༢༠༡༢ ཟླ་ ༧ ཚེས་ ༤ རེས་གཟའ་མིག་དམར།
༄༅། །ཉེ་ཆར་ཀུན་གཟིགས་པཎ་ཆེན་སྐུ་ཕྲེང་བཅུ་པ་བློ་བཟང་འཕྲིན་ལས་ལྷུན་འགྲུབ་ཆོས་ཀྱི་རྒྱལ་མཚན་མཆོག་གི་མ་ཡུམ་ཆེན་བསོད་ནམས་སྒྲོལ་མ་མཆོག་སྐུ་ཚེའི་འཕེན་པ་རྫོགས་པར་བརྟེན།
མདོ་སྨད་དབུས་རྒྱུན་ལས་ཁང་དང་རྡ་སའི་ས་གནས་རྒྱུན་ལས་གཉིས་ཀྱིས་གོ་སྒྲིག་འོག་ཕྱི་ལོ་ ༢༠༡༢ ཟླ་ ༧ ཚེས་ ༣ འཛམ་གླིང་སྤྱི་བསངས་ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག གཞུང་དམངས་གཉིས་ཀྱིས་ཀུན་གཟིགས་པཎ་ཆེན་རིན་པོ་ཆེ་མཆོག་གི་མ་ཡུམ་དམ་པར་གདུང་སེམས་མཉམ་སྐྱེ་མཚོན་ཆེད་དགོངས་རྫོགས་ཀྱི་མཆོད་འབུལ་སྨོན་ཚོགས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ པའི་ཐོག་མགོན་པོ་གང་ཉིད་མཆོག་ཕོ་བྲང་ནས་ཐེག་ཆེན་ཆོས་གླིང་གཙུག་ཁང་དུ་མཆོད་འབུལ་སྨོན་ལམ་གྱི་ཚོགས་མགོན་དུ་ཆིབས་སྒྱུར་བསྐྱངས་ཏེ་བཞུགས་ཁྲིར་༸ཞབས་སོར་འཁོད་གྲུབ་མཚམས་མདོ་སྨད་དབུས་རྒྱུན་ལས་ཀྱི་ཚོགས་གཙོ་བསྟན་པའི་དངོས་གྲུབ་ལགས་ཀྱིས་མནྜལ་རྟེན་གསུམ་འདེགས་འབུལ་ཞུས་ཡོད། དེ་ནས་མཆོད་འབུལ་སྨོན་ལམ་དུ་ལྷན་ཞུགས་ཀིརྟི་རིན་པོ་ཆེ་མཆོག་དང་། བ་རི་རིན་པོ་ཆེ་མཆོག སྟག་ལུང་ཞབས་དྲུང་རིན་པོ་ཆེ་མཆོག བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་གིས་དབུས་ཁྲིམས་ཞིབ་པ་གཞན་མཆོག བཀའ་བློན་ཁྲི་པ་བློ་བཟང་སེང་གེ་མཆོག་དང་ཕྱག་རོགས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་སྦྲེལ་པོ་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ།
སྲི་ཞུའི་ལས་བྱེད་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ་དང་གློ་བུར་ལྷགས་པའི་དགེ་བཙུན་སྔགས་གསུམ། མི་མང་དང་ཕྱི་རྒྱལ་བ་བཅས་ཁྱོན་མི་གྲངས་ ༤༠༠༠ བརྒལ་བ་འདུ་འཛོམས་ཀྱིས་བླ་མ་མཆོད་པའི་ཚོགས་མཆོད་དང་འབྲེལ་སྨོན་ལམ་གསུང་འདོན་གནང་མུར་རྣམ་གྲྭའི་དགེ་བསྐོས་ནས་མདོ་སྨད་དབུས་རྒྱུན་ལས་ཁང་དང་རྡ་ས་ས་གནས་རྒྱུན་ལས་གཉིས་ཀྱི་སྐྱབས་ཐོ་སྒྲོགས་སྦྱང་གནང་རྗེས་མུ་མཐུད་སྨོན་ལམ་གསུང་འདོན་གནང་ཡོད། དེ་བཞིན་མདོ་སྨད་དབུས་རྒྱུན་ལས་ཁང་དང་རྡ་སའི་ས་གནས་རྒྱུན་ལས་ཁང་གཉིས་ཀྱིས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་དགེ་བཙུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ ཕུལ་ཡོད། ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་གི་མ་ཡུམ་དམ་པ་མཆོག་ཟླ་འདིའི་ཕྱི་ཚེས་ ༢༩ ཟི་ལིང་དུ་སྐུ་གཤེགས་སྐབས་དགུང་གྲངས་ ༩༧ ཡིན་འདུག་པ་བཅས། །
