༢༠༡༢ ཟླ་ ༧་ཚེས་ ༡༦ རེས་གཟའ་ཟླ་བ།
༄༅། ཕྱི་ལོ་ ༢༠༡༢ ཟླ་ ༧ ཚེས་ ༡༣ རེས་གཟའ་པ་སངས་ཉིན་ཐེག་ཆེན་ཆོས་གླིང་གཙུག་ལག་ཁང་དུ་ཆོས་རིག་ལས་ཁུངས་ཀྱིས་གོ་སྒྲིག་འོག་རང་ལུས་མེར་སྲེག་གཏོང་མཁན་ཚེ་དབང་རྡོ་རྗེ་ལགས་དང་དར་རྒྱས་ལགས་གཉིས་ལ་མཆོད་འབུལ་སྨོན་ལམ་སྐབས། བཀའ་ཁྲི་ལས་ཚབ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་བོད་ནང་དུ་བོད་མི་ཚོས་རང་ལུས་མེར་སྲེག་བཏང་བའི་གནད་དོན་ཐོག་གསུངས་དོན། རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་འཕྲལ་དུ་མཚམས་འཇོགས་བྱེད་དགོས།
ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༤༣ རང་ལུས་མེར་སྲེག་བཏང་ཡོད་པའི་ཁོངས་ནས་བོད་མི་ ༣༣ འདས་གྲོངས་སུ་གྱུར་ཡོད་པ་དང། བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་རིགས་སྤེལ་དགོས་པའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་བོད་མིའི་ཐོག་ཧ་ཅང་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་པ་དེས་ཡིན།
དེར་བརྟེན་ང་ཚོས་རྒྱ་ནག་གཞུང་གིས་གལ་ཏེ་བོད་ཀྱི་དཀའ་ངལ་དེ་དག་སེལ་དགོས་ན་བོད་མིའི་དངོས་ཡོད་དཀའ་ངལ་དེ་དག་ངོས་ལེན་གྱིས་བོད་ནང་དུ་ལག་བསྟར་བྱེད་བཞིན་པའི་དམ་བསྒྲགས་ཅན་གྱི་སྲིད་བྱུས་དེ་དག་ལ་སྐྱར་ཞིབ་དང་འགྱུར་བ་ངེས་པར་དུ་གཏོང་དགོས། ཞེས་གསུངས་པ་མ་ཟད། རང་ལུས་མེར་སྲེག་གཏོང་མཁན་བོད་མི་ཚོས་བོད་ལ་རང་དབང་དགོས། ༸གོང་ས་མཆོག་བོད་དུ་གདན་འདྲེན་ཞུ་རྒྱུའི་མངོན་འདོད་རྣམས་ང་ཚོ་བཙན་བྱོལ་བོད་མི་ཚོས་བསྒྲུབ་ཐུབ་པ་བྱ་རྒྱུའི་འབད་བརྩོན་བྱེད་དགོས། ཞེས་གསུངས་ཡོད་པ་བཅས།།
