༢༠༡༢ ཟླ་ ༧ ཚེས་ ༡༦ རེས་གཟའ་ཟླ་བ།
༄༅། །ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཨིན་ཡུལ་རྒྱལ་ས་ལོན་ཌོན་གྱི་ཤར་ངོས་སུ་ཆགས་པའི་ཝུལ་ཝི་ཆི་ Woolwich ཞེས་པའི་ཁུལ་དེར་ཕེབས་ཏེ་ས་གནས་བོད་རིགས་རྣམས་ལ་གསུང་བཤད་གནང་ཡོད། ཐོག་མར་བོད་མི་གཞོན་སྐྱེས་ཁག་གཅིག་གིས་རིག་གཞུང་གི་གཞས་སྣ་འཁྲབ་སྟོན་གནང། དེ་རྗེས་བཀའ་བློན་མཆོག་གིས་གསུང་བཤད་གནང་དོན། སྤྱིར་བཏང་བྱས་ན་ང་རང་ཨིན་ཡུལ་དུ་ཡོང་རྒྱུའི་འཆར་གཞི་མེད། འོན་ཀྱང་དེ་རིང་འདིར་བོད་མི་མང་པོ་ཞིག་བསླེབས་འདུག འདི་ག་གནས་སྡོད་ས་གནས་བོད་མི་ཚོས་བོད་མིའི་ཐུན་མིན་ཆོས་དང་རིག་གཞུང་མི་ཉམས་རྒྱུན་འཛིན་གང་ལེགས་གནང་ཐུབ་པ་བྱུང་བ་དེར་ང་རང་ཧ་ཅང་དགའ་པོ་བྱུང།
ཞེས་སོགས་ཀྱི་གསུང་བཤད་གནང་བ་མ་ཟད།
བཀའ་ཁྲི་མཆོག་གིས་འདི་ལོ་༸གོང་ས་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུང་སྐར་སྲུང་བརྩི་གཟབ་རྒྱས་ངང་ཞུ་རྒྱུའི་བཀའ་ཤག་གི་འཆར་གཞི་ལྟར་བཀའ་བློན་རྣམ་པ་ཕྱི་རྒྱལ་ཡུལ་གྲུ་ཁག་ཏུ་ཆེད་ཕེབས་ཀྱིས་འབྲེལ་ཡོད་བོད་རིགས་རྣམས་ལ་ཐུག་འཕྲད་བྱེད་དགོས་པའི་ལམ་སྟོན་གནང་ཡོད་པ་སོགས་གསལ་བཤད་གནང་བ་མ་ཟད། བཀའ་ཁྲི་བློ་བཟང་སེང་གེ་མཆོག་གིས་ལམ་སྟོན་འོག་སྐབས་བཅུ་བཞི་པའི་བཀའ་ཤག་གི་འཆར་གཞི་དང་ད་བར་གྲུབ་འབྲས་ཇི་བྱུང་སོགས་ངོ་སྤྲོད་གནང་ཡོད། ཕྱོགས་མཚུངས་དེང་སྐབས་བོད་ནང་བོད་མི་གཞོན་སྐྱེས་ཚོའི་ཁྲོད་བོད་མི་རིགས་ཀྱི་ལ་རྒྱ་དང་ཆོད་སེམས། སྙིང་སྟོབས་སོགས་ཞུམ་པ་མེད་པར་གནས་ཐུབ་ཡོད་པ་ནི་ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོ་བྱུང་བ་དང། བོད་མིའི་འཐབ་རྩོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གུང་ཁྲན་སྲིད་གཞུང་ལས་རྒྱ་མི་རིགས་ལ་ངོ་རྒོལ་བྱས་པ་དེ་འདྲ་རྩ་བ་ནས་མིན་པ་དང། ད་བར་བོད་ནང་དུ་རྒྱ་ནག་དམར་པོའི་སྲིད་གཞུང་གི་རྒྱལ་དར་དམར་པོའི་འོག་འཚར་ལོངས་བྱས་པའི་བོད་མི་ ༤༣ གྱི་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་མིའི་ཐོག་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱས་ཡོད། དེར་བརྟེན་རྒྱ་ནག་གཞུང་གིས་བོད་ནང་སྤྱི་ཚོགས་རིང་ལུགས་ཀྱི་ལྷ་ཡུལ་བསྐྲུན་ཡོད་ཟེར་བའི་བསྒྲགས་གཏམ་དེ་དག་དྲང་བདེན་རྩ་བ་ནས་མིན་པ་ར་སྤྲོད་གསལ་པོ་བྱུས་ཡོད། བཀའ་ཤག་གིས་འཚེ་མེད་ཞི་བའི་ལངས་ཕྱོགས་བརྟན་པོའི་ཐོག་ནས་དབུ་མའི་ལམ་གྱི་ཐབས་ལམ་ལ་མཐའ་གཅིག་ཏུ་རྒྱབ་སྐྱོར་གྱིས་རྒྱ་ནག་འགོ་ཁྲི་ཚོ་དང་ལྷན་གྲོས་མོལ་བྱ་རྒྱུ་ཡུལ་དུས་གང་གི་ཆ་ནས་གྲ་སྒྲིག་ཨང་གསར་ཡོད་སྐོར་གསལ་བཤད་གནང་ཡོད།
གཞན་ཡང་ཆོས་རིག་བཀའ་བློན་མཆོག་གིས་བོད་མིའི་སྒྲིག་འཛུགས་དེ་བཞིན་མང་གཙོའི་ལམ་ནས་འོས་འདེམས་བྱས་པའི་ཁྲིམས་མཐུན་གྱི་སྒྲིག་འཛུགས་ཤིག་མཚོན་བཞིན་ཡོད་པ་ནན་བརྗོད་གནང་ཡོད། ཅེས་གསུང་བཤད་གནང་གྲུབ་རྗེས་ཆོས་རིག་བཀའ་བློན་མཆོག་གིས་མང་ཚོགས་ཀྱི་དྲི་བར་ལན་འདེབས་གནང་། སྐབས་དེར་བོད་མི་ཁག་གཅིག་ལ་དཔྱ་ཁྲལ་ལག་དེབ་གསར་པ་ཐོབ་རྒྱུར་དཀའ་ངལ་འཕྲད་བཞིན་པ་དང། འདི་ལོ་རྒྱལ་སྤྱིའི་ཨོ་ལེམ་པིཀ་རྩེད་འགྲན་ཆེན་མོའི་སྐབས་རྒྱ་ནག་རྩེད་འགྲེན་པ་ཚོར་ཨིན་ཡུལ་གནས་སྡོད་བོད་རིགས་ཚོས་ཞི་རྒོལ་བྱེད་དགོས་མིན། དེ་བཞིན་བཙན་བྱོལ་བོད་མིའི་སློབ་གྲྭའི་ཤེས་ཡོན་གྱི་གནས་སྟངས། སྐུ་ཚབ་རྣམ་གཉིས་ནས་དགོངས་པ་ཞུས་རྗེས་བོད་རྒྱ་གྲོས་མོལ་གྱི་ད་ལྟའི་གནས་བབ་སོགས་ཀྱི་སྐོར་གྱི་དྲི་བ་ཕུལ་བར་ལན་འདེབས་གནང་ཡོད། ཆོས་རིག་བཀའ་བློན་མཆོག་ཨིན་ཡུལ་དུ་གཟིགས་སྐོར་སྐབས་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱང་ཆེད་བཅར་ཞུས་ཡོད་པ་བཅས།།
