༢༠༡༢ ཟླ་ ༡༢ ཚེས་ ༡༡ རེས་གཟའ་མིག་དམར།
༄༅། །འདི་གར་ཨ་རི་སྐུ་ཚབ་དོན་གཅོད་ཁང་གི་དྲུང་འཕར་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༡༠ རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་དང་། བྱང་ཨ་རིའི་ནང་ཡོད་བོད་མི་རྣམས་ཀྱིས་རང་ལུགས་བོད་ཆས་དང་། ལག་ཏུ་གངས་སེང་རྒྱལ་དར་ཐོགས་ཏེ། བརྗོད་ཚིག་སྣ་ཚོགས་འཁོད་པའི་མིང་བྱང་། རང་ལུས་མེར་སྲེག་གནང་མཁན་རྣམས་ཀྱི་སྐུ་པར་བཅས་བསྣམས་ཏེ་གྲོང་ཁྱེར་ནིའུ་ཡོཀ་ནང་འཛོམས་ཏེ་ལས་འགུ་རྒྱ་ཞིག་སྤེལ་ཡོད། བྱང་ཨ་རིའི་སྤྱི་འཐུས་རྣམ་པ་གཉིས་དང་། ཨ་རི་སྐུ་ཚབ་དོན་གཅོད། བྱང་ཨ་རིའི་ཁྱབ་ཁོངས་ས་གནས་ཁག་གི་སྐུ་ཚབ། དོན་གཅོད་ཁང་གི་སྲི་ཞུ་བ། གཞུང་འབྲེལ་མ་ཡིན་པའི་ཚོགས་པ་ཁག་གི་རྒྱུན་ལས་སོགས་བོད་མི་ལྔ་སྟོང་ཙམ་ད་རེས་ཀྱི་ལས་འགུལ་ནང་མཉམ་ཞུགས་གནང་ཡོད།
དེ་ཡང་སྔ་དྲོའི་ཚོུད་ ༡༠ ཐོག་སེར་སྐྱ་མང་ཚོགས་དང་། བོད་པར་ཤ་ཚ་དང་རྒྱབ་སྐྱོར་ཡོད་མཁན་རྣམས་རྒྱ་ནག་གཞུང་ཚབ་ཁང་གི་མདུན་དུ་འཛོམས་ཤིང་། ཁོང་ཚོས་མི་མང་ལངས་གླུ་བཏང་། དེ་རྗེས་ས་གནས་ཁག་གི་བོད་རིགས་ཚོགས་པའི་སྐུ་ཚབ་དང་། བོད་པར་ཤ་ཚ་ཡོད་མཁན་ཚོས་རྒྱ་ནག་གཞུང་གི་མཁྲེགས་འཛིན་སྲིད་བྱུས་ལ་ངོ་རྒོལ་གྱི་སྐད་འབོད་དང་། གཞིས་ལུས་བོད་མིར་གདུང་སེམས་མཉམ་སྐྱེའི་གཏམ་བཤད་སྤེལ། སྐབས་དེར་རྒྱ་རིགས་ཧལ་རི་ཝུ་ཡིས། གཞིས་ལུས་བོད་མིས་རང་ལུས་མེར་སྲེག་གནང་པ་ནི་རྒྱ་དམར་གྱི་དབང་སྒྱུར་འོག་ངོ་རྒོལ་བྱེད་པ་ལས་དེ་མིན་ཐབས་ཤེས་གཞན་ཅི་ཡང་མེད་པའི་མཚོན་དོན་ཡིན་གསུངས།
ཆུ་ཚོད་ ༡༡ ཐོག་རྒྱ་ནག་གཞུང་ཚབ་ཁང་ནས་མཉམ་འབྲེལ་རྒྱལ་ཚོགས་བར་སྐད་འབོད་གནང་བཞིན་དུ་གོམ་བགྲོད་བྱས། རྒྱལ་ཚོགས་མདུན་འབྱོར་རྗེས་བྱང་ཨ་རིའི་སྤྱི་འཐུས་ནོར་བུ་ཚེ་རིང་ལགས་དང་། བཀྲིས་རྣམ་རྒྱལ་ལགས། ས་གནས་སྤྱི་མཐུན་ཚོགས་པ་དང་། གཞོན་ནུ། བུད་མེད། ཆུ་སྒང་བཅས་ཀྱི་མི་ལྔས་བྱང་ཨ་རིའི་བོད་མི་རྣམས་ཀྱི་ཚབ་གནང་སྟེ། མཉམ་འབྲེལ་རྒྱལ་ཚོགས་ཀྱི་ལས་ཁུངས་ཨ་མའི་ནང་བཅར་ཏེ་འབྲེལ་ཡོད་དཔོན་རིགས་ལ་བདེན་པའི་མེ་ལྕེ་སྐོར་བསྐྱོད་རིང་འཛམ་གླིང་ས་གནས་གང་ས་ནས་བོད་པར་རྒྱབ་སྐྱོར་གྱི་ས་རྟགས་འབུམ་གསུམ་ལྷག་བསྡུ་རུབ་གནང་ཡོད་པ་དེ་དག་ཕུལ་བ་དང་ཆབས་ཅིག བོད་ནང་གི་ཛ་དྲག་གནང་སྟངས་གཙོ་བོར་བཟུང་ནས་བོད་དོན་གླེང་སློང་གནང་བར་འབྲེལ་ཡོད་དཔོན་རིགས་རྣམས་ཀྱིས་ཐུགས་སྣང་ཆེན་པོ་གནང་ཡོད་པའི་སྐོར་སྤྱི་འཐུས་རྣམ་གཉིས་ནས་སེར་སྐྱ་མང་ཚོགས་ལ་འགྲེལ་བརྗོད་མདོར་བསྡུས་གནང་ཡོད།
