༢༠༡༢ ཟླ་ ༧ ཚེས་ ༢༦ རེས་གཟའ་ཕུར་བུ།

༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༥ ཉིན་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་དང་བདེ་འཇགས་སྲིད་བྱུས་ཀྱི་ཆེས་མཐོའི་སྐུ་ཚབ་ལྕམ་སྐུ་ཁེ་ཐེ་རིན་ཨེ་ཤི་ཊོན་ Catherine Ashton མཆོག་གིས་གྲོས་འགོ་བཏོན་པ་ལྟར། ཡུ་རོབ་སྤྱི་མཐུན་ལྷན་ཚོགས་ཀྱི་ཚོགས་ཆུང་ནས་སྐུ་ཞབས་ས་ཊབ་རོ་སི་ལམ་བྷི་རི་ནི་དི་སི་ Stavros Lambrinidis མཆོག་ལ་ཡུ་རོབ་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་ཏུ་ཐེངས་དང་པོར་བསྐོ་གཞག་གནང་ཡོད། དེ་ཡང་སྐུ་ཞབས་ས་ཊབ་རོ་སི་ལམ་བྷི་རི་ནི་དི་སི་མཆོག་གིས་འདི་ལོ་ཕྱི་ཟླ་ ༩ ཚེས་ ༡ འགོ་འཛུགས་གནང་སྟེ་ཕྱི་ལོ་ ༢༠༡༤ ཟླ་ ༦ ཚེས་ ༣༠ བར་ལས་ཁུར་ཞུ་རྒྱུ་ཡིན་འདུག ཁོང་གི་འགན་ཁུར་གཙོ་བོ་ནི་ཡུ་རོབ་སྤྱི་མཐུན་ཚོགས་པའི་འགྲོ་བ་མིའི་ཐོབ་ཐང་ཐོག་འཛིན་བཞིན་པའི་སྲིད་བྱུས་རྣམས་དོན་དངོས་ལག་ལེན་ཐོག་ནུས་པ་ཆེ་རུ་གཏོང་རྒྱུ་མ་ཟད། དངོས་གསལ་ཆེ་རུ་གཏོང་རྒྱུ་ཡིན་འདུག

དེ་ཡང་ལྕམ་སྐུ་ཁེ་ཐེ་རིན་ཨེ་ཤི་ཊོན་ Catherine Ashton མཆོག་གིས་དེའི་སྐོར་གསུང་དོན། སྐུ་ཞབས་ས་ཊབ་རོ་སི་ལམ་བྷི་རི་ནི་དི་སི་ Stavros Lambrinidis མཆོག་ཡུ་རོབ་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་ཏུ་ཐེངས་དང་པོར་བསྐོ་གཞག་གནང་བར་ང་རང་ཧ་ཅང་དགའ་པོ་བྱུང། འགྲོ་བ་མིའི་ཐོབ་ཐང་དེ་ངས་གནད་དོན་གལ་ཆེ་ཤོས་ཤིག་ལ་ངོས་འཛིན་བྱེད་བཞིན་ཡོད། དེར་བརྟེན་ཡུ་རོབ་སྤྱི་མཐུན་ཚོགས་པས་ཕྱི་འབྲེལ་ལས་དོན་གྱི་སྲིད་བྱུས་ཇི་འདྲ་ཞིག་ལག་བསྟར་བྱེད་སྐབས་འགྲོ་བ་མིའི་ཐོབ་ཐང་གི་གནད་དོན་དེ་འབྲེལ་ཐག་ལྟ་བུར་རྩི་བཞིན་ཡོད། ཅེས་གསུངས། སྐུ་ཞབས་ས་ཊབ་རོ་སི་ལམ་བྷི་རི་ནི་དི་སི་མཆོག་ནི་གི་རི་སིའི་རྒྱལ་ས་ཨེ་ཐེན་ནང་འཁྲུངས་པ་དང་ཁོང་གིས་དེ་སྔ་ཡུ་རོབ་གྲོས་ཚོགས་ཀྱི་ཚོགས་གཞོན་གནང་ཡོད་པ་བཅས།།