སྐུ་ཞབས་ཐོ་མ་སི་མན་མཆོག་དང་སྐུ་ཚབ་དོན་གཅོད་ལྷན།
༢༠༡༢ ཟླ་ ༧ ཚེས་ ༡༣ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༡ ཉིན་ཡུ་རོབ་གྲོས་ཚོགས་ཀྱི་ལས་ཁུངས་ཨ་མའི་ཉེ་འགྲམ་དུ་རྟེན་གཞི་བྱས་པའི་ཨལ་བྷ་ཊི་ཚོགས་ཁང་ Albert Hall Complex ཞེས་པའི་དེའི་ནང་སྐུ་ཚབ་དོན་ཁང་གིས་གོ་སྒྲིག་འོག་༸གོང་ས་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུང་སྐར་གྱི་དུས་ཆེན་སྲུང་བརྩི་ཞུས་པའི་མཛད་སྒོའི་སྐབས། ཡུ་རོབ་གྲོས་ཚོགས་ཀྱི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མ་སི་མན་Thomas Mannམཆོག་གིས་སྐུའི་འཁྲུངས་སྐར་ལ་འཚམས་འདྲི་ཞུས་པ་དང་སྦྲགས་གསུང་བཤད་གནང་དོན།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བོད་མིའི་བདེན་པའི་འཐབ་རྩོད་ཀྱི་དབུ་ཁྲིད་པའི་མཛད་བཟང་དེར་ང་ཚོས་རྟག་ཏུ་བསྔགས་བརྗོད་ཞུ་བཞིན་ཡོད།
ཡུ་རོབ་སྤྱི་མཐུན་ཚོགས་པས་མང་གཙོ་དང་རང་དབང་ཆེད་འཐབ་རྩོད་གནང་མཁན་བོད་མི་ཚོར་ཐབས་ལམ་འདྲ་མིན་ཐོག་ནས་རྒྱབ་སྐྱོར་ཞུས་དང་ཞུ་མུས་ཡིན། ཞེས་གསུངས། གཞན་ཡང་མཛད་སྒོའི་སྐབས་གཞུང་འབྲེལ་མཛད་གཙོ་རྣམ་པ་དང། ཡུ་རོབ་གྲོས་ཚོགས་ཀྱི་སྐུ་ཚབ་འཐུས་མི། བྷེལ་ཇམ་གྲོས་ཚོགས་ཀྱི་གྲོས་ཚོགས་འཐུས་མི། ཡུ་རོབ་གྲོས་ཚོགས་དང་བྷེལ་ཇམ་གྲོས་ཚོགས་ཀྱི་འབྲེལ་ཡོད་ལས་བྱེད་ཁག་གཅིག བོད་ཀྱི་ཆོས་ཚོགས་དང་ས་གནས་བོད་རིགས། བོད་དོན་རྒྱབ་སྐྱོར་བ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། གསར་འགོད་པ། མཁས་དབང་སོགས་མཉམ་ཞུགས་གནང་ཡོད།
མཛད་སྒོའི་ཐོག་མར་བོད་མི་མང་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་དང་ནཱ་ལེནྜའི་ཆོས་ཚོགས་ Nalanda Institute ཀྱི་བླ་མ་ཀར་ཏ་ལགས་དང་དགེ་འདུན་པ་བཅས་ཀྱིས་༸རྒྱལ་བའི་ཞབས་བརྟན་སོགས་སྨོན་ལམ་གསུང་འདོན་གནང་། སྐབས་དེར་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་མཛད་སྒོའི་སྐུ་མགྲོན་ཚང་མར་འཚམས་འདྲི་ཞུས་ཡོད། ཕྱོགས་མཚུངས་མཛད་སྒོའི་སྐབས་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གིས་བཀའ་ཤག་གི་འཚམས་འདྲི་ཞུས་པ་མ་ཟད། མཛད་བཅར་བ་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད།
དེ་བཞིན་ཡུ་རོབ་སྤྱི་མཐུན་ཚོགས་པ་གཙོ་བོར་གྱུར་བའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་རྣམས་ཀྱིས་ད་བར་བོད་མིའི་བདེན་པའི་འཐབ་རྩོད་ལ་ལྷག་བསམ་ཟོལ་མེད་ཀྱིས་རྒྱབ་སྐྱོར་གནང་བར་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བཀའ་དྲིན་རྗེས་དྲན་ཞུས་པ་མ་ཟད། སླད་ཀྱང་བོད་དོན་བདེན་མཐའ་མ་གསལ་བར་རྒྱབ་སྐྱོར་མུ་མཐུད་གནང་རྒྱུའི་རེ་བ་ཡོད་སྐོར་སོགས་གསུངས།
དེ་རྗེས་གཞས་སྣ་འཁྲབ་སྟོན་སྐབས་ནོར་བུ་ཚེ་རིང་ལགས་དང་ཁོང་གི་གྲོགས་པོ་ཚོས་དེང་དུས་བོད་གཞས་འཁྲབ་སྟོན་ཞུས་ཡོད། ཕྱི་ཚེས་ ༡༠ ཉིན་བདེ་སྲུང་བཀའ་བློན་མཆོག་དང་སྐུ་ཚབ་དོན་གཅོད་རྣམ་གཉིས་ཡུ་རོབ་གྲོས་ཚོགས་སུ་བོད་དོན་ལྷན་ཚོགས་སུ་དམིག་བསལ་སྐུ་མགྲོན་དུ་མགྲོན་འབོད་ལྟར་ཕེབས་ཡོད། ཕྱི་ཚེས་ ༡༢ ཉིན་བཀའ་བློན་མཆོག་དང་སྐུ་ཚབ་དོན་གཅོད་མཆོག་སི་པན་རྒྱལ་ས་བྷར་སི་ལོ་ནར་ཕེབས་ཐོན་གནང་ཡོད་པ་བཅས།།
.
