༢༠༡༢ ཟླ་ ༡༢ ཚེས་ ༡ རེས་གཟའ་སྤེན་པ།
༄༅། །འདི་གར་ཕྱི་དྲིལ་བོད་ཡིག་ཚན་པའི་གསར་འགོད་པ་བསྒྲུབ་རྒྱུད་ཉི་མ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༡ ཉིན་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཤར་རྩེ་རྒྱལ་བའི་ཕོ་བྲང་ནས་གསུང་རའི་མདུན་དགའ་ལྡན་ཁྲི་རིན་པོ་ཆེ་མཆོག་དང་། མཆོག་སྤྲུལ་གླིང་རིན་པོ་ཆེའི་སྐུ་ཚབ་དགེ་བཤེས་རྣམ་རྒྱལ་དབང་ཆེན་ལགས། དགའ་ལྡན་ཤར་རྩེ་མཁན་པོ་དགེ་བཤེས་བྱང་ཆུབ་ཆོས་ལྡན་མཆོག དད་ལྡན་གསུང་ཆོས་ཀྱི་སྦྱིན་བདག་གི་འཐུས་ཚབ་བཅས་ཀྱིས་དུང་རྒྱ་སྤོས་སྣེས་མངོན་བསུས་ཏེ་ཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་ལམ་རིམ་གསོལ་འདེབས་གསུང་འདོན་གྲུབ་མཚམས་༸གོང་ས་མཆོག་གིས་བོད་ནས་ཆོས་ཞུར་བཅར་བ་རྣམས་ལ་དམིགས་བསལ་བཀའ་སློབ་ཕེབས་དོན། བོད་ནས་ཆོས་ཞུར་སླེབས་པ་ཁྱེད་རྣམས་གཟབ་གཟབ་བྱས་ཏེ་ཉན་རོགས། དཔེ་ཆ་རག་སོང་ངམ།
དེ་རིང་ཁ་སང་བོད་ནང་གནས་སྟངས་ཛ་དྲག་གི་རྐྱེན་པས་གང་ལྟར་ཆོས་ལ་སློབ་གཉེར་བྱེད་རྒྱུ་ཟེར་བ་དེ་ནི་དེ་སྔ་ཆོས་འདོན་མཁན་འགའ་ཤས་ཡོད་པ་རྣམས་རྫོགས། གསར་པ་ཡང་སློབ་གཉེར་ཡོད་པ་དེ་འདྲ་ཧ་ལམ་མཐོང་རྒྱུ་མེད་པའི་བཟོ་འདྲ་ཞིག ས་ཁུག་ལུང་ཁུག་གི་མདོ་སྟོད་སྨད་ས་ཁུལ་འགའ་ཤས་ཡོད་པ་མ་གཏོགས་གཞན་ཁག་པོ་འདུག ང་ཚོ་དེ་སྔ་བོད་ནང་ཡོད་དུས་ཀྱི་གོམས་གཤིས་དང་མཐོང་ཚུལ་ནི་ཆོས་སློབ་སྦྱོང་བྱེད་ཟེར་བ་ཕྱོགས་གཅིག་ནས་དགེ་འདུན་པའི་ལས་འགན་ཡིན་པའི་བཟོ་འདྲ་དང་།
དེའི་ནང་ཚན་ནས་མཚན་ཉིད་ཀྱི་གྲྭ་ཁག་དང་བཤད་གྲྭ་དེ་ཚོའི་ལས་འགན་ཡིན་པ་མ་གཏོགས་སྤྱི་བྱིངས་སེར་མོ་བ་ཚོས་སོ་སོའི་ནམ་རྒྱུན་གྱི་ཆོ་ག་ཕྱག་ལེན་འདྲ་བཏོན་སྡོད་རྒྱུ་དེས་འགྲིགས་པའི་བཟོ་འདྲ་ཞིག འདོན་པའི་ཚིགས་ཙམ་མ་གཏོགས་གོ་རྟོགས་གང་ཡང་མེད་པར་བཏོན་འགྲོ་གི་འདུག