༢༠༡༢ ཟླ་ ༧ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༤ ནས་ཕྱི་ཟླ་ ༧ ཚེས་ ༡ བར་བཀའ་ཁྲི་བློ་བཟང་སེང་གེ་མཆོག་གིས་ཉིན་གྲངས་བདུན་རིང་ཨོ་སི་ཊོ་ལི་ཡར་གཞུང་འབྲེལ་འཚམས་གཟིགས་སྐབས་ཀྱི་ཉིན་མཐའ་མར་ཨོ་སི་ཊོ་ལི་ཡའི་གྲོང་ཁྱེར་སི་ནི་ཁུལ་དུ་བོད་པའི་གསར་འགོད་པ་ཁག་གི་བོད་ནང་གི་ཛ་དྲག་གནས་སྟངས་དང་རང་ལུས་མེར་སྲེག་སྐོར་གྱི་དྲི་བར་ལན་འདེབས་གནང་དོན། བོད་ནང་གི་བོད་མི་བོད་བསྟན་སྲིད་ཆེད་རང་ལུས་མེར་སྲེག་གཏོང་མཁན་རྣམ་པའི་རེ་བ་དེ་དག་ང་ཚོས་གང་ཐུབ་ཅི་ཐུབ་ཀྱི་རྒྱལ་སྤྱིའི་སྟེང་བསྐྱལ་ཐུབ་པ་བྱ་རྒྱུ་ཙམ་མ་ཟད། གནད་ཡོད་མི་སྣ་ཚོར་ཞུ་ཐུབ་པ་ཞིག་བྱེད་དགོས་སྟབས། རང་ལུས་མེར་སྲེག་གཏོང་མཁན་རྣམ་པས་གཙོས་བོད་ནང་གི་ཤ་ཁྲག་གཅིག་པའི་བོད་རིགས་སྤུན་ཟླ་ཡོངས་སུ་རྫོགས་པའི་རེ་འདུན་བསྒྲུབ་ཆེད་བཀའ་ཤག་སྐབས་བཅུ་བཞི་པའི་ཐོག་ནས་གང་ཡོང་ཅི་ཡོང་གིས་འབད་བརྩོན་བྱས་དང་བྱེད་མུས་ཡིན། དེར་བརྟེན་སྔ་ཕྱི་མ་གཏོགས་ཁོང་རྣམ་པས་ཚེ་སྲོག་ཚུན་ཆད་བློས་གཏོང་གནང་སྟེ་རེ་འདུན་གནང་བ་དེ་དག་བསྒྲུབ་ཀྱི་རེད་བསམས་པའི་ཡིད་ཆེས་ཡོད་པའི་ཐོག་ནས་མུ་མཐུད་ཞབས་ཕྱི་སྒྲུབ་བཞིན་ཡོད། དེ་བཞིན་ད་ལྟ་ཆར་བོད་ནང་གི་གཞས་གཏོང་མཁན་ཁག་གཅིག་གིས་ངའི་མིང་གཞས་ཚིགས་ནང་བཅུག་སྟེ་གཞས་གཏོང་རྒྱུ་སོགས་བྱེད་ཀྱི་ཡོད་པ་གོ་ཐོས་བྱུང་། འོན་ཀྱང་ངའི་བསམ་པར་དེ་ནི་ང་རང་མི་སྒེར་ལ་དགའ་དྲགས་པ་རེད་བསམ་གྱི་མེད། དེ་ནི་ངའི་རྐུབ་སྟེགས་དེ་གལ་ཆེན་པོ་ཞིག་དང་དེར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱབ་སྐྱོར་མཛད་པར་བརྟེན་ནས་བོད་མི་ཚོས་རྒྱབ་སྐྱོར་གནང་བཞིན་ཡོད། དེར་བརྟེན་བོད་མིར་མ་འོངས་པར་ཕུགས་གཏད་ས་འདུག་བསམས་པ་དང་། ང་རང་སེམས་ཤུགས་འཕར་ན་བསམས་ཏེ་སྟོད་གླུ་སོགས་བླངས་ཏེ་དོ་སྣང་དང་རྒྱབ་སྐྱོར་ཤུགས་ཆེན་གནང་གི་འདུག དེ་བཞིན་གླུ་གཞས་གཏོང་མཁན་ཁག་གཅིག་བཙོན་ཁང་དུ་བཅུག་པའི་གནས་ཚུལ་གོ་ཐོས་ཡོང་བཞིན་འདུག་པས་ང་ཚོར་སེམས་འཚབ་ཆེན་པོ་ཡོད། ང་ལ་ཆབ་སྲིད་ཀྱི་འགན་ཡོད་སྟབས། བཀའ་ཤག་སྐབས་བཅུ་བཞི་པའི་ཐོག་ནས་ཕྱར་གྲུ་མཉམ་འདེགས་ཀྱིས་བོད་མིའི་རྩ་དོན་ཆེད་གང་ཐུབ་ཅི་ཐུབ་བྱས་དང་བྱེད་མུས་ཡིན། ཞེས་ལན་འདེབས་གནང་ཡོད་པ་བཅས། །