༢༠༡༣ ཟླ་ ༡ ཚེས་ ༡༤ རེས་གཟའ་ཟླ་བ།

༄༅། །འདི་གའི་ཆེད་གཉེར་གསར་འགོད་པ་སྒྲུབ་བརྒྱུད་ཉི་མ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༡ ཚེས་ ༧ ནས་ ༡༠ བར་གནས་མཆོག་ཝ་རཱ་ཎཱ་སིར་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་གི་བཀའ་ཆོས་ལེགས་པར་མཇུག་སྒྲིལ་མཛད་རྗེས་ཕྱི་ཚེས་ ༡༢ དང་ ༡༣ ཉིན་གཉིས་རིང་ཁུལ་དེར་གནས་གཟིགས་མཛད་པ་དང་སྦྲགས། ཝར་ཎཱའི་དགེ་ལས་སློབ་ཕྲུག་རྣམས་དང། ཁུལ་དེར་རྟེན་གཞི་བྱས་པའི་བོད་དགོན་བཤད་སྒྲུབ་འདོད་རྒུ་འཁྱིལ་དུ་སེར་སྐྱ་མང་ཚོགས་ལ་བཀའ་སློབ། དེ་བཞིན་ཝར་ཎཱ་གཙུག་ལག་སློབ་ཁང་གི་ཚོགས་ཁང་དུ་ཡི་ཤུའི་བླ་ཆེན་མཆོག་དང་མཇལ་འཕྲད་ཀྱིས་བགྲོ་གླེང་སོགས་མཛད་འཕྲིན་ཁག་ཡོངས་སུ་ལེགས་གྲུབ་ཀྱིས་ཕྱི་ཚེས་ ༡༣ ཉིན་གྱི་ཕྱེད་ཡོལ་ཙམ་ནས་ལྡི་ལིར་ཆིབས་སྒྱུར་གྱི་༸ཞབས་སོར་འཁོད་བསྟུན་ལྡི་ལི་སྐུ་ཚབ་དོན་གཅོད་ཀྱིས་གཙོས་གནད་ཡོད་མི་སྣ་ཁག་གིས་གནམ་ཐང་དུ་བཅར་ཏེ་ཕེབས་བསུ་གཟབ་རྒྱས་ཞུས་ཡོད།

དེ་རྗེས་ཕྱི་ཚེས་ ༡༤ སྔ་དྲོ་ཆུ་ཚོད་ ༩ ཐོག་ལྡི་ལི་གཙུག་ལག་སློབ་ཁང་དུ་(Delhi University)ཚན་རིག་དང་བཟང་སྤྱོད་ལ་གཞི་བཅོལ་བའི་དེང་དུས་ཀྱི་ཤེས་ཡོན་ལམ་ལུགས་ (Science, Ethics and Education) སྐོར་གྱི་བརྗོད་གཞིའི་ཐོག་བགྲོ་གླེང་ལྷན་ཚོགས་སུ་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད། ལྷན་ཚོགས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། ལྡི་ལི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་མཆོག ཝར་ཎཱ་གཙུག་ལག་སློབ་གྲྭའི་ངེས་སྟོན་པ་དགེ་བཤེས་ངག་དབང་བསམ་གཏན་ལགས་ཀྱང་ལྷན་ཞུགས་གནང་ཡོད། དེ་བཞིན་ལྡི་ལི་གཙུག་ལག་སློབ་གཉེར་ཁང་གིས་ཉེ་བའི་རིག་བདག་མཆོག་དང་ངེས་སྟོན་པ་མཆོག ཨ་རིའི་ཀླད་ཁམས་རིག་པའི་མཁས་དབང་སྐུ་ཞབས་རི་ཆ་ཌི་ཌེ་ཝི་ཌི་སན་ལགས། (Richard Davidson) སྐུའི་གསུང་བསྒྱུར་དགེ་བཤེས་ཐུབ་བསྟན་སྦྱིན་པ་ལགས། ཨ་རི་བ་ལྕམ་སྐུ་ཏ་ནི་ཡ་སིང་གར་ (Tania Singer) ལགས་ཀྱིས་དབུས་ཁྱད་ལས་པ་དང་སློབ་ཕྲུག་བཅས་ཁྱོན་མི་གྲངས། ༡༠༠ བརྒལ་བ་ལྷན་འཛོམས་ཐོག་བགྲོ་གླེང་མཛད་ཡོད་པ་བཅས།།