མི་མང་སྐྱ་བོ་ཕོ་མོ་ཚོ་སྤྱིར་བཏང་ཁ་འདོན་དགེ་སྦྱོར་བྱས་ན་ཞེ་དྲག་ཡག་པོ་རེད་མ་གཏོགས་གཞུང་ཆེན་མོ་བལྟས་ཟེར་བར་དོ་སྣང་ཁྱོན་ནས་བྱེད་ཀྱི་མི་འདུག་པས་དེ་ནི་རྗེས་ལུས་དང་ནོར་འཕྲུལ་རེད། ངོས་ཀྱི་ནམ་རྒྱུན་བོད་པ་ཙམ་དུ་མ་ཟད་ནང་ཆོས་བྱེད་མཁན་རྒྱ་རིགས་དང་ཉི་ཧོང་། ཝི་ཊི་ནམ། ཀོ་རི་ཡ། དེ་བཞིན་སྦར་མ་དང་ཤྲི་རི་ལཱངྐ་། ཐེ་ཝན་ལ་སོགས་པའི་ཆོས་གྲོགས་ཚང་མར་ང་ཚོ་ཕ་མེས་ནས་ནང་པ་ཡིན་མཁན་ཚོ་དུས་རབས་ཉི་རྩ་གཅིག་པའི་ནང་པ་བྱེད་དགོས་རེད་ཅེས་རྟག་ཏུ་འབོད་སྐུལ་བྱེད་ཀྱི་ཡོད།
དུས་རབས་ཉེར་གཅིག་པའི་ནང་པ་ཟེར་ན་གང་འདྲ་ཞིག་ལ་ཟེར། དེ་ནི་སངས་རྒྱས་པའི་ཆོས་དེ་གང་འདྲ་ཡིན་པ་ཞིག་ཤེས་པར་བྱས་ཏེ་འཛམ་གླིང་འདིའི་སྟེང་ཆོས་ལུགས་མང་པོ་ཞེ་དྲག་ཡོད། ཆོས་ལུགས་གཙོ་ཆེ་བ་ཚང་མས་བྱམས་པ་དང་བརྩེ་བ། བཟོད་པ་དེ་ཚོ་ཉམས་ལེན་བྱེད་རྒྱུའི་བསླབ་བྱ་རྒྱག་མཁན་གཅིག་པ་རེད། ཆོས་ལུགས་སོ་སོར་སྟོན་པ་རེར་དང་སྐྱབས་གནས་རེ་རེ་ཡོད་པ་གཅིག་པ་ཡིན། སངས་རྒྱས་པའི་ཆོས་ནི་དེ་དག་དང་མི་འདྲ་བ་ཞིག་ཡོད་པ་དེ་སྔོན་ལ་སངས་རྒྱས་བཅོས་ལྡན་འདས་ཀྱིས། བདག་ཉིད་བདག་གི་མགོན་ཡིན། ཞེས་གསུངས་བ་དང་སོ་སོ་རང་གི་མདུན་ལམ་དེ་རང་ཉིད་ཀྱི་བསྒྲུབ་དགོས་རྒྱུ་ཞིག་རེད་མ་གཏོགས་གཞན་སྐྱབས་འཇུག་ཞུས་ཏེ་འཇིག་རྟེན་བཀོད་པ་པོ་འདོད་པ་ནང་ལྟར་བྱས་ཏེ་གཞན་ཞིག་གི་ཕྱག་འཇུག་གནང་རྒྱུ་མེད། དཔེ་ཆ་ལྟ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད་འདུག་ཤེས་སོང་ངམ། དེ་བཞིན་ཆོས་གྲོགས་སིང་གྷ་པུར་དང་ཆེན་པོ་ཧོར་གྱི་ཡུལ་གྲུ་ཁག་ཚོ་བྱས། ཁྱེད་རང་ཚོ་ཚང་མ་སློབ་གཉེར་བྱེད་རྒྱུ་དེ་ཞེ་དྲག་གལ་ཆེན་པོ་རེད། ཅེས་བཀའ་སློབ་སྩལ་རྗེས་ཡན་ལག་བདུན་པ་གསུང་འདོན་ཟིན་མཚམས་༸གོང་ས་མཆོག་ལ་ཤར་པ་ཆོས་རྗེ་རིན་པོ་ཆེ་མཆོག་དང་བློ་གླིང་མཁན་རིན་པོ་ཆེ་རྟོགས་ལྡན་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་གྲུབ་བསྟུན་ཐེག་ཆེན་བསྟན་པའི་འཕེལ་རིམ་ངོ་སྤྲོད་དང་ཆོས་འབྲེལ་དབུ་འཛུགས་བསྐྱངས་གནང་མཛད་ཡོད་པ་བཅས།།
