༢༠༡༢ ཟླ་ ༨ ཚེས་ ༢༤ རེས་གཟའ་པ་སངས།
༄༅། །དེ་སྔོན་ཕྱི་ཟླ་བདུན་པའི་ནང་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཁང་དང་བོད་མི་མང་སྤྱི་འཐུས་ལྷན་ཚོགས་ནས་གོ་སྒྲིག་ཞུས་ཐོག་ཨོ་སི་ཊོ་ལི་ཡའི་གྲོས་ཚོགས་གོང་མའི་སྐུ་ཚབ་གཉིས་རྡ་སར་ཕེབས་ཡོད་ཁོངས་ནས་ལྕམ་སྐུ་ལི་ཛ་སིང་ལགས་ཀྱིས་ཨོ་སི་ཊོ་ལི་ཡའི་གྲོས་ཚོགས་གོང་མའི་ནང་བོད་དོན་གླེང་སློང་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར། ཕྱི་ལོ་ ༢༠༡༢ ཟླ་ ༨ ཚེས་ ༢༢ ཉིན་ལྕམ་སྐུ་ལི་ཛ་སིང་ལགས་ཀྱིས་ཨོ་སི་ཊོ་ལི་ཡའི་གྲོས་ཚོགས་གོང་མའི་ནང་བོད་དོན་གླེང་སློང་གནང་སྟེ་གསུང་དོན། ད་བར་བོད་ནང་གི་བོད་མི་ ༤༩ ནས་རྒྱ་ནག་གཞུང་གི་བོད་ཐོག་བཟུང་བའི་མཁྲེགས་འཛིན་ཅན་གྱི་སྲིད་བྱུས་ལ་ངོ་རྒོལ་ཆེད་རང་ལུས་མེར་སྲེག་བཏང་ཡོད། ད་ལྟའི་བོད་དེ་བཞིན་ཛ་དྲག་གནས་སྟངས་སུ་གྱུར་ཡོད། རྒྱ་ནག་གཞུང་ནས་འཆར་གཞི་ལྡན་པའི་ཐོག་ནས་བོད་མིའི་ཆོས་དང་རིག་གཞུང་རྩ་མེད་བཏང་དང་གཏོང་མུས་ཡིན། རྒྱ་ནག་ནས་རྒྱ་མི་ཁྱོན་ཆེ་བོད་དུ་གནས་སྤོ་བྱས་དང་བྱེད་མུས་ཡིན་པ་མ་ཟད། དམག་དཔུང་བོར་ཆེན་བོད་ནང་འགྲེམས་འཇོག་བྱས་ཏེ་བོད་མིར་ཚད་ལས་བརྒལ་བའི་དྲག་གནོན་བྱེད་བཞིན་ཡོད། སྤྱིར་བཏང་ཨོ་སི་ཊོ་ལི་ཡའི་གཞུང་ཕྱོགས་ནས་བོད་རང་སྐྱོང་ལྗོངས་ཟེར་བ་རྒྱ་གཞུང་ལ་བདག་དབང་ཡོད་སྐོར་ངོས་འཛིན་བྱེད་ཀྱི་ཡོད་ཀྱང་། བོད་མི་རྣམས་ཀྱིས་རྩོད་བཞིན་པའི་སྨྲ་བརྗོད་དང་རིག་གཞུང་གཅེས་འཛིན་གྱི་རང་དབང་སོགས་ནི་འཛམ་གླིང་འདིའི་ཐོག་མི་སུ་འདྲ་ཞིག་ཡིན་རུང་རྩོད་ཆོག་པའི་ཐོབ་ཐང་ཡོད། སྤྱིར་བཏང་བཙན་བྱོལ་དུ་ཡོད་པའི་བོད་མི་རྣམས་ཀྱིས་རང་གི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག མི་རིགས་ཀྱི་ངོ་བོ་རྣམས་མི་ཉམས་གོང་འཕེལ་གནང་བཞིན་ཡོད་པ་ལྟར། བོད་ནང་གི་བོད་མི་རྣམས་ལ་ཡང་དེ་ལྟར་གནང་ཆོག་པ་དགོས་ཀྱི་ཡོད། དེ་བཞིན་ཨོ་སི་ཊོ་ལི་ཡའི་གཞུང་ཕྱོགས་ནས་རྒྱ་ནག་གཞུང་དང་ལྷན་འགྲོ་བ་མིའི་ཐོབ་ཐང་ཐོག་གྲོས་མོལ་བྱེད་སྐབས། བོད་དོན་སྐོར་གླེང་སློང་གནང་བར་བསྔགས་བརྗོད་ཞུ་རྒྱུ་ཡིན། ཉེ་ཆར་རྒྱ་ནག་གཞུང་ནས་བོད་དེ་ཕྱི་ཕྱོགས་སུ་སྒོ་མོ་བརྒྱབ་ཡོད་པ་མ་ཟད། ཨོ་སི་ཊོ་ལི་ཡའི་སྐུ་ཚབ་ཁག་གཅིག་བོད་ནང་བསྐྱོད་ཆོག་པའི་རེ་སྐུལ་ཞུས་པར་རྒྱ་གཞུང་ནས་ཁས་ལེན་བྱས་མེད། དེར་བརྟེན་ཨོ་སི་ཊོ་ལི་ཡ་དང་འཛམ་གླིང་ཡོངས་ནས་བོད་མིའི་བདེན་དོན་འཐབ་རྩོད་ལ་རྒྱབ་སྐྱོར་གནང་སྟེ་རྒྱ་ནག་གཞུང་ནས་དབང་ཆ་བཟུང་བ་དང་ཆབས་ཅིག་མི་རིགས་ཚང་མར་ཐོབ་ཐང་འདྲ་མཉམ་དགོས་པའི་ར་སྤྲོད་ཐུབ་པ་བཟོ་དགོས་པའི་རེ་འདུན་ཞུས་འདུག་པ་བཅས། །