ཨུ་རུ་སུ་སྤྱི་མཐུན་རྒྱལ་ཁབ་ཀྱི་གྲོང་ཁྱེར་འདྲ་མིན་ནང་༸གོང་ས་མཆོག་གི་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ།

གསར་ལས་ཁང་གི་གསར་འགོད་པས།

༢༠༡༢-༠༧-༠༩

༢༠༡༢ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན་ཨུ་རུ་སུ་སྤྱི་མཐུན་རྒྱལ་ཁབ་ཀྱི་གྲོང་ཁྱེར་ཁག་གཅིག་ནང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་གྱི་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཨུ་རུ་སུའི་རྒྱལ་ས་མོ་སི་ཁོའི་ནང་ཨུ་རུ་སུ་བོད་ཀྱི་སྐུ་ཚབ་དོན་གཅོད་ཁང་དང་། བོད་སྐྱོབ་དགེ་རྩ་ཚོགས་པ། མོ་སི་ཁོའི་ནང་པའི་མཐུན་ཚོགས་བཅས་ཐུན་མོང་གི་གོ༞་སྒྲིག་ཐོག་རྒྱལ་ས་མོ་སི་ཁོའི་ཚོགས་ཁང་ཞིག་ཏུ་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། སྤྱིར་ཚོགས་ཁང་དེར་མི་གྲངས་ ༥༠༠ ཤོང་ཚད་ཡོད། དེ་ཡང་མཛད་སྒོའི་ཐོག་མར་མཁན་སྤྲུལ་རིན་པོ་ཆེ་དབུ་བཞུགས་ཐོག་འབྲས་སྤུངས་སྒོ་མང་གྲྭ་ཚང་གི་དགེ་འདུན་པས་༸རྒྱལ་བའི་ཞབས་བརྟན་གསུང་འདོན་གནང།

དེ་རྗེས་ཨུ་རུ་སུ་སྐུ་ཚབ་དོན་གཅོད་ངག་དབང་རབ་རྒྱས་ལགས་ཀྱིས་སྐུ་མགྲོན་རྣམ་པ་དང་བོད་ཀྱི་གྲོགས་པོ་བོད་དོན་རྒྱབ་སྐྱོར་བ་རྣམས་ལ་འཚམས་འདྲི་ཞུས་པ་དང་ཆབས་ཅིག། ཁོང་ནས་༸གོང་ས་མཆོག་གི་ཐུགས་ཀྱི་འཆར་སྣང་དང་སྐུ་ཚེ་ཧྲིལ་པོའི་མཛད་འགན་གཙོ་བོ་གསུམ་གྱི་སྐོར་གསུང་བཤད་གནང་ཡོད། དེ་ནས་ཨུ་རུ་སུའི་སྐད་ཡིག་ཐོག་ནང་ཆོས་ངོ་སྤྲོད་དུས་དེབ་ཀྱི་སྤྱི་ཁྱབ་རྩོམ་སྒྲིག་པ་སྐུ་ཞབས་ཨེན་ཌི་རི་ཊེ་རེནཊ་ཡེབ་ (Dr.Andrey Terentyev) ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་། ཁོང་ནི་ཕྱི་ལོ་ ༡༩༩༠ ནང་༸གོང་ས་མཆོག་ཨུ་རུ་སུར་ཆིབས་སྒྱུར་སྐབས་གསུང་བསྒྱུར་གནང་མྱོང་ཡོད་པ་མ་ཟད། མགོན་པོ་གང་ཉིད་མཆོག་གིས་ལྗགས་རྩོམ་མཛད་པའི་ཕྱག་དེབ་འགའ་ཤས་ཨུ་རུ་སུའི་སྐད་ཡིག་ཐོག་ཕབ་བསྒྱུར་དང་ཕྱོགས་སྒྲིག་གནང་མྱོང་ཡོད་འདུག

