒྱལ་ཡོངས་ནང་པའི་ཚོགས་གཙོ་ཅན་རྡི་ར་བྷོ་དྷི་མཆོག་གིས་ཐུགས་རྗེ་ཆེ་ཞུས་ཀྱི་གསུང་བཤད་གནང་སྟེ་ལས་འགུལ་མཇུག་སྒྲིལ་གནང་ཡོད་པ་དང་། ཞུ་གཏུག་ལས་འགུལ་ཚོགས་ཆུང་གིས་ཉིན་གཉིས་རིང་མུ་མཐུད་དཔོན་རིགས་ཁག་ལ་ཞུ་གཏུག་གི་ལས་འགུལ་སྤེལ་བཞིན་ཡོད། ཕྱི་ཚེས་ ༢༨ ཉིན་བཀའ་སྤྱི་གཉིས་ཀྱིས་གོ་སྒྲིག་གནང་བའི་རྒྱལ་ས་ལྡི་ལིའི་ལས་འགུལ་ཆེན་མོར་མཉམ་ཞུགས་ཆེད་ཕེབས་འཆར་ཡོད་འདུག་པ་བཅས།།