༢༠༡༢ ཟླ་ ༦ ཚེས་  ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༩ ཉིན་ཧོང་ཀོང་ཁུལ་གྱི་བོད་དོན་རྒྱབ་སྐྱོར་བ་ཚོགས་ཁག་གཉིས་ནས་རྒྱ་ནག་གཞུང་གི་བོད་མི་རིགས་རྩ་མེད་གཏོང་རྒྱུའི་སྲིད་བྱུས་ལ་ངོ་རྒོལ་ཆེད་ལས་འགུལ་སྤེལ་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཧོང་ཀོང་དུ་རྟེན་གཞི་བྱས་པའི་ཧོང་ཀོང་དང་བོད་མཉམ་བསྐྱོད་ཚོགས་པ་(UNFAT)ཞེས་པའི་བོད་དོན་རྒྱབ་སྐྱོར་ཚོགས་པའི་ཧོང་ཀོང་ས་གནས་ཡན་ལག་ཚོགས་པ་གཉིས་ཀྱིས་རྒྱ་གཞུང་ནས་བོད་མི་རིགས་རྩ་མེད་བཟོ་བའི་སྲིད་བྱུས་ལ་ངོ་རྒོལ་ཆེད་ཧོང་ཀོང་དང་རྒྱ་ནག་མཉམ་འབྲེལ་ལས་ཁུངས་ཀྱི་མདུན་དུ་བོད་ཀྱི་རྒྱལ་དར་དང་ཕྲེད་དར་ཕྱར་ཏེ་རྔམ་སྟོན་གནང་བ་དང་ཆབས་ཅིག་མང་ཚོགས་ཁྲོད་གཏམ་བཤད་ཀྱི་ལས་འགུལ་རྒྱ་ཆེ་ཞིག་སྤེལ་འདུག
ལས་འགུལ་འགོ་ཁྲིད་གནང་མཁན་གྱིས་སྐབས་དེར་གསུང་བཤད་གནང་དོན། རྒྱ་ནག་གཞུང་གི་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་མུས་རེད། རྒྱ་ནག་གཞུང་གིས་རྒྱ་ནག་དང་བོད་ནང་གི་གསར་འགྱུར་བརྒྱུད་ལམ་ཁག་དང་མི་མང་གི་གཞི་རྩའི་རང་དབང་ལ་བཀག་སྡོམ་བྱས་པ་མ་ཟད། བོད་ཀྱི་ཆོས་དང་རིག་གཞུང་རྩ་མེད་གཏོང་རྒྱུའི་སྲིད་བྱུས་མུ་མཐུད་འཛིན་བཞིན་ཡོད། དེ་བཞིན་བོད་ནང་གི་རང་བྱུང་གཏེར་ཁ་གང་བྱུང་སྔོག་འདོན་བྱས་ཏེ་ཁོར་ཡུག་གཏོར་བཤིག་གཏོང་གི་ཡོད། རྒྱ་ནག་ནང་ཁུལ་དང་བོད་གཙོ་བོར་གྱུར་བའི་གྲངས་ཉུང་མི་རིགས་ཁག་ལ་གནོད་འཚེ་བཟོ་རྒྱུའི་སྲིད་བྱུས་ལག་བསྟར་བྱས་པ་སོགས་ལ་ང་ཚོས་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། དེ་བཞིན་བོད་མི་མང་དང་རྒྱ་ནག་མི་མང་། ཧོང་ཀོང་མི་མང་སོགས་ཀྱིས་རང་ཉིད་ཀྱི་ཁེ་དབང་སྲུང་སྐྱོབ་བྱས་ཏེ་རྒྱ་ནག་དབང་ཆ་གཅིག་སྡུད་རིང་ལུགས་ཀྱི་དྲག་པོའི་བྱ་སྤྱོད་ལ་ངོ་རྒོལ་མཐའ་གཅིག་ཏུ་བྱེད་དགོས་ཞེས་གསུང་བཤད་གནང་འདུག་པ་བཅས། །