༢༠༡༢ ཟླ་ ༡༢ ཚེས་ ༡༢ རེས་གཟའ་ལྷག་པ།
༅༅། །ཕྱི་ལོ་ ༢༠༡༢ ཟླ་ ༡༡ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོན་གྷོ་འདོད་རྒུ་གླིང་དུ་ས་སྐྱའི་ཆོས་སྒར་བརྩེ་ཆེན་མདོ་སྔགས་ཆོས་གླིང་དང་མཐོ་ལྡིང་པདྨ་ཚལ་དགོན། དབུས་བོད་མིའི་སློབ་གྲྭ་བཅས་སུ་གཟིགས་སྐོར་མཛད་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་༸གོང་ས་༸སྐྱབས་མགོན་ཆེན་པོ་མཆོག་བརྩེ་ཆེན་མདོ་སྔགས་ཆོས་གླིང་དུ་ཆིབས་སྒྱུར་སྐབས་མཁན་ཚབ་དགེ་བཤེས་བསོད་ནམས་ཚེ་རིང་མཆོག་དང་སློབ་དཔོན་ངག་དབང་རྒྱ་མཚོ་ལགས་ཀྱིས་དུང་རྒྱས་སྤོས་སྣེས་སྔོན་བསུས་ཏེ་འདུ་ཁང་ནང་གདན་ཞུས་རྗེས་མགོན་པོ་གང་ཉིད་མཆོག་གིས་གནས་གཟིགས་མཛད་གྲུབ་བསྟུན་ཞབས་སྟེགས་སུ་འཁོད་རྗེས་རྟེན་འབྲེལ་གྱི་གསོལ་ཇ་འབྲས་སིལ་འབུལ་ལམ་ཞུས། དེ་ནས་མཁན་ཚབ་དགེ་བཤེས་བསོད་ནམས་ཚེ་རིང་མཆོག་དང་སློབ་དཔོན། དབུ་མཛད་དགེ་བསྐོས་བཅས་ཀྱིས་མཎྜལ་རྟེན་གསུམ་འདེགས་འབུལ་རྗེས་༸གོང་ས་མཆོག་གིས་བསླབ་པ་གཉེར་སྐོར་ལ་མཁྱེན་རྟོགས་དང་འབྲེལ་དགེ་འདུན་གྲངས་ ༡༨༠ ཙམ་འདུས་ཚོགས་རྣམས་ལ་གཞུང་ཆེན་བཅུ་གསུམ་གཙོ་བོར་གྱུར་པའི་དམིགས་བསལ་ཚད་མའི་གཞུང་ལ་སྦྱངས་པ་གནང་དགོས་པའི་ལམ་སྟོན་བཀའ་སློབ་སྩལ་ཡོད།
དེ་ནས་ཆུ་ཚོད་ ༡༡ ཐོག་༸གོང་ས་མཆོག་མོན་གྷོ་འདོད་རྒུ་གླིང་དབུས་བོད་མིའི་སློབ་གྲྭར་ཆིབས་སྒྱུར་སྐབས་གྲོ་སོ་ཕྱེ་མར་དང་སློབ་ཕྲུག་གིས་རོལ་དབྱངས་ཕེབས་བསུ་ཐོག་སློབ་གྲྭའི་ཚོམས་ཆེན་དུ་གདན་ཞུས་རྗེས་འཕགས་བོད་གཉིས་ཀྱི་རྒྱལ་གླུ་ཕུལ་གྲུབ་བསྟུན་སློབ་སྤྱི་ཐར་ལམ་སྒྲོལ་མ་ལགས་ཀྱིས་སློབ་གྲྭའི་གནས་སྟངས་དོར་བསྡུས་ཤིག་སྙན་སྒྲོན་ཞུས་རྗེས་སློབ་ཕྲུག་རྣམས་ཀྱིས་ས་གཞི་