༢༠༡༢ ཟླ་ ༧ ཚེས་ ༤ རེསགཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢ ཉིན་བཀའ་བློན་མཆོག་གིས་རྡ་ས་ནས་ལྡི་ལར་ཕེབས་ཏེ་གཞུང་འབྲེལ་ལས་དོན་གྲུབ་རྗེས་ལྡི་ལི་ནས་ཕྱི་ཚེས་ ༤ ཉིན་ཁེ་ན་ཌའི་གྲོང་ཁྱེར་ཨོཊ་ཝར་ཕེབས་ཐོན་གྱིས་གཞུང་འབྲེལ་ལས་དོན་བསྒྲུབ་རྒྱུ་དང། དེ་རྗེས་ཕྱི་ཚེས་ ༦ ཉིན་གྲོང་ཁྱེར་ཝན་ཁུ་ཝར་ཕེབས་ཏེ་ས་གནས་བོད་རིགས་མཐུན་ཚོགས་ཀྱི་ཚོགས་མི་(Tibetan Association of British Columbia) རྣམས་དང་ཐུག་འཕྲད་གནང་རྒྱུ་མ་ཟད། ཕྱི་ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ཕེབས་པའི་སྐུའི་འཁྲུངས་སྐར་དུས་ཆེན་གྱི་སྐུ་མགྲོན་གཙོ་བོར་ཕེབས་ཏེ་དུས་ཆེན་སྲུང་བརྩི་དང་འབྲེལ་བའི་གསུང་བཤད་གནང་རྒྱུ་ཡིན་འདུག དེ་ནས་ཕྱི་ཚེས་ ༨ ཉིན་གྲོང་ཁྱེར་ཁལ་ག་རེར་ (Calgary) ཕེབས་ཐོན་གྱིས་ས་གནས་བོད་མི་ཚོ་དང་ལྷན་ཚོགས་འདུ་འཚོགས་རྒྱུ་མ་ཟད། ས་གནས་བོད་རིགས་ཚོགས་པའི་ཚོགས་མི་རྣམས་དང་ཐུག་འཕྲད་གནང་རྒྱུ་ཡིན་འདུག ཕྱོགས་མཚུངས་བཀའ་བློན་མཆོག་གིས་ཕྱི་ཚེས་ ༩ ཉིནཨལ་བྷེར་ཏ་ (Alberta) བོད་རིགས་ཚོགས་པའི་ཚོགས་མི་རྣམས་དང་ཐུག་འཕྲད་གནང་སྟེ།

ཕྱི་ཚེས་ ༡༠ ཉིན་གྲོང་ཁྱེར་མོན་ཊི་རེལ་ (Montreal) དུ་ཕེབས་ཐོན་གྱིས་ཁུལ་དེར་ཁུ་བྷེཀ་ (Tibetan Association of Quebec) བོད་རིགས་ཚོགས་པས་གོ་སྒྲིག་ཞུས་པའི་ཚོགས་འདུར་ཕེབས་ཏེ་གསུང་བཤད་གནང་རྒྱུ་དང། ཕྱི་ཚེས་ ༡༣ ཉིན་ཁུལ་དེ་ནས་གྲོང་ཁྱེར་ཊོ་རོན་ཊོར་ཕེབས་ཐོན་གྱིས་ཕྱི་ཚེས་ ༡༤ ཉིན་ཚོགས་འདུར་མཉམ་ཞུགས་གནང་རྗེས་ཕྱི་ཚེས་ ༡༥ ཉིན་སླར་ཡང་གྲོང་ཁྱེར་ཨོ་ཊ་ཝར་ཕེབས་ཏེ་ཕྱི་ཚེས་ ༡༦ ཉིན་ཁུལ་དེ་ནས་ཕེ་རེང་ཕོ་ཌི་(Frankfurt) བརྒྱུད་རྒྱ་གར་གྱི་རྒྱལ་ས་ལྡི་ལིར་ཕེབས་འབྱོར་གྱིས་ཕྱི་ཚེས་ ༡༩ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།