མི་ཚོགས་ཤིན་ཏུ་འཛོམས་ཆེ་བའི་སར་སྐུ་ཚབ་དོན་གཅོད་བློ་བཟང་སྙན་གྲགས་ལགས་ནས་༸དཔལ་ལྡན་སྲིད་སྐྱོང་མཆོག་གི་ཞི་བདེའི་གཟེངས་རྟགས་ཀྱི་མཛད་སྒོའི་གསུང་བཤད་སྒྲོགས་སྦྱང་དང་གསུང་བཤད་གནང་བ་མ་ཟད། རླུང་འཕྲིན་དང་། ཚགས་པར་གྱི་གསར་འགོད་པ་རྣམས་ཀྱི་དྲི་བར་ལན་འདེབས་ཀྱང་གནང་། རྒྱ་རིགས་ཤེས་ཡོན་ཅན་ཡང་ཅན་ལི་དང་། གྲན་ཕོ་ཁུང་སོགས་བོད་དོན་ལ་རྒྱབ་སྐྱོར་གནང་མཁན་རྒྱ་རིགས་ཁག་ཅིག་དེ་ཉིན་གྱི་ལས་འགུལ་ནང་མཉམ་ཞུགས་དང་རྒྱབ་སྐྱོར་གྱི་གཏམ་བཤད་གནང་བ་རྣམས་དང་། ཁྱོན་ཡོངས་ཀྱི་ལས་འགུལ་སྐོར་དེ་རིང་གི་རྒྱ་སྐད་བརྙན་འཕྲིན་དང་། ནིའུ་ཡོག་ཀྲའེ་ཡེམ་སི་ཐོག་ལམ་སེང་བཀོད་ཐོན་བྱུང་ཡོད། ཨ་རིའི་མངལ་སྡེ་མི་ནི་སོ་ཊར་དང་། སྦོ་སི་ཊོན། མལ་སི་ཆིའུ་སི། ཁེ་ན་ཌ་སོགས་བོད་མི་གནས་ཡུལ་ས་གནས་ཁག་ ༡༢ ཙམ་ནས་ཁྱོན་བསྡོམས་མི་གྲངས་ ༥༠༠༠ ཙམ་སྡེབས་གཅིག་ལ་འཛོམས་ཤིང་། ཚང་མས་དེ་རིང་གི་ལས་འགུལ་དེ་ནི་ཧ་ཅང་གི་གལ་ཆེན་པོ་ཡིན་པར་གཅིག་གྱུར་ངོས་འཛིན་གནང་།
འདི་ལོའི་སྐུའི་འཁྲུངས་སྐར་དུས་ཆེན་ནས་དབུ་འཛུགས་གནང་བའི་དེན་པའི་མེ་ལྕེ་སྐོར་བསྐྱོད་ཀྱི་རྒྱལ་སྤྱིའི་རང་བཞིན་གྱི་ལས་འགུལ་དེ་ནི་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་དང་། བཀའ་ཤག་ནས་རྒྱབ་གཉེར་གནང་བའི་ལས་འགུལ་ཞིག་ཡིན་པ་དང་། དེ་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་ནས། རྒྱ་གར་རྒྱལ་ས་ལྡི་ལི་དང་། སུད་སི་གྲོང་ཁྱེར་ལྗི་ནི་ཝ། ཨ་རིའི་གྲོང་ཁྱེར་ནིའུ་ཡོཀ་བཅས་ནང་མཇུག་སྡོམ་གནང་གི་ཡོད་པ་བཞིན། ནིའུ་ཡོཀ་ནང་ཡོད་པའི་མཉམ་འབྲེལ་རྒྱལ་ཚོགས་ཀྱི་མདུན་ཐང་གི་བདེན་པའི་མེ་ལྕེ་མཇུག་སྡོམ་གྱི་ལས་འགུལ་དང་། གཞིས་ལུས་བོད་མིར་གདུང་སེམས་མཉམ་སྐྱེའི་ལས་འགུལ་འདི་བཞིན་ཁྲིམས་མཐུན་དང་། ཆེ་མཐོང་ལྡན་པའི་ངང་མཇུག་སྒྲིལ་གནང་། མཐའ་མར་ནིའུ་ཡོཀ་དང་། ནིའུ་འཇར་སི་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཀུན་དགའ་འཕྲིན་ལས་ལགས་ནས་སྤྱི་ཡོངས་ཀྱི་མཇུག་སྡོམ་དང་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།
