༢༠༡༢ ཟླ་ ༨ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༨ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བཀའ་བློན་ཁྲི་པ་བློ་བཟང་སེང་གེ་མཆོག་གིས་དབུས་ཕྱག་སྦྲེལ་བཀའ་བློན་རྣམས་ལྷན་བཞུགས་ཐོག་སྐབས་བཅུ་བཞིའི་པའི་བཀའ་ཤག་གི་ཐུགས་འགན་བཞེས་ཏེ་ལོ་འཁོར་གཅིག་འཁོར་བ་དང་འབྲེལ་གསར་འགོད་གསལ་བསྒྲགས་བསྐྱངས་པ།
དེ་ཉིན་སྔ་དྲོ་ཆུ་ཚོད་ ༡༡ ཐོག་བཀའ་ཁྲི་བློ་བཟང་སེང་གེ་མཆོག་དང་། ཆོས་རིག་བཀའ་བློན་པདྨ་ཆོས་འབྱོར་མཆོག དཔལ་འབྱོར་བཀའ་བློན་ཚེ་རིང་དོན་གྲུབ་མཆོག ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག ཕྱི་དྲིལ་དྲུང་ཆེ་ཨ་ཏི་ཤ་བསྟན་འཛིན་ཕུན་ཚོགས་ལགས། དྲིལ་བསྒྲགས་དྲུང་ཆེ་བཀྲ་ཤིས་ལགས། ཕྱི་ནང་གསར་འགོད་པ་བཅས་ཁྱོན་མི་གྲངས་ ༤༠ བརྒལ་བ་ལྷན་འཛོམས་ཐོག་དྲིལ་བསྒྲགས་དྲུང་འཕར་བཀྲིས་ཕུན་ཚོགས་ལགས་ཀྱིས་ཐོག་མར་ངོ་སྤྲོད་གསུང་བཤད་གནང་རྗེས་བཀའ་ཁྲི་མཆོག་གིས་གསུང་བཤད་གནང་བའི་སྙིང་དོན་ནི། བོད་ཕྱི་ནང་གཉིས་ཀར་ཡོད་པའི་བོད་མི་རྣམ་པ་དང་བོད་དོན་རྒྱབ་སྐྱོར་བ་རྣམས་ལ་འཚམས་འདྲི་ཞུས་རྗེས་བཀའ་ཤག་སྐབས་བཅུ་བཞི་པའི་ལོ་འཁོར་གཅིག་རིང་འཐུས་ཤོར་ཕྱིན་མེད་སྐོར་དང་། དེ་བཞིན་ཕྱི་རྒྱལ་ལུང་པ་ཁག་དང་གཞིས་ཆགས་ཁག་ཏུ་ཕྱིན་པའི་ནང་ལྷིང་འཇགས་པོ་མི་མང་གི་མང་གཙོའི་འགྲོ་ལུགས་དེར་ཡིད་ཆེས་ཡོད་པའི་ཐོག་གཙོ་བོ་༸གོང་ས་མཆོག་གིས་ཐུགས་རྗེ་བཀའ་དྲིན་དང་མི་རབས་རྒན་པ་ཚོས་དཀའ་ངལ་བརྒྱབ་པའི་བཀའ་དྲིན་དང་། བཀའ་ཤག་བཀའ་བློན་རྣམ་པ་འཆམ་མཐུན་མཉམ་རུབ་ཐོག་འབད་པ་ཧུར་སྐྱེད་གནང་བཞིན་ཡོད་པ། དེ་བཞིན་བོད་ནང་རང་ལུས་མེར་སྲེག་མཚོན་པའི་གནས་སྟངས་ཛ་དྲག་ཆགས་ཡོད་པར་སོང་རྒྱལ་སྤྱིའི་སྡིངས་ཆའི་ཐོག་རྒྱབ་སྐྱོར་འབད་བརྩོན་གང་ཐུབ་བྱེད་རྒྱུ་ཡིན་སོགས་ཀྱི་གསར་འགོད་པའི་གསལ་བསྒྲགས་བོད་སྐད་དང་དབྱིན་སྐད་གཉིས་ནང་གནང་རྗེས་གསར་འགོད་པའི་དྲི་བ་ཁག་ལ་ལན་འདེབས་བཅས་གནང་སྟེ་དྲུང་འཕར་བཀྲིས་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུས་ཏེ་གསར་འགོད་གསལ་བསྒྲགས་གྲོལ་ཡོད། གསར་འགོད་གསལ་བསྒྲགས་རྒྱས་པ་ལོགས་སུ་འདོན་སྤེལ་ཞུས་པར་གཟིགས་པ་ཞུ་རྒྱུ་བཅས།།
