༢༠༡༢ ཟླ་ ༨ ཚེས་ ༨ རེས་གཟའ་ལྷག་པ།
༄༅། །ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ནང་སྲིད་ལས་ཁུངས་ཀྱི་ལོ་གཅིག་གི་ལས་དོན་ངོ་སྤྲོད་གནང་དོན། མི་མང་གིས་ཐད་ཀར་འོས་འདེམས་བྱས་པའི་དཔལ་ལྡན་བཀའ་བློན་ཁྲི་པ་མཆོག་གིས་དབུ་ཁྲིད་པའི་འོག་ད་ལྟའི་ལས་ཐོག་བཀའ་ཤག་འདིས་ལས་འཁུར་ཞུས་ཏེ་ལོ་གཅིག་ཧྲིལ་པོ་འཁོར་ཡོད། དུས་ཚོད་འདིའི་རིང་ངས་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་ཚབ་ཞུས་ཏེ་གཞིས་བྱེས་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་བཞིན་ང་ཚོ་བཙན་བྱོལ་ནང་ཡོད་པའི་སྒྲིག་འཛུགས་འདི་ཆབ་སྲིད་དང་ལོ་རྒྱུས་ལྡན་པའི་སྒྲིག་འཛུགས་ཤིག་ཡིན། ལྷག་པར་ད་ལྟའི་དུས་ཚོད་ལ་རྒྱལ་ཁབ་གཞན་ཞིག་གི་གཞུང་ལས་འགན་ཆེ་བ་ཞིག་ཡོད་པར་ངོས་འཛིན་ཞུ་གི་ཡོད། དེར་བརྟེན་རང་བཞིན་གྱི་སྒྲིག་འཛུགས་འདིའི་ཁྱབ་ཁོངས་ལ་ཡོད་པའི་ལས་ཁུངས་གང་འདྲ་ཞིག་ཡིན་ནའང་ལས་འགན་འཁུར་བླང་རྒྱུ་ཧ་ཅང་གལ་ཆེན་པོ་ཆགས་ཡོད་པར་ངོས་འཛིན་ཞུ་གི་ཡོད། ནང་སྲིད་ལྷན་ཁང་ལྟ་བུ་ཡིན་ན། བཙན་བྱོལ་ནང་བོད་མི་ཐོག་མ་ཕྱི་ལོ་ ༡༩༥༩ ལོར་བཙན་བྱོལ་དུ་འབྱོར་བ་ནས་བཟུང་ང་ཚོའི་ཆོས་སྲིད་གཉིས་ཀྱི་དབུ་ཁྲིད། བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། རྒྱ་གར་གཞུང་དང། དེ་བཞིན་གཞུང་འབྲེལ་མ་ཡིན་པའི་བོད་དོན་དང་བོད་མིར་སྐབས་དེར་རོགས་སྐྱོར་གནང་མཁན་སྡེ་ཚན་མང་དག་ཅིག་ལ་འབྲེལ་མཐུད་གནང་སྟེ། བོད་མི་རྣམས་བཙན་བྱོལ་ནང་གནས་པའི་རིང་རང་གི་ཆོས་དང་རིག་གཞུང་མི་ཉམས་གོང་འཕེལ་གནང་རྒྱུ་དང། ལྷག་པར་བོད་པའམ་བོད་རིགས། བོད་མི་ཟེར་བའི་ངོ་བོ་མ་བརླག་པ་བྱ་རྒྱུ་ཧ་ཅང་གལ་ཆེན་ཞིག་ཏུ་ངོས་འཛིན་བྱས་ཡོད།
