༢༠༡༢ ཟླ་ ༨ ཚེས་ ༩ རེས་གཟའ་ཕུར་བུ།

༄༅། །ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིའི་སྒྲིགས་འཛུགས་བཀའ་དྲུང་ཡིག་ཚང་དང་ཕྱི་དྲིལ་ལས་ཁུངས་ཀྱི་གསལ་བསྒྲགས་དགོངས་དོན་ལྟར། ཐའེ་ཝན་བོད་ཀྱི་སྐུ་ཚབ་དོན་ཁང་དང་། ཐེ་ཝན་ནང་གནས་་སྡོད་བོད་རིགས་ཚོགས་པ་མཐུན་མོང་ནས་ཕྱི་ཟླ་ ༨ ཚེས་ ༨ ཉིན་༸གོང་ས་མཆོག་གི་སྐུའི་བླ་གཟའི་དུས་ཚིགས་དང་། དཔལ་ལྡན་བཀའ་བློན་ཁྲི་པ་མཆོག་ནས་བཀའ་བློན་ཁྲི་པའི་མཛད་ཁུར་དམ་འབུལ་བཞུས་ཏེ་ལོ་གཅིག་འཁོར་བའི་དུས་ཚིགས། བོད་ནང་གི་དཔའ་བོ་དཔའ་མོ་རྣམས་ལ་མྱ་ངན་གུས་འདུད་མཚོན་ཆེད་མཆོད་འབུལ་སྨོན་ལམ་ཞིག་ཐའེ་ཝན་བོད་ཀྱི་སྐུ་ཚབ་དོན་ཁང་གི་མཆོད་ཁང་ནང་གོ་སྒྲིག་ཞུས་ཡོད།
དེ་ཉིན་དགོང་དྲོ་གཙོས་གསེར་ཁྲི་རིན་པོ་ཆེ་དབུ་བཞུགས་ཐོག་ཆོས་ལུགས་རིས་མེད་ཀྱི་བླ་སྤྲུལ་དགེ་འདུན་དང་། ཐེ་ཝན་དུ་གནས་སྡོད་བོད་མི་བཅས་མི་གྲངས་ལྔ་བཅུ་ལྷག་གིས་རང་ལུགས་ན་བཟའ་བཞེས་ཏེ་མཆོད་འབུལ་སྨོན་ལམ་གསུང་འདོན་གནང་ཡོད། མཛད་སྒོའི་ཐོག་མར་ཐའེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བཀའ་ཁྲི་བློ་བཟང་སེང་གེ་མཆོག་གིས་བཀའ་ཁྲིའི་ཐུགས་འགན་བཞེས་ཏེ་ལོ་གཅིག་ཧྲིལ་པོ་འཁོར་བའི་གྲུབ་འབྲས་དང་མདུན་བསྐྱོད་བྱེད་ཕྱོགས་སྐོར་གྱི་གསུང་བཤད་སྒྲོགས་སྦྱང་གནང་རྗེས། མཆོད་འབུལ་སྨོན་ལམ་གོ་སྒྲིག་ཞུས་པའི་དགོས་དམིགས་ངོ་སྤྲོད་དང་། ལྷག་དོན་ཕྱི་ཚེས་ ༧ ཉིན་ཨ་མདོ་གཙོས་དགོན་པའི་མཆོད་རྟེན་མཐའ་རུ་བུད་མེད་སྒྲོལ་དཀར་མཚོ་ལགས་ཀྱིས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་ལོ་རྒྱུས་སྙིང་བསྡུས་བཅས་ངོ་སྤྲོད་གནང་། བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་བོད་ནང་གི་དཔའ་བོ་དཔའ་མོ་རྣམས་ཀྱི་སྙིང་སྟོབས་ལ་གུས་འདུད་དང་། ཕྱིར་སྡོད་གསོན་གནས་བོད་མི་རྣམས་ལ་འཁྲི་བའི་ལས་འགན་ནི་ཚེ་འདས་རྣམས་ཀྱི་བསམ་འདུན་དེ་རྒྱུན་མཐུད་བྱ་དགོས་པས། མ་འོངས་པར་ཐའེ་ཝན་གནས་སྡོད་བོད་མི་རྣམས་ཀྱིས་བོད་དོན་ལས་འགུལ་སྔར་ལྷག་ཤུགས་ཆེ་སྤེལ་དགོས་ཚུལ་དང་སྤེལ་ཕྱོགས་སྐོར་གསུང་བཤད་གནང་འདུག་པ་བཅས།