༢༠༡༢ ཟླ་ ༧ ཚེས་ ༡༧ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༧ ཉིན་བཀའ་ཁྲི་བློ་བཟང་སེང་གེ་མཆོག་མཁའ་ལམ་བརྒྱུད་ལ་དྭགས་སུ་ཕེབས་འབྱོར་སྐབས། ལ་དྭགས་ནང་པའི་མཐུན་ཚོགས་དང་བསོད་ནམས་གླིང་གི་ལས་བྱེད། གཞན་གནད་ཡོད་མི་སྣ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ཉིན་བཀའ་ཁྲི་མཆོག་གིས་བོད་ཁྱིམ་སློབ་གྲྭའི་ཚོགས་ཁང་དུ་ལ་དྭགས་བསོད་ནམས་གླིང་མི་མང་རྣམས་ལ་གསུང་བཤད་དང་མི་མང་གི་དྲི་བར་ལན་འདེབས་ཀྱང་གནང་ཡོད། ཕྱི་ཚེས་ ༨ ཉིན་བཀའ་ཁྲི་མཆོག་ལ་དྭགས་བྱང་ཐང་ཆུ་ཤུལ་ཁུལ་དུ་ཕེབས་རྒྱུའི་ལས་རིམ་ཡོད་ཀྱང་འགྲོ་ལམ་ཡག་པོ་མེད་པའི་རྐྱེན་གྱི་དེ་ཉིན་ཕེབས་ཐུབ་མེད་ཀྱང། བཀའ་ཁྲི་མཆོག་གིས་དེ་ཉིན་ཀླུ་འཁྱིལ་དགོན་དུ་དགའ་ལྡན་ཁྲི་རིན་པོ་ཆེ་མཆོད་དང་ལྷན་མཇལ་འཕྲད་ཞུས། ཕྱི་ཚེས་ ༩ ཉིན་ལ་དྭགས་བྱང་ཐང་ས་ཁག་དགུ་ཡོད་པ་ནས་བྱང་ཐང་ཡུ་མོར་བཀའ་ཁྲི་མཆོག་གིས་བྱང་ཐང་ས་ཁུལ་གཞན་རྣམས་ཀྱི་སྐུ་ཚབ་རྣམ་དང་ལྷན་བཞུགས་མོལ་ཚོགས་འདུ་ཚོགས་ཡོད། སྐབས་དེར་བཀའ་ཁྲི་མཆོག་གིས་ཁོང་རྣམ་པའི་དྲི་བར་ལན་འདེབས་ཀྱང་གནང་ཡོད།
དེ་རྗེས་བཀའ་ཁྲི་མཆོག་ཕྱི་དྲོ་ཆུ་ཚོད་ ༧ ཐོག་བྱང་ཐང་སྐར་གཞུང་དང་གུ་ཡུལ་གྱི་མི་མང་འཛོམས་ས་རྡོ་ལྷས་བྲག་སྒོར་ཚོགས་འདུ་ཚོགས་ཡོད། ཕྱི་ཚེས་ ༡༠ ཉིན་བཀའ་ཁྲི་མཆོག་བྱང་ཐང་ཧན་ལེར་ཕེབས་འབྱོར་གྱིས་མི་མང་ལ་གསུང་བཤད་དང་དྲི་བ་དྲིས་ལན་གནང་ཡོད། དེ་བཞིན་བྱང་ཐང་ཧན་ལེའི་འབྲོག་སར་གཟིགས་སྐོར་དང་ཁུལ་དེའི་འབྲོག་པ་རྣམས་ཐུག་འཕྲད་ཀྱིས་གསུང་བཤད་གནང་ཡོད། དེ་ནས་བཀའ་ཁྲི་མཆོག་བྱང་ཐང་གསུམ་མདོར་ཁྱུག་ཙམ་ཕེབས་ཏེ་བོད་ཁྱིམ་སློབ་གྲྭར་གཟིགས་སྐོར་དང། དེ་བཞིན་དེ་ཉིན་དགོང་དྲོར་ལ་དྭགས་ནང་པའི་ལྷན་ཚོགས་ཀྱིས་གསོལ་ཚིགས་ལ་གདན་འདྲེན་ཞུས་པ་ལྟར་ཕེབས་ཡོད། སྐབས་དེར་བཀའ་ཁྲི་མཆོག་གིས་ལ་དྭགས་ཀྱི་གནད་ཡོད་མི་སྣ་ཁག་གཅིག་དང་ལྷན་བཞུགས་མོལ་ཚོགས་འདུ་ཡང་ཚོགས་ཡོད། ཕྱི་ཚེས་ ༡༣ ཉིན་བཀའ་ཁྲི་མཆོག་ལ་དྭགས་ནས་མཁའ་ལམ་བརྒྱུད་ལྡི་ལིར་ཕེབས་ཡོད།
ཐེངས་འདིའི་བཀའ་ཁྲི་མཆོག་ལ་དྭགས་ཁུལ་དུ་གཟིགས་སྐོར་སྐབས་མི་མང་རྣམས་ལ་གསུང་བཤད་གཙོ་བོ་བཀའ་ཤག་གི་ལྟ་གྲུབ་གསུམ་གྱི་ནང་ནས་རང་ཁ་རང་གསོའི་གོ་དོན་ཞིབ་ཕྲ་འགྲེལ་བརྗོད་གནང་བ་དང་ཆབས་ཅིག་གཞོན་སྐྱེས་རྣམས་ལ་ཤེས་ཡོན་གྱི་ཐོག་ཤུགས་རྒྱག་དགོས་སྐོར་སོགས་གསུངས་ཡོད་པ་བཅས།།