མི་འབོར་ས་ཡ་མང་པོ་ཡོད་པའི་རྒྱ་གར་རྒྱལ་ཁབ་ཆེན་པོ་འདིའི་ནང་ཡིན་ནའང་བོད་མི་ཉུང་ཉུང་ཡོད་པ་དེ་དག་སྲན་མ་ལྟར་མ་ཐོར་བའི་ཆེད། ༸གོང་ས་མཆོག་གིས་རྒྱ་གར་དབུས་གཞུང་དང་ལྷན་བཀའ་བསྡུར་མཛད་དེ་རྒྱ་གར་གཞུང་དང་མངའ་སྡེ་སོ་སོའི་གཞུང་གིས་རྒྱབ་སྐྱོར་ལ་བརྟེན་ནས་ད་ཡོད་བོད་པའི་གཞིས་ཆགས་ཡོད་པ་འདི་དག་ཐོག་མ་འགོ་འཛུགས་རྒྱུའི་དགོངས་པ་བཞེས་པ་བཞིན་རིམ་པས་ད་ལྟ་རྒྱ་བལ་འབྲུག་གསུམ་གྱི་ནང་བོད་པ་རང་གི་ཆེད་བོད་པའི་གཞིས་ཆགས་ཡོད་པ་དེའི་ནང་འཚོ་ཐབས་དང། ཆོས་ཀྱི་ཐོག་ནས་ཆོས་སྡེ་ཡོད་པ། སློབ་སྦྱོང་བྱེད་རྒྱུའི་སློབ་གྲྭ་ཡང་ཡོད་པ་གང་ལྟར་ཆ་ཚང་སྒྲུབ་པའི་སྡེ་ཚན་དེ་དག་སྐབས་དེ་དུས་ཀྱི་མཛད་གཙོ་རྣམས་ཀྱིས་རིམ་བཞིན་འགན་འཁུར་བཞེས་ཏེ་བཙུགས་པ་ཞིག་རེད། ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དོན་གྱིས་གཙོས་སྤྱི་ཡོངས་ཀྱི་ཐོག་དགོངས་པ་ཆེ་བཞེས་ཀྱིས་མགོན་པོ་གང་ཉིད་མཆོག་གིས་ཆབ་སྲིད་ཀྱི་སྐུ་དབང་བཞེས་མ་དགོས་པའི་དགོངས་གཞི་གཞིར་བཟུང་བཅའ་ཁྲིམས་བསྐྱར་བཅོས་བྱས་རྗེས། ད་ལྟའི་བཀའ་ཤག་དེ་ཐོག་མ་ཆགས་ཡོད་པར་བརྟེན་ང་ཚོའི་ལས་འགན་ཆེ་ཤོས་གཅིག་ནི་སྔར་ལོ་ ༥༠ ལྷག་གི་རིང་བཙན་བྱོལ་ནང་དཀའ་ལས་མང་པོ་བརྒྱབ་སྟེ་སྒྲིག་འཛུགས་འདི་སྲ་བརྟན་བཟོས་གནང་ཡོད་པ་འདི་མི་ཉམས་གོང་འཕེལ་འགྲོ་རྒྱུ་དང། དེ་དག་མུ་མཐུད་གནས་ཐུབ་རྒྱུ། ནུས་ལྡན་ཞིག་ཡོང་ཐུབ་པ་བཟོ་རྒྱུ་དེ་ནང་སྲིད་ལྷན་ཁང་དང་ཐད་ཀར་འབྲེལ་བ་ཡོད་པ་ཞིག་ཆགས་ཡོད། རྣམ་པ་ཚོས་ཤེས་གསལ་རེད། རྒྱ་གར་དང། བལ་ཡུལ། འབྲུག་བཅས་རྒྱལ་ཁབ་གསུམ་ང་ཚོར་ཧ་ཅང་བཀའ་དྲིན་ཆེན་པོ་ཡིན། དེ་རིང་བརྒྱུད་ལམ་འདི་བརྒྱུད་ནས་རྒྱལ་ཁབ་དེ་དག་གི་གཞུང་མང་གཉིས་ལ་ཐུགས་རྗེ་ཆེ་ཞེས་ཞུ་རྒྱུ་ཡིན། རྒྱལ་ཁབ་གསུམ་པོ་དེའི་ནང་རྒྱ་ཁབ་སོ་སོའི་ཆབ་སྲིད་ཀྱི་གནས་སྟངས་ལ་གཞིགས་པའི་ང་ཚོ་བོད་མིའི་གནས་སྟངས་མི་འདྲ་བ་དང། དཀའ་ངལ་ཡིན་ནའང་གདོང་ལེན་བྱེད་རྒྱུའི་རིགས་མི་འདྲ་བ་ཞིག་ཆགས་ཡོད། ངས་དེ་རིང་འདིར་ཞིབ་ཚགས་ཤིག་ཞུ་མ་དགོས་པར་གང་ལྟར་ནང་སྲིད་ལས་ཁུངས་ནས་ང་རང་ཚོའི་གཞིས་ཆགས་སྲ་བརྟན་ཡོང་རྒྱུའི་ཆེད་གཙོ་བོ་ང་ཚོས་ལས་གཞི་མང་པོ་ཞིག་སྤེལ་བཞིན་པ་དེ་དག་གལ་ཆེར་རྩིས་པའི་ཐོག