༢༠༡༢ ཟླ་ ༡༠ ཚེས་ ༤ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༢ ཟླ་ ༡༠ ཚེས་ ༤ ཕྱི་དྲོ་ནས་ཚེས་ ༢༩ ཉིན་སྔ་དྲོ་བར་ཨ་རི་དང་ཅེཀ་སྤྱི་མཐུན་རྒྱལ་ཁབ། དབྱིན་ཡུལ། ཨི་ཊ་ལི་བཅས་སུ་གཞུང་འབྲེལ་ཕྱོགས་བསྐྱོད་གནང་རྒྱུ་ཡིན་འདུག
དེ་ཡང་སྲིད་སྐྱོང་མཆོག་ཕྱི་ལོ་ ༢༠༡༢ ཟླ་ ༡༠ ཚེས་ ༤ ཉིན་གྱི་ཕྱི་དྲོ་རྡ་ས་ནས་པ་ཀོར་དང་། དེ་ནས་མེ་འཁོར་བརྒྱུད་ཕྱི་ཚེས་ ༥ ཉིན་ལྡི་ལིར་ཕེབས་འབྱོར་རྗེས་སྙན་གྲགས་ཆེ་བའི་གསར་འགྱུར་བརྒྱུད་ལམ་གྱི་རྩོམ་སྒྲིག་པ་ཁག་གཅིག་ལ་དབུ་མའི་ལམ་སྐོར་གསུང་བཤད་གནང་རྒྱུ་དང་། ཕྱི་ཚེས་ ༦ ཉིན་ལྡི་ལི་ནས་མཁའ་ལམ་བརྒྱུད་ཨ་རིའི་བྷོ་སེ་ཊོན་ལ་ཕེབས་རྗེས་ཕྱི་ཚེས་ ༡༩ བར་ཧར་ཝཀ ཀོ་ལམ་པི་ཡ། ནིའུ་ཡོཀ ཝར་ཇི་ནི་ཡ། མི་ཎི་སོ་ཊར་བཅས་སུ་ལས་འཆར་གནང་རྒྱུ་ཡིན་འདུག ཕྱི་ཚེས་ ༢༠ ཉིན་པ་རཀ་ལ་ཕེབས་རྗེས་ས་གནས་སུ་ལས་འཆར། དེ་བཞིན་ཕྱི་ཚེས་ ༢༢ པ་རཀ་ནས་ལོན་ཌོན་དུ་ཕེབས་འབྱོར་རྗེས་ཕྱི་ཚེས་ ༢༣ ཉིན་ས་གནས་སུ་ལས་འཆར་གནང་རྒྱུ་ཡིན་འདུག ཕྱི་ཚེས་ ༢༤ ཉིན་ལོན་ཌོན་ནས་རོམ་ལ་ཕེབས་འབྱོར་གྱིས་ས་གནས་སུ་ལས་འཆར་གནང་རྗེས་ཕྱི་ཚེས་ ༢༧ ཉིན་མི་ལན་ནས་ལོན་ཌོན་བརྒྱུད་ལྡི་ལིར་ཕེབས་དང་། དེ་ནས་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས། །
