༢༠༡༢ ཟླ་ ༦ ཚེས་ ༡ རེས་གཟའ་པ་སངས།
༄༅། །སྐབས་ ༡༥ པའི་བོད་མི་མང་ས་སྐྱའི་ཆོས་བརྒྱུད་ཀྱི་སྤྱི་འཐུས་མཁན་པོ་ཆོས་གྲགས་རྒྱ་མཚོ་ལགས་ཀྱིས་ཕྱི་ལོ་ ༢༠༡༢ ཟླ་ ༥ ཚེས་ ༢༤ ཉིན་སྤྱི་ལྷན་ཚོགས་གཙོ་མཆོག་གི་མཚན་ཐོག་ཏུ་ཞུ་སྙན་ཕུལ་ཏེ། ཁོང་རང་གཟུགས་གཞི་བདེ་མིན་དང་སྨན་པའི་ལམ་སྟོན་ལྟར་ལས་དོན་ཆེ་རིགས་མཚམས་འཇོག་གིས་སྨན་བཅོས་གནང་འཆར་ཆེད་སྤྱི་འཐུས་ནས་རྩ་དགོངས་ཞུས་ཡོད། དེར་བརྟེན་སྤྱི་ཟུར་དགེ་བཤེས་ག་ཟི་ཚེ་རིང་པོ་ལགས་སྒུག་ཐོ་དང་པོ་ཡིན་པར་བརྟེན་ཕྱི་ལོ་ ༢༠༡༢ ཟླ་ ༦ ཚེས་ ༡ ཉིན་གྱི་སྔ་དྲོ་ཆུ་ཚོད་ ༡༠།༡༥ བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་མདུན་དུ་དམ་འབུལ་ཞུས་ཡོད།
དེ་ཡང་གོང་ཚེས་ཉིན་བོད་མི་མང་སྤྱི་འཐུས་རྒྱུན་ལས་རྣམ་པ་ཚོགས་དྲུང་ལས་ཁུངས་སུ་་ལྷན་འཛོམས་ཀྱི་ཐོག་མར་ཚོགས་གཙོ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེའི་དྲུང་དུ་གུས་ཕྱག་དང་མཇལ་དར་སྒྲོན་འབུལ་ཞུས་ཡོད། དེ་རྗེས་སྤྱི་ཟུར་དགེ་བཤེས་ག་ཟི་ཚེ་རིང་པོ་ལགས་ཀྱིས་ཀྱང་དེ་མཚུངས་ཞུས་གྲུབ་མཚམས་སྤྱི་འཐུས་ཚོགས་གཙོའི་མདུན་དུ་ལས་ཁུར་དམ་འབུལ་ཞུས་ཡོད། དེ་ནས་སྤྱི་འཐུས་ཚོགས་གཙོ་མཆོག་དང་ཚོགས་གཞོན་མཆོག་གིས་དབུས་སྤྱི་འཐུས་རྒྱུན་ལས་རྣམ་པ། དེ་བཞིན་ཚོགས་དྲུང་སོགས་ནས་སྤྱི་འཐུས་དགེ་བཤེས་ག་ཟི་ཚེ་རིང་པོ་ལགས་ཀྱིས་སྤྱི་འཐུས་ཀྱི་ལས་ཁུར་དམ་འབུལ་ཞུས་པར་རྟེན་འབྲེལ་མཚོན་ཆེད་དཀར་གཙང་མཇལ་དར་རིམ་བཞིན་བསྒྲོནགྲུབ་མཚམས་གསོལ་ཇ་དང་འབྲས་སིལ་ཕུལ་ཏེ་རྟེན་འབྲེལ་མཛད་སྒོ་སྟབས་བདེ་དེ་བཞིན་གྲོལ་ཡོད་པ་བཅས། །