༢༠༡༢ ཟླ་ ༨ ཚེས་ ༡༣ རེས་གཟའ་ཟླ་བ།
༅༅། །ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་རྡ་ས་གངས་སྐྱིད་ཆེས་མཐོའི་ཁྲིམས་ཞིབ་ཁང་གི་ཡང་སྟེང་མཇལ་འཕྲད་ཁང་དུ་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་མདུན་དུ་ལ་དྭགས་བོད་མིའི་ས་གནས་ཁྲིམས་ཞིབ་པ་བསྟན་འཛིན་མཁྱེན་རབ་ལགས་དང་། ཤར་ཕྱོགས་བོད་མིའི་ས་གནས་ཁྲིམས་ཞིབ་པ་བློ་བཟང་ཚེ་ཐར་ལགས་རྣམ་གཉིས་ཀྱིས་ལས་འཁུར་དམ་འབུལ་ཞུས་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང་། སྤྱི་ཁྱབ་ཁྲིམས་དྲུང་བཀྲ་ཤིས་རྒྱ་མཚོ་ལགས། ཟུང་དྲུང་ཚེས་གསུམ་ལྷ་མོ་ལགས་ཀྱིས་དབུས་ཁྲིམས་ལུགས་རིག་པ་བ་དང་འབྲེལ་ཡོད་ལས་བྱེད་རྣམས་ལྷན་འཛོམས་ཐོག་ས་གནས་ཁྲིམས་ཞིབ་པ་བསྟན་འཛིན་མཁྱེན་རབ་ལགས་དང་བློ་བཟང་ཚེ་ཐར་ལགས་རྣམ་གཉིས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་གུས་ཕྱག་དང་མཇལ་དར་སྒྲོན་འབུལ་ཞུས་ཏེ་ཁྲིམས་ཞིབ་ཆེ་བའི་མདུན་དུ་ས་གནས་ཁྲིམས་ཞིབ་པའི་ལས་འཁུར་དམ་བཅའ་ཕུལ་གྲུབ་མཚམས་རྟེན་འབྲེལ་གྱི་གསོལ་ཇ་འབྲས་སིལ་ཕུལ། དེ་ནས་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་འཚམས་འདྲིའི་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ཚོར་འཚམས་འདྲིའི་བཀྲིས་བདེ་ལེགས་ཞུ་རྒྱུ་དང་།
ཆེས་མཐོའི་ཁྲིམས་ཞིབ་ཁང་གི་ཁྱབ་ཁོངས་བྱང་ཕྱོགས་དང་ལྷོ་ཕྱོགས་ས་གནས་ཁྲིམས་ཞིབ་པ་ཕྱི་ལོ་ ༢༠༠༡ ཙམ་ནས་བཙུགས་ཏེ་ཁྲིམས་ཞིབ་པ་རིམ་པ་འཕོ་འགྱུར་ཕྱིན་ཡོད། སྔོན་མ་ནས་ལས་ཁུངས་དང་མཐུན་རྐྱེན་ཆ་ཚང་ཡོད་བཞིན་པ་ཞིག་ཡིན། འོན་ཀྱང་ད་རེས་རྣམ་པ་གཉིས་ཀྱིས་ལ་དྭགས་དང་ཤར་ཕྱོགས་སུ་གཞི་ནས་གསར་འཛུགས་གནང་དགོས་སྟབས། ང་ཚོ་བཙན་བྱོལ་སྒྲིག་འཛུགས་ལ་གཞིགས་ཏེ་དཔལ་འབྱོར་དང་ས་གནས་མཐུན་རྐྱེན་སོགས་ལ་འདོད་པ་ཁེངས་པ་ཞིག་ཡོང་རྒྱུ་ཁག་པོ་ཡིན་པར་བརྟེན་ཅུང་ཟད་དཀའ་ངལ་ཡོད། དེ་རྩིས་དཀའ་ངལ་ལ་གདོང་ལེན་གྱིས་འབད་བརྩོན་གནང་རོགས་ཞུ་རྒྱུ་དང་། ལས་དོན་འདི་སྤྱིར་བཏང་འཛིན་སྐྱོང་དང་མི་འདྲ་བའི་ཁྲིམས་ལུགས་དབང་འཛིན་གྱི་མང་ཚོགས་ཀྱི་ཁ་མཆུ་ཐག་གཅོད་སོགས་ལས་འགན་ལྗིད་པོ་ཡིན། དེར་བརྟེན་སྔོན་ཚུད་ནས་མྱོང་གོམས་དང་འབྲེལ་བའི་ཐུགས་འཁུར་ཆེ་བཞེས་གནང་རོགས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་ཆེས་མཐོའི་ཁྲིམས་ཞིབ་ཁང་གི་ལས་བྱེད་རྣམས་ནས་རིམ་བཞིན་གསར་དུ་དམ་འབུལ་ཞུས་པའི་ས་གནས་ཁྲིམས་ཞིབ་རྣམ་པ་གཉིས་ལ་རྟེན་འབྱུང་གི་མཇལ་དར་ཕུལ་ཏེ་མཛད་སྒོ་གྲོལ་བ་བཅས།།
