༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༢ ཟླ་ ༡༠ ཚེས་ ༡༢ ཉིན་ཨ་རིའི་ནང་རྟེན་གཞི་བྱས་པའི་(Virginia)ཝར་ཇི་ན་ཡ་མངའ་སྡེ་ནང་གནས་སྡོད་བོད་རིགས་དང་རླུང་འཕྲིན་ཁང་གི་གསར་འགོད་པ་ཁག་གཅིག་ལ་བཀའ་སློབ་སྩལ་ཡོད།
དེ་ཡང་ཐོག་མར་མགོན་པོ་གང་ཉིད་མཆོག་གིས་མཇལ་ཁ་དེའི་ཐོག་ཆེད་བཅར་ཞུས་པའི་ཨ་རིའི་རླུང་འཕྲིན་ཁང་དང་ཨི་ཤེ་ཡའི་རང་དབང་རླུང་འཕྲིན་ཁང་གི་གསར་འགོད་པ་ཁག་གཅིག་ལ་གསར་འགོད་པ་ཚོར་བོད་ནང་གི་བོད་མིའི་དངོས་ཡོད་གནས་སྟངས་ལ་གཞིགས་པའི་གནས་ཚུལ་ཁུངས་བཙན་དང་། ལྷག་པར་འགན་འཁྱེར་ཐུབ་པའི་གནས་ཚུལ་མཁོ་སྤྲོད་བྱེད་དགོས་དོན་སྐོར་ལམ་སྟོན་བཀའ་སློབ་སྩལ་དོན།
ཁྱེད་རང་ཚོ་གསར་འགྱུར་ཤོད་མཁན་དེ་དག་གིས་སོ་སོ་འདི་གར་ཁ་བདེ་པོ་བྱས་ནས་བཤད་པའི་སྐད་ཆ་གང་ཡང་མིན། ཕར་ཕྱོགས་དེར་སྡུག་པོ་མྱོང་མཁན་དང་འཇིགས་སྣང་འོག་རེ་བའི་མིག་འབུར་རང་དབང་ལུང་པར་གཏོད་མཁན་དེ་དག་གིས་རྣ་ཅོག་ནས་ཉན་གྱི་ཡོད་བསམས་པའི་ཐོག་དེ་ལུགས་ཀྱི་སྐ་ཆ་ཤོད་དགོས་པ་རེད་མ་གཏོགས། ཁྱེད་རང་ཚོས་ཁ་ཐུག་དེར་ཁ་བདེ་པོ་དང་འུར་ཤོབ་བཤད་ནས་ཡག་པོ་མེད། གཉིས་ནས་གསར་འགྱུར་ཁུངས་བཙན་པོ་ཞིག་དགོས་པ་རེད་མ་གཏོགས་སྲང་ལམ་གྱི་སྐད་ཆ་སྒྲུག་སྟེ་དེའི་ནང་ཤོད་རྒྱུ་མེད། སྐབས་རེ་དེ་འདྲ་ཡོང་གི་འདུག་པས་གཟབ་གཟབ་བྱེད་དགོས། རང་དབང་ལུང་པའིི་ནང་ཡོད་མཁན་ཚོས་ཁྱེད་རང་ཚོས་རྫུན་མ་ཤོད་མཁན་ཞིག་མཐོང་གི་རེད་མ་གཏོགས་ཐལ་ཆ་ཆེ་བ་མེད། འོན་ཀྱང་བོད་ནང་ཡོད་མཁན་བོད་མི་དེ་དག་གིས་གནས་ཚུལ་ཆ་ཚང་མ་ཤེས་པའི་ཐོག་སྐད་ཆ་དོགས་འདྲོག་སློང་རྒྱུ་དེ་འདྲ་གོ་ཡོང་སྐབས། མ་བདེ་བ་ཆགས་ཀྱི་རེད། དེར་བརྟེན་གཟབ་གཟབ་བྱེད་དགོས། ཁྱེད་རང་ཚོར་ཧ་ཅང་འགན་ཆེན་པོ་ཡོད། ཁྱེད་རང་ཚོས་ལྟོ་ཕོགས་གང་ཙམ་ཡག་པོ་ཡོད་འགྲིག་གི་འདུག་བསམ་རྒྱུ་མེད། བོད་ནང་གི་རྒྱ་ཆེའི་མི་མང་དེ་དག་གིས་ཉན་གྱི་ཡོད་བསམས་ནས་གཟབ་གཟབ་བྱ་རྒྱུ་དེ་སེམས་ལ་འཇོག་དགོས། སྲིད་སྐྱོང་གིས་གསུངས་པ་ལྟར། ཁྱེད་རང་ཚོར་འགན་ཆེན་པོ་ཞིག་ཡོད་སྟབས། འགན་ཁུར་དེ་གཞིར་བཞག་པའི་ཐོག་ནས་སོ་སོའི་ལས་དོན་ཚགས་ཚུད་པོ་བྱ་རྒྱུ་དེ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ་ཡོད།
ལྷག་པར་མགོན་པོ་གང་ཉིད་མཆོག་གིས་བོད་རིགས་ཚོར་བཀའ་སློབ་སྩལ་དོན། ཁྱེད་རང་ཚོ་མང་ཚོགས་ཚོས་ཀྱང་དེ་ལུགས་ཀྱི་ལུང་པ་གང་དུ་བསྡད་ཡོད་ཀྱང་བོད་པའི་མཚན་ཤས་མ་ཡོང་བ་དང་ཞབས་འདྲེན་མ་ཞུས་པ་ཞིག་བྱེད་དགོས། བར་སྐབས་སུད་སི་དེ་འདྲ་ལ་བོད་པ་ཞབས་འདྲེན་ཞུ་མཁན་ཁ་ཤས་ཡོང་གི་འདུག་པ་མ་ཟད། ཉེ་ཆར་ཁེ་ན་ཌར་ཞབས་འདྲེན་ཞུ་མཁན་ཁ་ཤས་ཤིག་བྱུང་འདུག དེ་ཚོའི་གྲས་ཕྲན་བུ་མང་དུ་འགྲོ་གི་འདུག སྔ་མོའི་བོད་མི་ཚོར་དེང་དུས་ཀྱི་ཤེས་ཡོན་མེད་ཀྱང་ཡ་རབས་དང་དྲང་པོ། བློས་ཐུབ་བྱ་རྒྱུ་དེ་དག་བོད་པའི་གོམས་གཤིས་ལ་ཡོད་པར་བརྟེན། མི་རབས་གོང་མ་ཚོས་ཕལ་ཆེར་ཞབས་འདྲེན་ཞུས་མེད། དེང་སྐབས་བོད་པ་ཞབས་འདྲེན་ཞུ་མཁན་ཕྲན་བུ་ཡོང་བཞིན་འདུག་པས། དེ་ཚོའི་གྲས་ལ་ཁྱེད་རང་ཚོ་ཁྱིམ་ཚང་མི་རེ་ངོ་རེས་ཡིད་གཟབ་བྱས་ཏེ། སོ་སོའི་ཁྱིམ་ཚང་ནང་གི་ཕྲུ་གུ་ཚོར་སློབ་གསོ་རྒྱག་དགོས། ཡ་རབས་ཞེས་པ་དེ་འདྲ་ཆགས་པོ་བྱས་པའི་སྐད་ཆ་གང་ཡང་མིན། ཡ་རབས་བྱས་ན་རང་ཉིད་སེམས་སྐྱིད་པ་ཡོང་གི་རེད། ཉེ་ཆར་རང་ངོས་ཀྱིས་ཨ་རིའི་ཚན་རིག་པ་ཞིག་གིས་བྲིས་པའི་རྩོམ་ཡིག་ཅིག་མཐོང་བྱུང། མི་སྐྱག་རྫུན་ཤོད་མཁན་དེའི་སེམས་ནང་དངངས་སྐྲག་མང་བ་ཡོད་སྐོར་བྲིས་འདུག་ཅེས་སོགས་ཀྱི་བཀའ་སློབ་སྩལ་ཡོད་པ་བཅས། །
