༢༠༡༢ ཟླ་ ༩ ཚེས་ ༢༠ རེས་གཟའ་ཕུར་བུ།

༄༅། །ཕྱི་ལོ་ ༢༠༡༢ ཟླ་ ༩ ཚེས་ ༡༨ ཉིན་ཕ་རན་སི་རྒྱལ་ས་པེ་རི་སིར་རྟེན་གཞི་བྱས་པའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ལྷ་སའི་བྱང་ནུབ་ཏུ་རྟེན་གཞི་བྱས་པའི་བྱ་དོར་གནམ་མཚོ་ཞེས་གྲོང་ཆུང་ཆུང་ཞིག་ཡོད་པ་དེར་ཕ་རན་སིའི་གྲོང་ཚོ་བྷོ་ཁེ་མེ་ནེ་ Bouchemaine ཞེས་པའི་གྲོང་ཚོ་ཆུང་ཆུང་ཞིག་ཡོད་པ་དེས་རོགས་རམ་གཟིགས་རྟོགས་གནང་རྒྱུའི་ཐག་གཅོད་གནང་ཆེད་མཛད་སྒོ་སྟབས་བདེ་ཞིག་ཚོགས་ཡོད། དེ་ཡང་མཛད་སྒོའི་སྐབས་བྷོ་ཁེ་མེ་ནེའི་གྲོང་ཁྱེར་སྤྱི་ཁྱབ་པ་ལྕམ་སྐུ་ཨན་ནེ་སི་ཕི་མཆོག་ Mrs. Anne-Sophie HOCQUET DE LAJARTRE དང་གྲོང་ཁྱེར་སྤྱི་ཁྱབ་གཞོན་པ་མཆོག་བཅས་ཕེབས་ཡོད་པ་མ་ཟད། སྐུ་ཚབ་དོན་ཁང་གི་དྲུང་ཆེ་ཚེ་རིང་དོན་གྲུབ་ལགས། ཕ་རན་སི་བོད་རིགས་མཐུན་ཚོགས་ཀྱི་ཚོགས་གཙོ་ལྕམ་སྐུ་མར་སེ་ལི་རོ་སི་ལགས་ Ms. Marcelle Roux ཀྱང་ཕེབས་ཡོད། མཛད་སྒོ་ཚོགས་ཡུལ་ Boites a Culture ཞེས་སྤྱི་པའི་ཚོགས་ཁང་ཞིག་ནང་ཡིན་འདུག གྲོང་ཚོ་ཆུང་ཆུང་འདི་བཞིན་ཕ་རན་སིའི་མེ་ནི་རྒྱུག་ཆུའི་ Maine River འགྲམ་དུ་ཨེང་གར་སི་རྫོང་དུ་ Angers རྟེན་གཞེས་བྱས་ཡོད། སྐབས་དེར་གྲོང་ཁྱེར་སྤྱི་ཁྱབ་པ་མཆོག་གིས་གསུང་བཤད་ནང་ལས་རིམ་དེ་བརྒྱུད་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྒྱབ་སྐྱོར་ཞུ༌རྒྱུ་ནི་བོད་མི་ཚོར་ཐོབ་ཐང་མ་སྤྲད་པའི་གཞི་རྩའི་མང་གཙོ་དང་འགྲོ་བ་མིའི་ཐོབ་ཐང་གི་རིན་ཐང་ལ་གཞི་བཅོལ་བ་ཞིག་ཆགས་ཡོད། ཅེས་གསུངས། གཞན་ཡང་སྐབས་དེར་དྲུང་ཆེས་སྐུ་ཚབ་དོན་ཁང་གི་ཚབ་ཞུས་ཏེ་གསུང་བཤད་གནང་བའི་ནང་གྲོང་སྡེེ་སྤྱི་ཁྱབ་པ་མཆོག་ལ་ཐུགས་རྗེ་ཆེ་ཞུས་པ་དང་སྦྲགས། འབྲེལ་ཡོད་གྲོང་ཚོའི་ལས་ཁུངས་ཀྱི་རྒྱབ་སྐྱོར་གནང་མཁན་ཚང་མར་བསྔགས་བརྗོད་དང་བཀའ་དྲིན་རྗེས་དྲན་ཞུས་ཡོད། ཕྱོགས་མཚུངས་ཁོང་ནས་དེང་སྐས་བོད་ནང་བོད་མི་ ༥༡ གིས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་བཏང་སྟེ་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་འབོད་ཚིག་སྒྲོག་བཞིན་དུ་རང་ལུས་མེར་སྲེག་བཏང་བའི་ཛ་དྲག་གནས་སྟངས་སོགས་ངོ་སྤྲོད་གནང་ཡོད། ད་བར་ཕ་རན་སིའི་གྲོང་ཚོ་ཁག་འདྲ་མིན་ནས་དྭངས་བླང་ཐོག་ བོད་ནང་གི་གྲོང་ཚོ་ཆུང་ཆུང་  ༤༩ ཙམ་ལ་རོགས་རམ་གཟིགས་རྟོགས་གནང་བཞིན་ཡོད། ཐེངས་འདིའི་བོད་ཀྱི་གྲོང་ཚོ་ཐེངས་ ༥༠ དེ་ཆགས་ཡོད་པ་བཅས།།

.