༢༠༡༢ ཟླ་ ༡༢ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༤ ཉིན་དཀྱིལ་ཤར་ཡུལ་གྲུའི་ཁ་ཆེའི་རྒྱལ་ཁབ་ཀ་ཊར་ Qatar གྱི་རྒྱལ་ས་ཌོ་ཧཱ་(Doha)རྟེན་གཞི་བྱས་པའི་རྒྱལ་ཡོངས་ཚོགས་ཁང་དུ་(Qatar National Convention Center) རྒྱལ་ཁབ་འདྲ་མིན་གྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་པའི་སྐུ་ཚབ་རྣམ་པ་ལྷན་འཛོམས་ཐོག་གོ་ལའི་གནམ་གཤིས་འགྱུར་ལྡོག་གི་རྒྱལ་སྤྱིའི་ལྷན་ཚོགས་དབུ་འཛུགས་གནང་ཡོད།
ལྷན་ཚོགས་དེའི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་དང་རྡ་ས་དབུས་བུད་མེད་ལྷན་ཚོགས་ཀྱི་ཉམས་ཞིབ་པ་བསྟན་འཛིན་ཆོས་སྒྲོན་ལགས་རྣམ་གཉིས་ཀྱིས་ལྷན་ཚོགས་དེར་ཕེབས་ཏེ་ཚོགས་མི་རྣམས་དང་ཐུགས་འཕྲད་གནང་ཡོད། སྐབས་དེར་ཁོང་གཉིས་ཀྱིས་དེང་སྐབས་རྒྱ་ནག་གཞུང་གི་སྲིད་བྱུས་འོག་མཐོ་སྒང་བོད་ཀྱི་ཁོར་ཡུག་ལ་ཉན་ཚབ་ཧ་ཅང་བཟོ་བཞིན་པ་དང། ལྷག་པར་བོད་ཀྱི་རྒྱུག་ཆུ་བབ་སའི་གཤམ་འོག་འབྲེལ་ཡོད་རྒྱལ་ཁབ་རྣམ་པའི་སྐུ་ཚབ་རྣམས་དང་འབྲེལ་བ་སྔར་ལྷག་ཡོང་རྒྱུའི་འབད་བརྩོན་གནང་ཡོད། དེ་ཡང་སྐབས་དེར་ཕྱི་དྲིལ་ཁོར་ཡུག་ཚན་པའི་འགན་འཛིན་གྱིས་རྒྱ་ནག་སྐུ་ཚབ་ཐུག་འཕྲད་ཀྱིས་བོད་ནང་གི་ཁོར་ཡུག་གནད་དོན་སྐོར་གསལ་བཤད་གནང་ཐུབ་པ་བྱུང་ཡོད། དེ་བཞིན་ཕྱི་ཚེས་ ༣ ཉིན་ཕྱི་དྲིལ་ཁོར་ཡུག་ཚན་པའི་འགན་འཛིན་གྱིས་གནམ་གཤིས་འགྱུར་ལྡོག་གི་གློག་བརྙན་བཟོ་བསྐྲུན་ཁང་གིས་འབོད་སྐུལ་ཞུས་པ་ལྟར། བཟོ་སྐྲུན་ཁང་གིས་ཐད་ཀར་བརྙན་འཕྲིན་ཐོག་རྒྱང་སྲིང་བྱ་རྒྱུའི་ཆེད་དོན་དྲི་བར་ལན་འདེབས་གནང་དོན། ད་བར་རྒྱ་ནག་གཞུང་གིས་བོད་མིའི་རིག་གཞུང་དང་ཁོར་ཡུག་ཐོག་འཛིན་པའི་སྲིད་བྱུས་དེ་དག་ལམ་ལྷོང་རྩ་བ་ནས་བྱུང་མེད།
ཁོར་ཡུག་ལྟ་བུར་མཚོན་ན། ད་ལྟའི་ཆུ་ཤུགས་ཀྱི་གློག་བཟོ་རྒྱུའི་ལས་གཞི་རྒྱ་སྐྱེད་གཏོང་འཆར་ཡོད་པ་དེས་འཆར་ལོའི་ནང་བོད་ཀྱི་རྒྱུག་ཆུ་འབགས་བཙོག་བཟོས་ཏེ་འཕྲོད་བསྟེན་ལ་གནོད་ཚབས་ཆེན་པོ་བཟོ་རྒྱུ་ཡིན་པ་དང།
རིག་གཞུང་ལ་མཚོན་ན། དེང་སྐབས་བོད་མི་ཞིང་པ་དང་འབྲོག་པ་རྣམས་ས་གནས་གཅིག་ཏུ་གཏན་གཞི་བྱེད་འཇུག་བཞིན་ཡོད་པ་མ་ཟད། ཞིང་འབྲོག་ཀྱི་འཚོ་བ་སྐྱེལ་སྟངས་དེ་རྗེས་ལུས་ཤིག་ཡིན་པར་སྙད་འདོགས་ཀྱིས་དོན་དངོས་ཐོག་རྒྱ་ནག་གཞུང་གིས་རྩ་ཐང་དེ་དག་སྟེང་གཏེར་ཁ་སྔོགས་འདོན་བྱེད་མཁན་གྱི་བཟོ་གྲྭ་འགུག་ཐབས་བྱེད་བཞིན་ཡོད། བོད་མཐོ་སྒང་ནི་འཛམ་གླིང་གི་སྣེ་གསུམ་པ་དང་ཨེ་ཤི་ཡའི་རྒྱུག་ཆུ་ཆེ་ཁག་གི་འབྱུང་ཁུངས་ཡིན་པར་ངོས་འཛིན་བྱེད་བཞིན་ཡོད། མཐོ་སྒང་བོད་ཀྱི་གནམ་གཤིས་འགྱུར་ལྡོག་དེས་བོད་མི་ཞིང་འབྲོག་ཙམ་མ་ཟད། བོད་ཀྱི་རྒྱུག་ཆུར་རྟེན་ནས་འཚོ་གནས་བྱེད་བཞིན་པའི་ཨེ་ཤི་ཡའི་མི་འབོར་ཐེར་འབུམ་མང་པོར་ཧ་ཅང་འབྲེལ་བ་ཆགས་ཡོད། ཅེས་གསུངས་ཡོད།
ཕྱི་ཚེས་ ༤ ཉིན་ཁོང་རྣམ་གཉིས་ཀྱིས་ཞོགས་ཟས་ཚོགས་འདུ་ཞིག་ཏུ་ཡུ་རོབ་ལྗང་ཁུ་ཚོགས་པའི་ཚོགས་མི་ ༩ དང་མཉམ་མཇལ་འཕྲད་ཀྱིས་བོད་ཀྱི་གནད་དོན་སྐོར་འགྲེལ་བརྗོད་གནང་བ་དང་ཆབས་ཅིག མཐོ་སྒང་བོད་ཀྱི་ཁོར་ཡུག་དེ་བཞིན་ད་ཆ་ཛ་དྲག་འོག་གནས་བཞིན་པའི་སྐོར་དང་འབྲེལ་བའི་ཡིག་ཆ་ཁག་གཅིག་ཀྱང་འགྲེམས་སྤེལ་གནང་ཡོད། དེ་བཞིན་ཁོང་རྣམ་གཉིས་ཀྱིས་རྒྱ་གར་ལྗང་ཁུ་ཚོགས་པའི་ཚོགས་མི་གསུམ་དང་ལྷན་མཇལ་འཕྲད་གནང་སྐབས་ཁོང་རྣམ་པས་རྒྱ་ནག་གཞུང་གིས་བོད་ཀྱི་རྒྱུག་ཆུ་ཁག་ལ་གང་བྱུང་ཆུ་རག་མང་པོ་རྒྱོབ་བཞིན་པ་དེར་བློ་འཚབ་ཡོད་སྐོར་གསུངས་ཡོད།
ཁོང་རྣམ་གཉིས་ཀྱིས་རྒྱ་རིགས་ཀྱི་ཚོགས་གུར་དུ་ (pavilion ) གོ་སྒྲིག་ཞུས་པའི་མཛད་སྒོའི་ཐོག་མཉམ་ཞུགས་སྐབས་རྒྱ་ནག་ཡར་རྒྱས་དང་ལེགས་བཅོས་ཚོགས་ཆུང་གི་གནམ་གཤིས་འགྱུར་ལྡོག་ཚན་པའི་འགན་འཛིན་སྐུ་ཞབས་ཧུ་ཝང་ཝན་ཧང་ Ms Huang Wenhang གྱིས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རང་བྱུང་སྐྱེ་དངོས་གྱི་སྲུང་སྐྱོབ་ཐོག་འགྲོ་གྲོན་ཇི་ལྟར་གཏོང་བཞིན་ཡོད་སྐོར་འགྲེལ་བརྗོད་གནང་ཡོད། དེ་ནས་དྲི་བ་དྲིས་ལན་གྱི་སྐབས་ཁོར་ཡུག་ཚན་པའི་འགན་འཛིན་གྱིས་རྒྱ་ནག་གཞུང་གིས་སྣོད་བཅུད་རྟེན་འབྲེལ་ (ecology) གྱི་གནས་སྟངས་ཡག་ཏུ་གཏོང་ཆེད་དང་སྲུང་སྐྱོབ་ཆེད་དངུལ་འབོར་ཇི་ཙམ་འགྲོ་གྲོན་བཏང་ཡོད་པ་དང། བོད་དང་ཤིང་ཅང་ཁུལ་གྱི་ས་གནས་མི་མང་རྣམས་ལ་གཞུང་གི་གུན་གསབ་སྤྲོད་རྒྱུའི་ཁས་ལེན་བྱས་པ་རྣམས་དོན་འཁྱོལ་མ་བྱས་པར་བརྟེན། ཁོང་ཚོར་མུ་མཐུད་དཀའ་ངལ་འཕྲད་བཞིན་ཡོད་སྐོར་དྲི་བ་དྲིས་སྐབས། ཁོ་མོས་རྒྱ་ནག་གཞུང་གིས་དཀའ་ངལ་དེ་དག་འཕྲལ་དུ་སེལ་ཐབས་བྱེད་ཀྱི་རེད། ཅེས་ལན་འདེབས་བྱས་ཡོད་པ་བཅས།།