ལྷག་པར་རྒྱལ་ཁབ་སོ་སོའི་གཞུང་དང་མི་མང་མཉམ་མཐུན་སྒྲིལ་བྱེད་རྒྱུ་དེ་ང་ཚོས་ཧ་ཅང་གལ་ཆེན་པོ་རྩིས་ཀྱི་ཡོད། དེ་ཚོའི་ཐོག་ལོ་གཅིག་གི་ནང་གྲུབ་འབྲས་ཆེན་པོ་ཐོན་སོང་ཞེས་ངས་དེ་རིང་ཞུ་རྒྱུ་དམིགས་བསལ་མེད། འོན་ཀྱང་དབུས་སམ་ས་གནས་གང་རུང་ནས་དེ་དག་གལ་ཆེན་པོ་རྩིས་ཏེ་རྣམ་དཔྱོད་གསར་པ་ཞིག་གི་ཐོག་ནས་ང་ཚོས་གོམ་པ་སྤོ་རྒྱུར་འབད་བརྩོན་བྱེད་བཞིན་ཡོད་པར་མི་མང་ནས་རྒྱབ་སྐྱོར་དགོས་རྒྱུ་ཧ་ཅང་གལ་ཆེན་པོ་ཡིན།
རྒྱ་བལ་འབྲུག་གསུམ་གྱི་ནང་གནས་པའི་བོད་མི་ཚོའི་དཔལ་འབྱོར་གྱི་གནས་སྟངས་མི་འདྲ་བ་རེད། ཉམ་ཐག་དེ་དག་ད་དུང་ཡང་དངོས་གནས་དྲང་གནས་ཀྱི་ཉམ་ཐག་འདུག དེ་དག་ལ་ང་ཚོས་རོགས་སྐྱོར་ཙམ་མིན་པར་ཉམ་ཐག་དེ་དག་གི་ཉམ་ཐག་གི་གནས་སྟངས་ལས་གྲོལ་ཐུབ་པ་ཞིག་བྱེད་ཐུབ་པའི་ཐབས་ཤེས་ཇི་ཡོད་ཐོག་བསམ་ཞིབ་བྱེད་མུས་ཡིན། དེ་སྔ་ནས་བཟུང་ད་བར་གཞུང་ནས་གནང་བཞིན་ཡོད། རོགས་སྐྱོར་གནང་མཁན་དེ་དག་ལ་བལྟས་པ་ཡིན་ན་བཙན་བྱོལ་སྒྲིག་འཛུགས་ཤིག་གི་གནང་ཕྱོགས་དེ་དག་ལ་ཧ་ལས་པ་ཞིག་གནང་ཡོད་པར་ངོས་འཛིན་བྱེད་ཆོག་གི་འདུག དེར་བརྟེན་དེ་དག་གི་ཐོག་སྔར་ནས་བཙུགས་པའི་ལས་གཞི་རྣམས་ལ་ང་ཚོས་མུ་མཐུད་ལྟ་རྟོག་ཡག་པོ་ཞིག་ཡོང་ཐུབ་རྒྱུ་དང། དེ་མིན་སྔར་གྱི་ལས་གཞིས་དེ་དག་གློ་བུར་དུ་འགྱུར་བ་བཏང་མ་དགོས་པར་མུ་མཐུད་ཡག་པོ་གནས་རྒྱུ་དགོས་གལ་མཐོང་ཚེ་ང་ཚོས་ནུས་པ་ཆེ་རུ་གཏོང་རྒྱུ་དང་འགྱུར་བ་རིམ་བཞིན་གཏོང་དགོས་པ་མང་པོ་ཞིག་མཐོང་གི་འདུག ང་ཚོ་ནང་སྲིད་ལས་ཁུངས་ངོས་ནས་བཙན་བྱོལ་བོད་མི་སུ་རུང་དབྱེ་བ་མེད་པའི་ཐོག་ནས་གཟིགས་ཕྱོགས་གཅིག་མཚུངས་གནང་དང་གནང་མུས་ཡིན་ལ་ད་དུང་དེའི་ཐོག་མུ་མཐུད་ཤུགས་རྒྱག་བཞིན་ཡོད། གཞིས་ཆགས་ནང་རྒྱུན་རིང་གནས་པའི་བོད་མི་ཚོར་དཀའ་ངལ་དངོས་གནས་འདུག