༢༠༡༢ ཟླ་ ༩ ཚེས་ ༥ རེས་གཟའ་ལྷག་པ།
༄༅། །དེ་ཡང་ཉེ་ལམ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྤྱི་འཐུས་ཁག་གཅིག་གིས་བོད་ནང་གི་ཛ་དྲག་གནས་སྟངས་ལ་རྒྱལ་སྤྱིའི་ཚོགས་པ་ཁག་གི་རྒྱབ་སྐྱོར་ཐོབ་ཆེད་རྒྱ་གར་་གྱི་རྒྱལ་ས་དི་ལིར་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁང་ཁག་ ༢༣ ལ་ཆེད་ཕེབས་ཀྱིས་འབོད་སྐུལ་ཞུས་ཡོད། སྐབས་དེར་རྒྱ་ནག་གཞུང་གིས་གཞུང་ཚབ་ཁང་དེ་དག་ལ་བོད་མི་མང་སྤྱི་འཐུས་ཚོགས་གཙོ་སོགས་ལ་ཐུག་འཕྲད་མ་གནང་རོགས་ཞེས་་སྔོན་བརྡ་བཏང་བའི་ནང་འཁོད་དོན།
༼ང་ཚོས་ཤེས་གསལ་ལྟར་ན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཟེར་བ་སྤེན་པ་ཚེ་རིང་དང་སྤྱི་འཐུས་ཀྱི་སྐུ་ཚབ་ཁག་ཅིག་ལྡི་ལིར་རྟེན་གཞི་བྱས་པའི་གཞུང་ཚབ་ཁང་ཁག་ཅིག་དང་། རྒྱལ་སྤྱིའི་ངོ་བོ་ཅན་གྱི་སྒྲིག་འཛུགས་ཁག་ཅིག་ལ་མཇལ་འཕྲད་ཀྱིས་བོད་ནང་གི་གནད་དོན་ཟེར་བ་ཞུ་གཏུགས་བྱ་རྒྱུར། ཕྱི་ལོ༢༠༡༢ ཟླ༨ ཚེས༢༢ ནས་བཟུང་། འབྲེལ་གཏུགས་བྱ་རྒྱུ་ཡིན་འདུག རྒྱ་ནག་གི་ངོས་ནས་འདིའི་ཐོག་སེམས་འཚབ་ཆེན་པོ་ཡོད་ཞུ་རྒྱུ་ཡིན།
ཚང་མས་མཁྱེན་གསལ་ལྟར། བོད་དེ་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་། རྒྱ་ནག་གི་བོད་ཐོག་མངའ་དབང་ཡོད་པ་རྩོད་མེད་ཡིན། དོན་དངོས་གནས་སྟངས་འདི་རྒྱལ་སྤྱིའི་སྤྱི་ཚོགས་རྒྱ་ཆེ་བས་ངོས་ལེན་ཞུ་བཞིན་ཡོད
བོད་དོན་དང་འབྲེལ་བའི་གནད་དོན་འདི་རྒྱ་ནག་གི་མངའ་དབང་དང་ས་ཁོངས་གཅིག་སྡུད་ཀྱི་འབྲེལ་བ་ཙམ་མ་ཟད། རྒྱ་ནག་གི་གནད་དོན་གཙོ་བོ་དང་། རྒྱ་ནག་མི་མང་གི་སེམས་ཚོར་དང་འབྲེལ་བ་ཆགས་ཡོད། ཏཱ་ལའི་བླ་མ་བགྲེས་ཡོལ་ཆ་ཚང་ཐོན་ཡོད་ཟེར་ཡང་། ད་དུང་བཙན་བྱོལ་བོད་གཞུང་ཟེར་བ་དེར་མུ་མཐུད་ནས་བསམ་བློའི་ཇུས་འགོད་པའི་གནས་སྟངས་ཐོག་གནས་ཡོད་པར་མ་ཟད། རྒྱ་ནག་དང་ལྡོག་ཕྱོགས་ཀྱིས་བོད་དེ་རྒྱ་ནག་དང་ཁ་བྲལ་གཏོང་ཐབས་དང་། རྒྱ་ནག་གི་བརྟན་བརླིང་ལ་གནོད་སྐྱོན་དང་། སྤྱི་ཚོགས་དང་དཔལ་འབྱོར་ཡར་རྒྱས་ལ་གནོད་སྐྱོན་དུ་འགྲོ་བའི་ལས་གཞི་མཚམས་མ་ཆད་པར་སྤེལ་བཞིན་ཡོད། ཉེ་ལམ་བོད་ནང་རང་ལུས་མེར་བསྲེགས་བཏང་བའི་གནད་དོན་དེ་ཚོ་ཏཱ་ལའི་རུ་ཁག་གིས་ཆབ་སྲིད་ཀྱི་དགོས་མཁོ་དམིགས་བསལ་ཅན་གྱི་འོག་ནས་བརྒྱུད་སྐུལ་བྱས་དང་བྱེད་མུས་རེད།
གོང་གསལ་གནད་དོན་འདི་དག་གཞི་ལ་བཞག་པའི་ཐོག་ནས་སྤེན་པ་ཚེ་རིང་གིས་ད་ཐེངས་རྣམ་པ་ཚོའི་སར་བཅར་དགོས་དོན་གཙོ་བོ་དེ། གནས་ཚུལ་ངོ་མ་མ་ཡིན་པ་བརྒྱུད་བསྒྲགས་བྱེད་པ་དང་། ལྡི་ལིར་རྟེན་གཞི་བྱས་པའི་གཞུང་ཚབ་ཚོར་བསླུ་བྲིད་བཏང་ཐོག རྒྱ་ནག་དང་རྒྱལ་ཁབ་གཞན་གྱི་དབར་དང་། རྒྱ་ནག་དང་རྒྱལ་སྤྱིའི་ངོ་བོ་ལྡན་པའི་སྤྱི་ཚོགས་དབར་རྙོག་དྲ་བཟོ་ཆེད་ཡོང་བ་རེད།
དེ་བས་ན་རྒྱ་ནག་གཞུང་ཚབ་ངོས་ནས་ཏཱ་ལའི་རུ་ཁག་གི་ངོ་བོ་དང་མིང་གང་འདྲ་ཞིག་གི་ཐོག་ནས་གཞུང་ཚབ་ཁང་ཁག་དང་། རྒྱལ་སྤྱིའི་ངོ་བོ་ལྡན་པའི་སྒྲིག་འཛུགས་ཁག་ལ་འབྲེལ་བ་ཞུ་འཆར་དེར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན། ཁྱེད་རང་ཚོ་གཞུང་ངོས་ནས། སོ་སོའི་གཞུང་ངོས་ནས་ལས་དོན་ཐོག་ཁས་ལེན་གནང་བཞག་པ་དེ་དག་བརྩི་བཀུར་ཞུ་དགོས་རྒྱུ་དང་། ཏཱ་ལའི་རུ་ཁག་གིས་དམིགས་ཡུལ་ངེས་ཅན་དེ་དག་ལ་རྒྱུན་དུ་ནས་དོ་སྣང་གནང་དགོས་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་རྣམས་ལ་སྣེ་ལེན་ཞུ་རྒྱུས་མཚོན་པའི་ངོ་བོ་གང་གི་ཐོག་ནས་ཐུག་འཕྲད་གནང་སྟེ། ཕྱིའི་རྣམ་པའི་ཐོག་ནས་བརྡ་ལན་ནོར་འཁྲུལ་མི་འགྲོ་བ་དང་། ང་ཚོ་རྒྱལ་ཁབ་ཕན་ཚུན་དབར་གྱི་སྤྱི་ཡོངས་ཀྱི་ཁེ་ཕན་སྲུང་སྐྱོབ་དགོས་པའི་རེ་འདུན་ཞུ་རྒྱུ་ཡིན། ཞེས་འཁོད་ཡོད་པ་བཅས།།