༢༠༡༢ ཟླ་ ༡༠ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༢༡ རེས་གཟའ་ཉི་མའི་ཉིན་བོད་མིའི་སྒྲིག་འཛུགས་ཀྱིས་རྒྱལ་སྤྱིའི་ཚོགས་པ་ཁག་ལ་འབོད་སྐུལ་གྱི་བསྒྲགས་གཏམ་ཞིག་སྤེལ་བའི་ནང་འཁོད་དོན། བོད་མིའི་སྒྲིག་འཛུགས་ཀྱིས་ཁ་སེང་ཕྱི་ཚེས་ ༢༠ ཉིན་སླར་ཡང་བོད་མི་ཞིག་གིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་གནས་ཚུལ་ཐོན་པར་ཧ་ཅང་བློ་ཕམ་དང་བཅས་བོད་ནང་གི་ཛ་དྲག་གནས་སྟངས་ཐོག་ཧ་ཅང་སེམས་འཚབ་ཡོད་པ་བསྐྱར་ནན་ཞུ་རྒྱུ་ཡིན། བོད་ནང་ནས་གནས་ཚུལ་འབྱོར་བར་གཞིགས་ན། བོད་བྱང་ཤར་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་བསང་ཆུ་རྫོང་གི་འབོ་ར་ས་ཁུལ་དུ་བོད་ནང་གི་ཕྱེད་ཡོལ་ཆུ་ཚོད་ ༢ ཐོག་བོད་མི་རང་ལོ་ ༢༧ སོན་པ་རྒྱལ་གཅེས་པ་ལྷ་མོ་སྐྱབས་ལགས་ཀྱིས་རང་ལུས་མེར་སྲེག་བཏང་ཡོད། སྐབས་དེར་མིག་གིས་དངོས་སུ་མཐོང་བའི་གནས་ཚུལ་ལ་གཞིགས་ན། ཁོང་གི་ལུས་པོ་ཡོངས་རྫོགས་ལ་མེ་འབར་བཞིན་དུ་འབོ་ར་དགོན་པའི་ཉེ་འདབས་སུ་རྒྱུག་སྟེ་༸གོང་ས་མཆོག་བོད་ལ་གདན་འདྲེན་ཞུ་དགོས། ཞེས་སྐད་འབོད་གནང་ཡོད།
སྐབས་དེར་རྒྱ་མིའི་ཉེན་རྟོག་དམག་མིས་ཁོང་གི་མེ་གསོད་ཐབས་བྱས་ཀྱང་ཁོང་ས་གནས་དེ་རང་དུ་མེས་ཚིགས་ཏེ་འདས་གྲོངས་སུ་གྱུར་ཡོད། ལྷ་མོ་སྐྱབས་དམ་པ་ཁོང་དང་ཆུང་མ་རྡོ་རྗེ་སྐྱིད་ལགས་སུ་རང་ལོ་ ༡༠ སོན་པའི་བུ་མོ་འབྲུག་མོ་མཚོ་དང་། རང་ལོ་ ༧ སོན་པའི་བུ་མོ་པདྨ་བཅས་ཕྲུ་གུ་གཉིས་ཡོད་འདུག བོད་མི་ ༥༦ རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱས་ཡོད་པ་ཚང་མས་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང། བོད་མི་ཚོར་རང་དབང་དགོས་པའི་འབོད་སྒྲ་བསྒྲགས་ཡོད། ཅེས་འཁོད་ཡོད་པ་མ་ཟད། ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་དོན། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་མཚམས་འཇོག་བྱས་ཏེ་གྲོས་མོལ་གྱི་ལམ་ནས་བོད་མིའི་དངོས་ཡོད་དཀའ་ངལ་སེལ་ཆེད་ཕུགས་རྒྱང་རིང་པོའི་སྲིད་བྱུས་ནམ་ཞིག་ལག་བསྟར་བྱས་ཚེ་བོད་མིས་རང་ལུས་མེར་སྲེག་གི་ལས་འགུལ་མཚམས་འཇོག་བྱེད་ཀྱི་རེད། རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གཞུང་ལ་གནོན་ཤུགས་སྤྲད་དེ་བོད་མིའི་ཛ་དྲག་གི་དཀའ་ངལ་སེལ་ཆེད་རོགས་རམ་གནང་རོགས། ཞེས་ང་ཚོས་འབོད་སྐུལ་བསྐྱར་ནན་ཞུ་རྒྱུ་ཡིན། ཞེས་གསུངས་པ་བཅས།།