དེ་བཞིན་བོད་ནས་གསར་དུ་འབྱོར་མཁན་ལའང་དམིགས་བསལ་གྱི་དཀའ་ངལ་འདུག ཁོང་ཚོ་ཚང་མའི་དཀའ་ངལ་དེ་དག་ང་ཚོས་གཙང་མ་མེད་པ་བཟོ་ཐུབ་ཀྱི་རེད་ཅེས་ཞུས་ན་ངའི་ཁ་ཧམ་པ་ཆེ་དྲགས་ཀྱི་རེད། འོན་ཀྱང་ང་ཚོའི་སྒྲིག་འཛུགས་འདིའི་ངོས་ནས་ཁ་ཞེ་གཉིས་མེད་ཀྱིས་གང་ཐུབ་ཅི་ཐུབ་དཀའ་ངལ་སེལ་ཐབས་ཐོག་ད་བར་འབད་བརྩོན་བྱས་དང་བྱེད་མུས་ཡིན། ལོ་ལྔ་ཟིན་པའི་རྗེས་ཀྱང་རྣམ་ཚོའི་ངོས་ནས་བྱུང་ཡོད་ན་ཡོད་པ་དང་མེད་ན་མེད་པ་ཞིག་གཟིགས་རྒྱུ་ཡོད་པ་ཞིག་ཏན་ཏན་དགོས་ཀྱི་ཡོད་པར་ངོས་འཛིན་བྱེད་ཀྱི་ཡོད། དེ་རིང་བརྒྱུད་ལམ་འདིའི་ཐོག་ནས་ངས་མི་མང་ལའང་འབོད་སྐུལ་ཞུ་རྒྱུ་ཡོད།
གང་ཡོད་ཅེ་ན། ང་ཚོའི་སྒྲིག་འཛུགས་འདི་ཚགས་ཚུད་པོ་ཞིག་དགོས་ཀྱི་ཡོད་ན་ང་ཚོ་སྔར་ལྷག་མཐུན་ལམ་བྱེད་རྒྱུ་ཧ་ཅང་གལ་ཆེན་པོ་ཡིན། སྒྲིག་འཛུགས་དང་ལས་དོན་གྱི་ཐོག་ནས་མ་འགྲིག་པ་འདུག་ནའང་རེད། ས་གནས་ས་ཐོག་ཏུ་འགན་ཁུར་མཁན་དེ་ཚོའང་ལས་སླ་པོ་མ་རེད། ས་གནས་སོ་སོར་གདོང་ལེན་བྱེད་དགོས་པ་དང་དཀའ་ལས་མང་པོ་ཞིག་རྒྱག་དགོས་ཀྱི་ཡོད། ས་གནས་འགོ་འཛིན་དང་དེའི་ཁྱབ་ཁོངས་ལས་བྱེད་དེ་དག་གི་ལས་དོན་བྱེད་ཕྱོགས་ལ་བསྔགས་བརྗོད་ཞུ་གི་ཡོད། འོན་ཀྱང་མ་འགྲིག་པ་བྱུང་ཚེ་ཡིག་ངག་གང་གི་ཐོག་ནས་རུང་ཐད་ཀར་ནང་སྲིད་ལས་ཁུངས་སུ་འབྲེལ་བ་གནང་རོགས་ཞེས་ཞུ་རྒྱུ་ཡིན། གལ་ཏེ་དེ་ལྟར་གནང་ན་ང་རང་ཚོ་ཚགས་ཚུད་ཡོང་རྒྱུར་མཉམ་རུབ་དང་ཆིག་སྒྲིལ་ད་ལྟའི་བཀའ་ཤག་གི་ལྟ་གྲུབ་གསུམ་ཐོག་ནས་དོན་སྙིང་ལྡན་པའི་ཕན་པ་སྒྲུབ་ཐུབ་ཀྱི་རེད་བསམ་གྱི་འདུག མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ཕྲག་བརྟན་པ་དང། དེ་བཞིན་བོད་ནང་སྡུག་བསྔལ་མྱངས་དང་མྱོང་བཞིན་པའི་ང་ཚོའི་བོད་རིགས་རྣམས་ཀྱི་དཀའ་སྡུག་དེ་དག་ལས་གང་མགྱོགས་གྲོལ་ཐུབ་པ་དང་གཞིས་བྱེས་མཉམ་འཛོམས་གང་མྱུར་ཡོང་བའི་སྨོན་ལམ་དང་བཅས་ཐུགས་རྗེ་ཆེ། ཞེས་གསུངས་ཡོད།