སྤོས་ཞིང་ཞེས་པའི་མཎྜལ་སྐད་གསང་མཐོན་པོས་གསུང་འདོན་རྗེས་མཐོ་རིམ་དང་དམའ་རིམ་འཛིན་གྲྭའི་སློབ་ཕྲུག་ཁག་གཅིག་གིས་རིགས་ལམ་རྩོད་པ་གཟིགས་འབུལ་ཞུས་མཚམས་༸གོང་ས་མཆོག་གིས་ཐུགས་བརྩེའི་བཀའ་སློབ་ཕེབས་པའི་སྙིང་དོན་ནི། བོད་མི་རིགས་ལ་ཐུན་མོང་མ་ཡིན་པའི་རིག་གཞུང་ཕྱུག་པོ་ཡོད་པ་དང་འབྲེལ་སྐད་ཡིག་ཕུན་སུམ་ཚོགས་པ་ཞིག་ཟུར་དུཡོད་པ་དེ་སྦྱང་རྒྱུ་གལ་ཆེ་པོ་ཡིན་པ་དང་།
དེ་བཞིན་སློབ་ཕྲུག་ཚོས་མ་འོངས་པར་བོད་ཀྱི་འགན་འཁྱེར་ཐུབ་པའི་ཆེད་སློབ་སྦྱོང་ལ་འབད་བྱེད་དགོས་པའི་ལམ་སྟོན་བཀའ་སློབ་སྩལ་རྗེས་རེག་ཊར་སྐལ་བཟང་ཟླ་བ་ལགས་ཀྱིས་ཐུགས་རྗེ་ཆེ་ཞུས་ཏེ་གྲོལ། དེ་རྗེས་ཆུ་ཚོད་ ༡༢ ཐོག་༸གོང་ས་མཆོག་དཔལ་མཐོ་ལྡིང་པདྨ་ཚལ་དགོན་དུ་ཆིབས་སྒྱུར་གྱི་འདུ་ཁང་ལ་རབ་གནས་དང་གནས་གཟིགས་མཛད་གྲུབ་བསྟུན་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་ཞུས་རྗེས་དགེ་སློང་བསྟན་འཛིན་ཟླ་བ་མཆོག་གིས་དབུས་ལས་སྣེ་རྣམ་པ་མཎྜལ་རྟེན་གསུམ་འདེགས་འབུལ་ཡོད། དེ་ནས་༸གོང་ས་མཆོག་གིས་དགོན་པའི་གནས་སྟངས་མཁྱེན་རྟོགས་མཛད་པ་དང་འབྲེལ་དགེ་འདུན་བགྲེས་སོང་རྣམས་ཀྱི་སྐུ་ཁམས་འཕྲོད་བསྟེན་སྐོར་ལ་བཀའ་འདྲི་མཛད་ཡོད།
དེ་རྗེས་བློ་གསལ་གླིང་དུ་ཕྱིར་ཕེབས་ཀྱིས་ཉིན་གུང་ལྗགས་སྨིན་མཛད་མཚམས་ཕྱེད་ཡོལ་ཆུ་ཚོད་ ༡།༣༠ སྤྱི་ནོར་༸གོང་ས་༸སྐྱབས་མགོན་ཆེན་པོ་དབུ་བཞུགས་ཐོག་དགའ་ལྡན་ཁྲི་རིན་པོ་ཆེ་དང་། ཤར་བྱང་ཆོས་རྗེ་རྣམ་གཉིས། གདན་ས་ཁག་གི་མཁན་ལས་ཟུར་རྣམ་པ། གདན་ས་ཁག་གཙོ་བར་གྱུར་པའི་ཆོས་སྡེ་ཁག་ནས་ཕེབས་པའི་དགེ་འདུན་པ་ ༣༠༠༠ བརྒལ་བས་གཞུང་ཆེན་བཀའ་པོད་ལྔའི་ཐོག་ནས་རིགས་ལམ་དམ་བཅའ་གཟིགས་འབུལ་ཞུས་ཡོད་པ་བཅས།།
