༢༠༡༢ ཟླ་ ༩ ཚེས་ ༡ རེས་གཟའ་སྤེན་པ།
༄༅། །འདི་གར་ཏི་ཛུ་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཉེ་ཆར་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་བློ་བཟང་སྐལ་བཟང་ལགས་དང་མི་སྐྱ་དམ་ཆོས་ལགས་གཉིས་ཀྱིས་བོད་ཀྱི་རྩ་དོན་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་གནས་ཚུན་ཐོན་སྟབས། ཏི་ཛུ་དར་རྒྱས་གླིང་བོད་མིའི་གཞིས་ཆགས་སུ་ཕྱི་ལོ་ ༢༠༡༢ ཟླ་ ༨ ཚེས་ ༣༡ ཉིན་སྤྱིར་རྒྱལ་གཅེས་པ་ཁོང་རྣམ་པ་གཉིས་ཀྱིས་གཙོས་ད་བར་བོད་བསྟན་སྲིད་མི་རིགས་དང་། རང་དབང་གི་དོན་དུ་ལུས་སྲོག་ལོངས་སྤྱོད་བློས་གཏོང་གནང་མཁན་གཞིས་བཞུགས་རྒྱལ་གཅེས་པ་ཕོ་མོ་ ༥༡ འདས་གསོན་ཡོངས་ལ་གདུང་སེམས་མཉམ་སྐྱེའི་མྱ་ངན་རྗེས་དྲན་ཞུ་སླད་དེ་ཉིན་ཕྱི་དྲོ་ཆུ་ཚོད་ ༥།༣༠ ནས་ཆུ་ཚོད་གཅིག་རིང་ལྷ་དགོན་བྱང་ཆུབ་ཆོས་གླིང་དགོན་པའི་དབུ་འཛིན་རྫོགས་ཆེན་དགའ་ནོར་རིན་པོ་ཆེ་མཆོག་དབུ་བཞུགས་ཐོག་བླ་སྤྲུལ་དགེ་འདུན་རྣམ་པ་དང། ས་གནས་ཀྱི་ལས་ཀྱི་སྣེ་མོ་བ་རྣམ་པ། གཞིས་མཉམ་གཉིས་ཀྱི་ལས་བྱེད་པ་རྣམ་པ། མི་མང་བཅས་མཉམ་འཛོམས་ཀྱིས་ཐོག་མར་ས་གནས་འགོ་འཛིན་གྱིས་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་། དེ་བཞིན་བོད་བསྟན་སྲིད་མི་རིགས་ཀྱི་ཆེད་རང་སྲོག་བློས་གཏོང་གནང་མཁན་ཡོངས་ཀྱི་ཆེད་མར་མེ་བརྒྱ་ཚར་འབུལ་ཤོམ་དང་འབྲེལ་སྨོན་ལམ་གསུང་འདོན་གནང་ཡོད་པ་བཅས།།