༢༠༡༢ ཟླ་ ༡༠ ཚེས་ ༡༢ རེས་གཟའ་པ་སངས།
༄༅། །དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་མཆོག་གིས་ཨ་རིའི་ནིའུ་ཡོཀ་གྲོང་ཁྱེར་ནང་ཡོད་པའི་ཀོ་ལམ་བྷི་ཡའི་གཙུག་ལག་སློབ་གྲྭ་ཆེན་པོའི་ནང་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་ཚོར་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སྐོར་གསུང་བཤད་གནང་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༩ ཚེས་ ༡༠ ཉིན་ཀོ་ལམ་བྷི་ཡའི་གཙུག་ལག་སློབ་གྲྭ་ཆེན་པོའི་ནང་བོད་པའི་སློབ་ཕྲུག་སློབ་སྦྱོང་གནང་བཞིན་པ་ཁག་གཅིག་གིས་གཙོས་བོད་རིགས་གཞོན་སྐྱེས་ཉིས་བརྒྱ་ཙམ་ཞིག་ལ་དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་ལས་དོན་གནང་ཕྱོགས་ངོ་སྤྲོད་དང་འབྲེལ་གསུང་བཤད་གནང་དོན། ངས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ལས་ཁུར་ཞུས་ནས་ལོ་གཅིག་ལྷག་ཙམ་ཕྱིན་པ་དེའི་རིང་ལ་འཛིན་སྐྱོང་ཐོག་འཐུས་ཤོར་ཕྱིན་མེད། དེ་བཞིན་བོད་དོན་ཆེད་ཕྱི་རྒྱལ་ཡུལ་གྲུ་ཁག་ཏུ་ཆེད་མངགས་ཕྱིན་ཏེ་གཞུང་འབྲེལ་དང་གཞུང་འབྲེལ་མིན་པའི་དབུ་ཁྲིད་མང་དག་ཅིག་མཇལ་འཕྲད་ཞུས་ཏེ་བོད་དོན་ལ་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་དང་ཞུ་མུས་ཡིན། ལྷག་པར་མི་རབས་རྒན་པ་ཚོས་སྐུ་ལས་བསྐྱོན་པའི་བཀའ་དྲིན་ལ་བརྟེན་ནས་ད་ལྟ༌བོད་མིའི་སྒྲིག་འཛུགས་སྲ་བརྟན་ཞིག་ཡོད་པ་དེར་གཞོན་སྐྱེས་ཚོས་ཁོང་རྣམ་པའི་བཀའ་དྲིན་ལ་རྗེས་སུ་ཡི་རང་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། སྤྱིར་བཏང་སྲིད་སྐྱོང་གི་འགན་དེ་བཞིན་ཧ་ཅང་ཆེན་པོ་ཡིན་པ་མ་ཟད། དཀའ་ངལ་ཡང་ཆེན་པོ་འདུག འོན་ཀྱང་ང་རང་བཀའ་བློན་ཁྲི་པའི་འོས་མིར་ལངས་སྐབས་ནས་བོད་མིའི་རྩ་དོན་ཆེད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར། ལས་འགན་བསྒྲུབ་རྒྱུའི་ཆོད་སེམས་གཏན་པོ་བཞག་ཡོད་ལ་དེ་ནི་དམ་བཅའ་ཞིག་ཀྱང་ཡིན། ཁྱེད་རང་ཚོ་གཞོན་སྐྱེས་ཚོས་ཤེེས་ཡོན་སློབ་སྦྱོང་ཐོག་དོ་སྣང་དང་ཤུགས་སྣོན་ཆེ་ཙམ་རྒྱག་དགོས། གང་ལ་ཞེ་ན། དེ་ནི་འཛིན་སྐྱོང་བཀའ་ཤག་གི་སྲིད་བྱུས་ནང་ནས་གལ་གནད་ཆེ་ཤོས་སུ་འཛིན་བཞིན་ཡོད། དེ་བཞིན་གཞོན་སྐྱེས་ཁྱེད་རྣམས་ནས་བོད་མིའི་སྒྲིག་འཛུགས་ཀྱི་དྲ་རྒྱ་དང་དྲ་བརྙན་ལ་ངེས་པར་དུ་དོ་སྣང་སྤྲད་དེ་ལྟ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་གསུང་བཤད་གྲུབ་མཚམས་སློབ་ཕྲུག་ཚོས་བཏོན་པའི་དྲི་བར་ལན་འདེབས་ཀྱང་གནང་ཡོད་པ་བཅས། །
