༢༠༡༢ ཟླ་ ༨ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༣༡ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་འཚམས་གཟིགས་གནང་བ་དང་ཆབས་ཅིག་ཕྱེད་ཡོལ་སེ་ར་བླ་སྤྱིའི་འདུ་ཁང་ནང་སེ་ར་བྱེས་སྨད་གཉིས་ཀྱི་མཁན་བླ་འདུས་དམངས་ཡོངས་དང་དགེ་འདུན་པ་རྣམས་ལ་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ལྷན་རྒྱས་ལ་ངས་བཀའ་ཤག་སྐབས་བཅུ་བཞི་པའི་ཚབ་ཞུས་ཏེ་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། དེ་སྔོན་༸གོང་ས་མཆོག་གིས་ཆབ་སྲིད་ཀྱི་སྐུ་དབང་གསོལ་རས་སྩོལ་སྐབས་ང་ཚོ་ཚང་མར་སེམས་འཚབ་ཤུགས་ཆེན་པོ་བྱུང་ཡོད། ད་ཆ་མང་ཚོགས་རྣམས་ལྷིང་འཇགས་གནས་ཡོད་པ་དེས་བོད་མིའི་ཆིག་སྒྲིལ་གྱི་ངོ་བོ་མཚོན་བཞིན་ཡོད་སྟབས། བོད་དང་རྒྱ་ནག རྒྱལ་སྤྱི་ནང་བརྡ་ལན་གསལ་པོ་ཞིག་སྤྲད་ཡོད།
༡༽༸གོང་ས་མཆོག་གིས་ཆབ་སྲིད་ཀྱི་སྐུ་དབང་གསོལ་རས་སྩལ་བ་དེ་ང་ཚོས་མུ་མཐུད་ནས་མཇུག་སྐྱོང་ཞུས་པ་མ་ཟད། བོད་ཀྱི་བདེ་དོན་མུ་མཐུད་རྩོད་བཞིན་ཡོད་པའི་བརྡ་ལན་གསལ་པོ་ཞིག་རྒྱ་ནག་གཞུང་ལ་སྤྲད་ཡོད། དེ་ནི་ང་ཚོའི་གཟི་བརྗིད་ཡིན།
༢༽བོད་ནང་གི་བོད་མི་ཚོས་༸གོང་ས་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་མཛད་རྗེས་བཙན་བྱོལ་དུ་གནས་པའི་བོད་མི་རྣམས་ནས་གང་འདྲ་བྱས་ཡོང་ངམ་སྙམ་པའི་བློ་འཚབ་གནང་སྐབས། ང་ཚོ་འདི་གར་ལྷིང་འཇགས་ཐོག་གནས་ཡོད་པར་བརྟེན། ཁོང་རྣམ་པས་ང་ཚོས་ལས་དོན་ཚགས་ཚུད་གནང་ས་རེད་སྙམ་པའི་སྙིང་སྟོབས་དང་སེམས་ཤུགས་ཡོད་པ་རྣམས་གོང་ནས་གོང་དུ་འཕེལ་རྒྱུར་བརྡ་ལན་གསལ་པོ་ཞིག་ཕུལ་ཐུབ་ཡོད་སྙམ་གྱི་ཡོད།
༣༽རྒྱལ་སྤྱིའི་ཐོག་ལ་བོད་མིའི་སྒྲིག་འཛུགས་འདི་བཞིན་མང་གཙོའི་ལམ་ལུགས་སུ་སྐྱོད་ཀྱི་ཡོད་སྐོར་ཡོངས་གྲགས་བརྗོད་བཞིན་པ་དེར་རྒྱལ་སྤྱི་ནས་དཔྱད་ཞིབ་བྱེད་སྐབས། བཙན་བྱོལ་དུ་བོད་མི་ཉུང་ཤས་ཤིག་ལས་མེད་ཀྱང་མང་གཙོའི་འགྲོ་ལུགས་འགྲོ་སྟངས་དེ་ཚད་ལོངས་བ་ཞིག་ཡིན་པ་བརྡ་ལན་སྤྲོད་ཐུབ་ཡོད།
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོ་གསོལ་རས་སྩལ་བ་ལྟར། ང་ཚོས་ལག་བསྟར་ཞུས་དང་ཞུ་མུས་ཡིན། ཕྱོགས་མཚུངས་༸གོང་ས་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་གསོལ་རས་སྩལ་རྗེས་ཀྱང་མགོན་པོ་གང་ཉིད་མཆོག་གི་མཛད་འཕྲིན་རྒྱས་བཞིན་ཡོད་སྟབས། འཛམ་གླིང་སྤྱི་ཡོངས་ནས་༸གོང་ས་མཆོག་ལ་ཆེ་མཐོང་དང་གུས་བཀུར་ཞུ་མཁན་ཇེ་མང་དུ་འགྲོ་བཞིན་ཡོད། ཅེས་སོགས་ཀྱི་གསུང་བཤད་གནང་བ་མ་ཟད། བཀའ་ཤག་སྐབས་བཅུ་བཞི་པའི་ལྟ་གྲུབ་གསུམ་དང་བོད་རྒྱ་ཞི་འགྲིགས་ཡོང་ཐབས་སྐོར་ཡང་གསུང་བཤད་གནང་ཡོད་པ་བཅས། །