༢༠༡༣ ཟླ་ ༡ ཚེས་ ༡༡ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་སྒྲུབ་བརྒྱུད་ཉི་མ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་འཛིན་སྐྱོང་བསྟི་གནས་ཝར་ཎཱ་བོད་དགོན་བཤད་སྒྲུབ་འདོད་རྒུ་འཁྱིལ་དུ་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དབུ་འབྱེད་དང་རབ་གནས་མཛད་ཡོད།
དེ་ཉིན་ཆུ་ཚོད་ ༢ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགོན་པའི་རྒྱལ་སྒོའི་མདུན་དུ་ཆིབས་སྒྱུར་བསྐྱངས་སྐབས་བྱང་རྩེ་ཆོས་རྗེ་རིན་པོ་ཆེ་མཆོག་གིས་མཇལ་དར་རྐྱང་འབུལ་ལམ་ཞུས་རྗེས་མཁན་ཚབ་རྣམ་པས་སྤོས་སྣེས་སྔོན་བསུས་ཏེ་གདན་འདྲེན་ཞུས་རྗེས་མགོན་པོ་གང་ཉིད་མཆོག་གིས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དབུ་འབྱེད་དང་རབ་གནས་སྩལ། དེ་ནས་འདུ་ཁང་ནང་བྱང་རྩེ་ཆོས་རྗེ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག ནང་སྲིད་བཀའ་བློན་རྒྱ་རི་སྒྲོལ་མཆོག སྤྱི་འཐུས་ཐུབ་བསྟན་ལུང་རིགས་ལགས། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་མི་རྣམ་པ། འབྲེལ་ཡོད་རྒྱ་གར་བའི་སྐུ་མགྲོན་བཅས་ལྷན་འཛོམས་ཐོག་༸གོང་ས་མཆོག་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་བྱང་རྩེ་ཆོས་རྗེ་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་རྗེས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་ཚོགས་མི་རྣམ་པར་མཇལ་ཁ་སྩལ་གྲུབ་མཚམས་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་ཞུས། དེ་རྗེས་ཚོགས་པའི་འགན་འཛིན་དགེ་བཤེས་ཕུར་བུ་བསམ་གྲུབ་ལགས་ཀྱིས་མཛད་སྒོ་དང་འབྲེལ་བའི་ལས་བསྡོམས་སྙིང་བསྡུས་ཤིག་སྙན་སྒྲོན་ཞུས་རྗེས་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་དགོན་པའི་བྱུང་རིམ་དང་འབྲེལ་བའི་ལས་དོན་ཚགས་ཚུད་སྒྲུབ་མཁན་དག་ལ་བསྔགས་བརྗོད་ཀྱིས་གསུང་བཤད་གནང་།
དེ་རྗེས་༸གོང་ས་མཆོག་གིས་ཐུགས་དགོངས་དགྱེས་བརྩེའི་བཀའ་སློབ་ལམ་སྟོན་དང་། ཁྲིམས་མཐུན་གྱི་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་མིང་བསྒྱུར་མཚན་རྟགས་དང་ཕྱག་ཐེར་བཅས་སྩལ་གྲུབ་བསྟུན་བྱང་རྩེ་ཆོས་རྗེ་རིན་པོ་ཆེ་མཆོག་གིས་ཐུགས་རྗེ་ཆེ་ཞུས་ཏེ་དབུ་འབྱེད་རབ་གནས་ཡོངས་སུ་ལེགས་པར་གྲུབ།
དེ་བཞིན་ཉིན་གུང་ཆུ་ཚོད་ ༡ ཐོག་ཝ་ཎཱའི་མཆོད་རྟེན་ཆེན་པོ་དང་སངས་རྒྱས་ཀྱི་རིང་བསྲེལ་བཞུགས་སུ་གསོལ་བའི་ཤྲི་རི་ལངྒའི་དགོན་པར་གནས་གཟིགས་ཆིབས་སྒྱུར་བསྐྱངས་ཏེ་རྟེན་མཆོག་ཐུབ་པའི་སྐུ་བརྙན་མདུན་དུ་མཆོག་གསུམ་ཤིས་བརྗོད་སོགས་གསུང་འདོན་གྱིས་ཐུགས་སྨོན་རྒྱ་ཆེ་མཛད་ཡོད་པ་བཅས། །