ཕྱོགས་མཚུངས་དེ་སྔའི་བྷུར་ཡ་ཏི་ནང་པའི་དགོན་པའི་མཁན་པོའམ་ད་ལྟའི་བྷུརི་ཡ་ཏི་སྤྱི་མཐུན་རྒྱལ་ཁབ་ཀྱི་རྒྱལ་སའི་ནང་རྟེན་གཞི་བྱས་པའི་ལམ་རིམ་དགོན་པའི་དབུ་འཛིན་མཁན་ཟུར་ཆོས་ཀྱི་རྡོ་རྗེ་བྷུ་ཌ་ཡེབ་ (Chokey Dorje Budayev) ལགས་ཀྱིས་ཀྱང་གསུང་བཤད་གནང་ཡོད། དེ་རྗེས་ཉེ་ཆར་ལོན་ཌོན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་ཊེམ་པེལ་ཊོན་གཟེངས་རྟགས་འབུལ་བཞེས་མཛད་པའི་བརྙན་འཕྲིན་ཞིག་ཨུ་རུ་སུའི་སྐད་ཐོག་ཕབ་བསྒྱུར་ཞུས་པ་ཞིག་བསྟན་གྲུབ་མཚམས། བལ་ཡུལ་གྱི་ས་གནས་ཡུལ་མོ་ནས་ཕེབས་པའི་བླ་མ་པདྨ་རང་གྲོལ་རིན་པོ་ཆེས་གུ་རུའི་གསོལ་འདེབས་དང་༸རྒྱལ་བའི་ཞབས་བརྟན་གསུང་འདོན་གནང། དེ་ནས་འབྲས་སྤུངས་སྒོ་མང་གྲྭ་ཚང་གི་དགེ་འདུན་པས་ཞྭ་ནག་འཆམ་འཁྲབ་སྟོན་གནང་བ་མ་ཟད། ཁལ་མུཀ་སྤྱི་མཐུན་གྱི་གཞས་མ་གྲགས་ཅན་ལྕམ་སྐུ་ཨི་རིན་ཌི་ཇན་(Miss Irindjan) ལགས་ཀྱིས་༸གོང་ས་མཆོག་ལ་བསྟོད་པའི་གླུ་གཞས་ཕུལ་ཡོད། དེ་བཞིན་ཨལ་ཊི་ཡ་སྤྱི་མཐུན་(Altia Republic) གྱི་གཞས་མ་གྲགས་ཅན་ལྕམ་སྐུ་ཆེ་ནན་ཌི་(Ms.Chenand) ལགས་ནས་ཀྱང་སྲོལ་རྒྱུན་གྱི་གླུ་གཞས་བཏང་ཡོད། ཕྱོགས་མཚུངས་སྐབས་དེར་ཨུ་རུ་སུའི་བྲོ་པས་རྒྱ་གར་གྱི་ཀ་ཐཀ་(Indian Kathak Dance) འཁྲབ་སྟོན་དང་འབྲས་སྤུངས་སྒོ་མང་གྲྭ་ཚང་གི་དགེ་འདུན་པས་སེང་གེ་ཡང་ཁྲབ་སྟོན་གནང་ཡོད།

དུས་ཚིགས་ཁྱད་པར་ཅན་དེའི་ཐོག་ཨུ་རུ་སུའི་སྐད་ཡིག་ཐོག་ཕབ་བསྒྱུར་ཞུས་པའི་༸གོང་ས་མཆོག་གིས་མཛད་པའི་རྡུལ་ཕྲན་གཅིག་སྟེང་གི་འཇིག་རྟེན་ (The Universe in Single Atom) ཞེས་པ་དང་རྒྱ་གར་ནང་པའི་གནས་ཆེན་ཁག་གི་ལམ་ཡིག་ (Buddhist Heritage Sites of India) ཞེས་པའི་དཔེ་དེབ་བཅས་དབུ་འབྱེད་གནང་ཡོད། དེ་བཞིན་ཚོགས་ཁང་དེའི་ནང་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་མཆོག་འགྲེམས་སྟོན་ཡང་གནང་ཡོད།

ཕྱོགས་མཚུངས་དེ་ཉིན་ཁལ་མུཀ་ (Kalmyk) གི་རྒྱལ་ས་ཨི་ལི་སི་ཊའི་ (Elista) ནང་རྟེན་གཞི་བྱས་པའི་ནང་པའི་དགོན་པར་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད། སྐབས་དེར་ཁལ་མུཀ་ནང་པའི་མཐུན་ཚོགས་ཀྱི་དབུ་འཛིན་ཏེ་ལོ་རིན་པོ་ཆེ་མཆོག་དབུ་བཞུགས་ཐོག་༸རྒྱལ་བའི་ཞབས་བརྟན་གསུང་འདོན་གནང། དེ་བཞིན་བྷུར་ཡ་ཏི་ (Buryat) རྒྱལ་ས་ཨུ་ལན་ཨུ་ཌེར་ (Ulan Ude) རྟེན་གཞི་བྱས་པའི་སྒྲོལ་ལྗང་བསྟི་གནས་ཁང་(Green Tara Center) དུ་དགེ་བཤེས་བྱམས་པ་འཕྲིན་ལས་ལགས་དབུ་བཞུགས་ཐོག་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་མ་ཟད། ཁུལ་དེར་གནས་སྡོད་བོད་རིགས་སྤྱི་མཐུན་ཚོགས་པས་གོ་སྒྲིག་ཐོག་༸རྒྱལ་བའི་ཞབས་བརྟན་གསུང་འདོན་གནང་བ་སོགས་སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུས་ཡོད།