༢༠༡༢ ཟླ་ ༡༢ ཚེས་ ༡ རེས་གཟའ་སྤེན་པ།
༄༅། །ཆེས་མཐོའི་ཁྲིམས་ཞིབ་ཁང་གིས་ཕྱི་ལོ་ ༢༠༡༢ ཟླ་ ༡༢ ཚེས་ ༡ ལ་ཉིན་བཏང་གནས་ནང་འཁོད་དོན། ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས་ཕྱི་ལོ་ ༢༠༡༢ ཟླ་ ༡༡ ཚེས་ ༡༦ ནས་ ༢༡ བར་བྷན་རྡ་ར་ནོར་རྒྱས་གླིང་གཞིས་ཆགས་ཀྱི་སེར་སྐྱ་མང་ཚོགས་ ༡༠༠ ཙམ་དང་། དེའི་ཁྱབ་ཁོངས་ནག་པཱུར་གྲོང་ཁྱེར་གྱི་བོད་མི་བལ་གོས་ཚོང་མཁན་ ༦༥ ཙམ་ལ་བཙན་བྱོལ་བོད་མིའི་ཁྲིམས་ལུགས་སྐོར་གོ་རྟོགས་སྤེལ་ཡོད་པ་དང་།
ཆེས་མཐོའི་ཁྲིམས་ཞིབ་ཁང་ནས་ཉེ་ལམ་རྒྱ་གར་ནང་ཡོད་གཅིག་ལྕོགས་བོད་མིའི་ས་གནས་ཁྲིམས་ཞིབ་ཁང་ཚང་མ་ཕྱིར་བསྡུ་གནང་སྟེ། ས་གནས་ཁྲིམས་ཞིབ་ཁང་ཁག་གི་ས་ཁོངས་ཁྱབ་ཚད་བསྒྱུར་བཅོས་ཀྱིས། བྷན་རྡ་ར་ནོར་རྒྱས་གླིང་ལྷོ་ཕྱོགས་ས་གནས་ཁྲིམས་ཞིབ་ཁང་གི་ཁོངས་སུ་ཟླ་བསྒྲིལ་གནང་བ་ལྟར། ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས་ཐེངས་འདིའི་ཁྲིམས་ལུགས་གོ་རྟོགས་སྤེལ་བའི་ལས་རིམ་དང་སྟབས་བསྟུན་བྷན་རྡ་ར་གཅིག་ལྕོགས་ས་གནས་ཁྲིམས་ཞིབ་ཁང་གི་ཡིག་ཆ་དང་། དངོས་ཆས་ཁག་རྩིས་སྤྲོད་རྩིས་ལེན་གནང་ཡོད།
དེ་བཞིན་དུ་བྷེལ་ཀོབ་བོད་ཁྱིམ་ནས་རེ་སྐུལ་ཞུས་དོན་ལྟར། ལྷོ་ཕྱོགས་ས་གནས་ཁྲིམས་དྲུང་བསྟན་འཛིན་ནོར་ལྡན་ལགས་ཀྱིས་ཕྱི་ཟླ་ ༡༡ ཚེས་ ༡༧ ཉིན་གྱི་ཕྱི་དྲོར་ལྷོ་ཕྱོགས་ས་གནས་ཁྲིམས་ཞིབ་ཁང་དུ་འཛིན་རིམ་བརྒྱད་པའི་སློབ་མ་ ༦༠ ལ་བཙན་བྱོལ་བོད་མིའི་ཁྲིམས་ལུགས་དབང་འཛིན་སྐོར་ངོ་སྤྲོད་འགྲེལ་བརྗོད་གནང་ཡོད་པ་བཅས།།
