༢༠༡༣ ཟླ་ ༡ ཚེས་ ༡༧ རེས་གཟའ་ཕུར་བུ།
༄༅། །བཀའ་སྤྱི་གཉིས་ཀྱི་སྣེ་ཁྲིད་ཐོག་བོད་མིའི་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་སྐབས། རྒྱ་གར་གྲོས་ཚོགས་འཐུས་མི་གདན་ཞུས་ཚོགས་ཆུང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཆོག་གིས་དབུས་སྤྱི་འཐུས་རྣམ་པས་རྒྱ་གར་གྱི་དབུས་གྲོས་ཚོགས་འཐུས་མི་རྣམས་དང་མཇལ་འཕྲད་ཞུས་ཡོད།
དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་།
སྤྱི་འཐུས་ཨ་ཙརྱ་ཡེ་ཤེས་ཕུན་ཚོགས་ལགས། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས། སྤྱི་འཐུས་ཟླ་བ་ཕུན་སྐྱིད་ལགས་བཅས་ཀྱིས་རྒྱ་གར་དབུས་གཞུང་གི་བློན་ཆེན་དང་། གྲོས་ཚོགས་གོང་འོག་གི་འཐུས་མི་རྣམས་ལ་ཕྱི་ལོ་ ༢༠༡༣ ཟླ་ ༡ ཚེས་ ༡༠ ནས་འགོ་འཛུགས་ཀྱིས་བོད་ནང་གི་ཛ་དྲག་གནས་སྟངས་ཞུ་སྐུལ་དང་། རིང་མིན་བཀའ་སྤྱི་གཉིས་ཀྱི་སྣེ་ཁྲིད་འོག་བོད་མིའི་གདུང་སེམས་མཉམ་བསྐྱེད་ཀྱི་ལས་འགུལ་ཕྱི་ལོ་ ༢༠༡༣ ཟླ་ ༡ ཚེས་ ༣༠ ནས་ཟླ་ ༢ ཚེས་ ༢ བར་ཉིན་བཞིའི་རིང་ལས་འགུལ་ཐོག་ཆེད་ཕེབས་གནང་སྐྱོང་ཡོང་བའི་གདན་ཞུས་ཀྱིས་ད་བར་སྲིད་དོན་ཚོགས་པ་ཁག་ ༡༠ གི་གྲོས་ཚོགས་འཐུས་མི་ ༡༥ ལྷག་མཇལ་འཕྲད་གནང་བཞིན་པར་རྒྱ་གར་དབུས་གྲོས་ཚོགས་འཐུས་མི་རྣམས་ཀྱིས་བོད་མིའི་ཐོག་སེམས་ཁུར་དང་གདུང་སེམས་མཉམ་བསྐྱེད་ཡོད་གནས་ཀྱི་གདན་ཞུས་ལྟར་ཞལ་བཞེས་གང་མང་ཐོབ་པ་དང། ད་དུང་གྲོས་ཚོགས་འཐུས་མི་མཇལ་འཕྲལ་གནང་རྒྱུའི་ལས་རིམ་འགྲོ་མུས་ཡིན་འདུག་པ་བཅས། །
