༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།

སྐུ་པར་རྣམས་དགའ་ལྡན་ཕོ་བྲང་གི་དྲ་རྒྱ་ནས་བཏུས།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ནང་རྟེན་གཞི་བྱས་པའི་(Middlebury)མི་ཌེལ་བྷུརའི་གཙུག་ལ་སློབ་གཉེར་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༢ ཟླ་ ༡༠ ཚེས་ ༡༢ ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་སློབ་གྲྭ་དེའི་དགེ་ལས་སློབ་ཕྲུག་དང་མང་ཚོགས་བཅས་ཁྱོན་མི་གྲངས་བརྒྱ་ཕྲག་བརྒལ་བར་སེམས་ཁམས་དང་ཤེས་ཡོན་གྱི་བརྗོད་གཞིའི་ཐོག་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་པར་ཧ་ཅང་དགའ་པོ་བྱུང་། ཁྱེད་རང་ཚོ་ཚང་མར་འཚམས་འདྲི་ཡོད། ད་ལྟའི་དུས་རབས་ཉེར་གཅིག་འདིའི་ནང་གཞོན་སྐྱེས་ཚོས་སློབ་སྦྱོང་ལ་དམིགས་བསལ་དོ་སྣང་བྱེད་དགོས།

དེ་ཡང་སྤྱིར་བཏང་སློབ་གྲྭ་ཐོན་པ་ཙམ་མ་ཡིན་པར་རིགས་གཅིག་རྐང་འཛིན་གྱི་མཁས་པ་ཚད་ལྡན་ཞིག་ཡོང་ཐབས་ལ་འབད་བརྩོན་ཆེ་ཙམ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ཤེས་ཡོན་སློབ་སྦྱོང་བྱ་རྒྱུ་དེ་སོ་སོའི་དཔལ་འབྱོར་ཁོ་ནའི་ཁེ་ཕན་ཆེད་དུ་མ་ཡིན་པར། བསམ་བློ་རྒྱ་ཆེ་ས་ནས་བཏང་སྟེ་སྤྱིར་རང་གཞན་གཉིས་དང་ཡང་སྒོས་སྤྱི་ཚོགས་ཀྱི་ཁེ་ཕན་སྒྲུབ་ཐབས་ལ་བསམ་བློ་གཏོང་དགོས། ལྷག་པར་དེང་སྐབས་འཛམ་གླིང་འདི་གཅིག་ལ་གཅིག་རྟེན་གྱི་དུས་ཚོད་ཅིག་ཆགས་ཡོད་སྟབས། དངོས་ཡོད་ཀྱི་གནས་སྟངས་ལ་གཞིགས་ཏེ་བསམ་བློ་རྒྱ་ཆེ་ས་ནས་གཏོང་དགོས། དེ་བཞིན་ཤེས་ཡོན་སློབ་སྦྱོང་བྱེད་སྐབས་དགེ་རྒན་གྱིས་བསླབ་པའི་ཤེས་བྱ་དེ་དག་རང་ཉིད་ཀྱིས་མྱོང་གོམས་དཔྱད་གསུམ་བྱས་ཏེ་གདེང་སྤོབས་ལྡན་པའི་མཁས་པ་ཚད་ལྡན་ཡོང་ཐབས་བྱེད་དགོས་པ་མ་ཟད། སྤྱི་ཚོགས་ལ་ཞབས་འདེགས་སྒྲུབ་མཁན་གྱི་མི་སྣ་ཞིག་ཆགས་ཐབས་བྱ་རྒྱུར་འབད་དགོས་རྒྱུ་ཧ་ཅང་གལ་ཆེན་པོ་ཡིན། ཞེས་སོགས་ཀྱི་བཀའ་སློབ་སྩལ་ཡོད།