༢༠༡༢ ཟླ་ ༩ ཚེས་ ༡༡ རེས་གཟའ་ལྷག་པ།
༄༅། །འདི་གར་འབྲེལ་ཡོད་ལས་ཁུངས་ནས་བཏང་གནས་ནང་འཁོད་དོན། བྱང་ཕྱོགས་བོད་མིའི་ས་གནས་ཁྲིམས་ཞིབ་པ་བསྟན་འཛིན་ལྷུན་གྲུབ་ལགས་ཀྱིས་ཕྱི་ལོ་ ༢༠༡༢ ཟླ་ ༩ ཚེས་ ༥ སྔ་དྲོ་ཚོུད་ ༡༠ པའི་ཐོག་ཀུ་ལུ་དཔལ་རབ་གླིང་བོད་མིའི་གཞིས་ཆགས་ཀྱི་སྐབས་དྲུག་པའི་ས་གནས་འཐུས་ཚོགས་ཀྱི་ཚོགས་མི་བཅུ་གསུམ་དང༌། ཚོགས་གཙོ། ཚོགས་གཞོན་བཅས་ཀྱི་ལས་ཁུར་དམ་བཅའ་འབུལ་བཞེས་དང། ཟླ་ ༩ ཚེས་ ༦ ཉིན་རྒྱབ་ཚོུད་ ༢ པའི་ཐོག་ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་ཀྱི་སྐབས་བཞི་པའི་ས་གནས་འཐུས་ཚོགས་ཀྱི་ཚོགས་མི་བརྒྱད་དང༌། ཚོགས་གཙོ། ཚོགས་གཞོན་བཅས་ཀྱི་དམ་བཅའ་འབུལ་བཞེས་ལེགས་གྲུབ་བྱུང་ཡོད་པ་དང་།
དེ་བཞིན་དུ་ཕྱི་ཚེས་ ༧ ཉིན་གྱི་སྔ་དྲོ་ཚོུད་ ༩ པའི་ཐོག་ཌལ་ཧོར་ཕུན་ཚོགས་གླིང་མི་མང་ ༡༢༨ ཙམ་དང་། ཉིན་རྒྱབ་ཚོུད་ ༣།༣༠ ཐོག་ཌལ་ཧོར་ཕུན་ཚོགས་གླིང་གཞིས་ཆགས་སུ་ཡོད་པའི་གཏན་འཇགས་སློབ་གྲྭའི་དགེ་ལས་སློབ་ཕྲུག་ ༨༤ བཅས་སོ་སོར་བཙན་བྱོལ་བོད་མིའི་མང་གཙོའི་འཕེལ་རིམ་དང༌། བཅའ་ཁྲིམས་ལེའུ་དྲུག་པ། ཁྲིམས་ཞིབ་ཁང་གི་ཁྲིམས་ཡིག་ཁག ཉམ་ཐག་ཚོར་ཁྲིམས་ལུགས་ཀྱི་རོགས་སྐྱོར་ལ་དམིགས་པའི་ཁ་མཆུའི་བྱ་རིམ་ས་གནས་སུ་གནང་རྒྱུའི་ཆ་རྐྱེན་ཡོད་པའི་སྐོར་ཆེས་མཐོའི་ཁྲིམས་ཞིབ་ཁང་གི་བཀོད་ཁྱབ་བཅས་ངོ་སྤྲོད་བྱས་ཏེ། བཙན་བྱོལ་བོད་མིའི་ཁྲིམས་ལུགས་སྐོར་གོ་རྟོགས་སྤེལ་ཡོད་ཅིང་། ཌལ་ཧོར་ས་གནས་འགོ་འཛིན་དང་། གཏན་སློབ་བོད་རིགས་སློབ་སྤྱི་སོགས་ས་གནས་ཀྱི་གནད་ཡོད་ལས་སྣེ་མི་ཉུང་བ་ཞིག་ཀྱང་ཁྲིམས་ལུགས་གོ་རྟོགས་སྤེལ་བའི་ལས་འགུལ་དུ་མཉམ་ཞུགས་གནང་འདུག་པ་བཅས།།
