༢༠༡༢ ཟླ་ ༧ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༨ ཉིན་བཀའ་བློན་ཁྲི་པ་བློ་བཟང་སེང་གེ་མཆོག་གིས་ཨ་རིའི་རྒྱལ་ས་ཝ་ཤིང་ཊོན་གྱི་རྒྱལ་ཡོངས་གྲོས་ཚོགས་གོང་མའི་གནད་ཡོད་འཐུས་མི་སྐུ་ཞབས་ཇོན་མེ་ཁེན་(John McCain)མཆོག་དང་། ཇོ་ལི་སྦར་མེན་(Joe Lieberman)མཆོག་མཇལ་འཕྲད་གནང་སྟེ་བོད་དོན་སྐོར་ལ་གསུང་མོལ་གནང་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཐོག་མར་གསར་འགོད་ལྷན་ཚོགས་སྐབས་ཇོ་ལི་སྦར་མེན་མཆོག་གིས་གསུང་དོན། བཀའ་བློན་ཁྲི་པ་བློ་བཟང་སེང་གེ་མཆོག་ནི་ལོ་རྒྱུས་རང་བཞིན་ལྡན་པའི་མི་སྣ་ཞིག་ཆགས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཆབ་སྲིད་ཀྱི་འགན་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་བཀའ་བློན་ཁྲི་པ་མཆོག་ལ་རྩིས་སྤྲོད་མཛད་ཡོད། དེར་བརྟེན་ང་ཚོའི་ངོས་ནས་བཀའ་བློན་ཁྲི་པས་དབུ་ཁྲིད་པའི་བོད་མིའི་སྒྲིག་འཛུགས་ལ་རྒྱབ་སྐྱོར་གང་ཐུབ་བྱ་རྒྱུ་ཡིན། དེ་བཞིན་རྒྱ་ནག་གཞུང་ནས་བོད་ནང་བོད་མིར་དམ་བསྒྲགས་ཅན་གྱི་སྲིད་བྱུས་འཛིན་བཞིན་པ་དེ་དག་མཚམས་འཇོག་བྱེད་དགོས་པའི་གནོན་ཤུགས་སྤྲོད་རྒྱུ་ཡིན། ཞེས་གསུངས་ཡོད།
དེ་ནས་བཀའ་ཁྲི་མཆོག་གིས་གསུང་དོན། ཨ་རིའི་གྲོས་ཚོགས་གོང་མའི་ནང་མང་གཙོ་དང་འགྲོ་བ་མིའི་ཐོབ་ཐང་རྩོད་ལེན་གནང་མཁན་གྲོས་ཚོགས་ཀྱི་འཐུས་མི་ཇོན་མེ་ཁེན་མཆོག་དང་ཇོ་ལི་སྦར་མེན་མཆོག་གཉིས་མཇལ་རྒྱུ་བྱུང་བར་ཧ་ཅང་དགའ་པོ་བྱུང། ཁོང་རྣམ་པ་གཉིས་ནི་བོད་དོན་ལ་རྒྱབ་སྐྱོར་གནང་མཁན་ཞིག་ཡིན། དེང་སྐབས་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད། བོད་ནང་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་ཆེད་བོད་མི་བཞི་བཅུ་ཞེ་བཞིས་རང་ལུས་མེར་སྲེག་གཏོང་དགོས་ཐུག་པའི་གནས་སྟངས་དེ་ནི་ཧ་ཅང་སེམས་སྐྱོ་དགོས་པ་ཞིག་ཡིན། ང་ཚོས་རང་ལུས་མེར་སྲེག་གཏོང་མཁན་ཚོར་བརྒྱུད་བསྐུལ་ནམ་ཡང་བྱེད་ཀྱི་མེད། འགྲོ་བ་མི་ཞིག་ཡིན་པའི་ཆ་ནས་རང་དབང་དང་འདྲ་མཉམ་གྱི་ཐོབ་ཐང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། འོན་ཀྱང་རྒྱ་ནག་གཞུང་ནས་བོད་མིར་རང་དབང་དང་འདྲ་མཉམ་གྱི་ཐོབ་ཐང་མ་སྤྲད་པར་བརྟེན། བོད་མི་རྣམས་ཀྱིས་དེ་ལྟར་གནང་བཞིན་ཡོད། གལ་ཏེ་རྒྱ་ནག་གཞུང་ནས་བོད་ནང་གི་བོད་མི་ཚོར་དྲག་གནོན་གྱི་སྲིད་བྱུས་མཚམས་འཇོག་བྱས་ན། རང་ལུས་མེར་སྲེག་གི་གནས་ཚུལ་དེ་རང་བཞིན་གྱིས་མཚམས་ཆད་ཀྱི་རེད། ཅེས་གསུངས་ཡོད།
དེ་ནས་ཇོ་མེ་ཁེན་མཆོག་གིས་གསུང་དོན། ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་ཊི་རོམ་ནེ (Mitt Romney) གྱིས་བོད་ཀྱི་གནད་དོན་སྐོར་ལ་སེམས་འཚབ་ཆེན་པོ་གནང་བཞིན་འདུག ཁོང་ནི་སྤྱིར་བོད་ཀྱི་གནས་སྟངས་དང་ཡང་སྒོས་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་མཁན་ཞིག་ཆགས་ཡོད། ཅེས་གསུངས། སྐབས་དེར་གསར་འགོད་པ་ཞིག་གིས་མི་ཊི་རོམ་ནེ་ཨ་རིའི་སྲིད་འཛིན་ལ་འོས་ཐོབ་ན། སྲིད་འཛིན་ཨོ་བྷ་མ་ལྟར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཇལ་འཕྲད་ཞུ་གི་རེད་དམ། ཞེས་པའི་དྲི་བར་ལན་འདེབས་གནང་དོན། མི་ཊི་རོམ་ནེ་ནི་བོད་དོན་ལ་རྒྱབ་སྐྱོར་གནང་མཁན་ཞིག་ཡིན་སྟབས། ཁོང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཇལ་འཕྲད་ཞུ་རྒྱུའི་རེ་སྒུག་བྱེད་བཞིན་ཡོད། ཅེས་ལན་འདེབས་གནང་ཡོད་པ་བཅས། །
