༢༠༡༢ ཟླ་ ༧ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༧ ཉིན་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནི་ Sydney དང་ཀེན་བྷེར་ར། Canberra མེལ་བྷོན་ Melbourneདང་ནིའུ་ཛི་ལེན་ཌིའི་གྲོང་ཁྱེར་ཁེ་རི་སི་ཆར་ཅི་ Christchurch བཅས་ཀྱི་ནང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ངང་ཞུས་ཡོད། དེ་ཡང་སི་ཌི་ནིའི་ནང་སྐུའི་འཁྲུངས་སྐར་གྱི་མཛད་སྒོའི་སྐབས་ཁུལ་དེའི་ནང་པའི་ཆོས་ཚོགས་ཀྱི་བླ་སྤྲུལ་དགེ་བཤེས་དང་བོད་མི་སེར་སྐྱ་མི་མང་བཅས་ཀྱིས་༸རྒྱལ་བའི་ཞབས་བརྟན་གསུང་འདོན་གནང།
དེ་རྗེས་བོད་ཁང་དྲུང་ཆེ་དངོས་གྲུབ་རྒྱལ་མཚན་ལགས་ཀྱིས་བཀའ་ཤག་གི་གསུང་བཤད་སྒྲོགས་སྦྱང་གནང་ཡོད། མཛད་སྒོའི་སྐབས་མི་གྲངས་ ༤༠༠ ལྷག་འདུ་འཛོམས་གནང་སྟེ་བོད་ཀྱི་ཐུན་མིན་རིག་གཞུང་དང་འབྲེལ་བའི་གཞས་སྣ་འཁྲབ་སྟོན་སོགས་གནང་སྟེ་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད། ཕྱོགས་མཚུངས་གྲོང་ཁྱེར་ཀེན་བྷེ་རའི་ནང་སྐུའི་འཁྲུངས་སྐར་གྱི་མཛད་སྒོ་སྲུང་བརྩི་ཞུ་སྐབས་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་མཛད་སྒོའི་ཐོག་བཀའ་ཤག་གི་གསུང་བཤད་སྒྲོགས་སྦྱང་གནང། སྐབས་དེར་པོ་ལེན་ཌིའི་གཞུང་ཚབ་མཆོག་དང་ཕྱི་དྲིལ་དྲུང་ཆེ་བསྟན་འཛིན་ཕུན་ཚོགས་ཨ་ཏི་ཤ། དེ་བཞིན་བཀའ་ཟུར་དཔལ་འབྱོར་ཚེ་རིང་བཅས་མཉམ་ཞུགས་གནང་ཡོད། གཞན་ཡང་ནིའུ་ཛི་ལེན་ཌིའི་གྲོང་ཁྱེར་ཁེ་རི་སི་ཆར་ཇི་ནང་དུའང་བོད་མི་ཚོས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་བཅས།།
