ཕྱི་ལོ་ ༢༠༡༢ ཟླ་ ༡༢ ཚེས་ ༡༤ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པའི་དུས་དྲན་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ལ་དྭགས་ཀྱི་ཞི་བའི་ཚལ་དགེ་འཕེལ་གླིང་ཕོ་བྲང་དུ་སླེ་དང་བསོད་ནམས་གླིང་བོད་མིའི་གཞིས་ཆགས་ནས་ཁྱོན་མི་གྲངས་ཆིག་སྟོང་བརྒལ་བ་འདུ་འཛོམས་ཀྱིས་དུས་དྲན་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཐོག་མར་དེར་འདུས་མང་ཚོགས་ཀྱིས་བསང་གསོལ་བཏང་རྗེས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྣམས་ལ་གདུང་སེམས་མཉམ་སྐྱེ་དང་མྱ་ངན་མཚོན་ཆེད་ངག་བཅད་སྐར་མ་གཅིག་གནང་ཡོད།
དེ་ནས་ལ་སྤྱི་དོན་གྲུབ་བཀྲ་ཤིས་ལགས་དང་ས་གནས་འཐུས་ཚོགས་ཀྱི་ཚོགས་གཙོ་དོན་གྲུབ་ཚེ་རིང་ལགས་རྣམ་གཉིས་ཀྱིས་བཀའ་ཤག་དང་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་གྲུབ་མཚམས། སྐུ་མགྲོན་གཙོ་བོ་ལ་དྭགས་ནང་པའི་མཐུན་ཚོགས་ཀྱི་ཚོགས་གཞོན་ཚེ་དབང་འཕྲིན་ལས་ལགས་གདན་ཞུ་གནང་ཡོད།
མཛད་སྒོ་གྲུབ་རྗེས་ཕྱི་ལོ་ ༢༠༠༩ ལོ་ནས་བཟུང་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་ཡོངས་ལ་གདུང་སེམས་མཉམ་སྐྱེ་མཚོན་སླད་སྨོན་ལམ་གསུང་འདོན་གནང་ཡོད། སླེ་ས་གནས་བོད་མིའི་ཆོས་དང་རིག་གཞུང་ཚོགས་ཆུང་གིས་སྣེ་ཁྲིད་པའི་ཐོག་ལ་དྭགས་ཁུལ་གྱི་དགོན་སྡེ་ཁག་ ༣༡ ལ་བོད་བསྟན་པ་ཆབ་སྲིད་ཀྱི་དོན་དུ་རང་གི་གཅེས་པའི་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་པ་ཡོངས་ཀྱི་ཆེད་སྨོན་ལམ་གསུང་འདོན་གནང་ཡོད། མཛད་སྒོའི་ཐོག་ལ་དྭགས་བོད་མིའི་གཞིས་ཆགས་ཀྱི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་ནས་མཉམ་ཞུགས་ཧ་ལས་པའི་ཡག་པོ་གནང་ཡོད་པ་བཅས།།
