༢༠༡༢ ཟླ་ ༦ ཚེས་ ༡༩ རེས་གཟའ་མིག་དམར།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱིས་གོ་སྒྲིག་འོག་ལྷོ་ཨ་མི་རི་ཀའི་རྒྱལ་ཁབ་བྷར་སིལ་གྱི་རྒྱལ་ས་རིའོ་ཌི་ཇི་ནི་རིའོ་ (Rio de Janeiro) ནང་དུ་གོ་ལའི་ཁོར་ཡུག་དང་མཐུན་པའི་རྒྱུན་གནས་ཐུབ་པའི་དཔལ་འབྱོར་ཡར་རྒྱས་ཀྱི་འཛུགས་སྐྲུན་ལས་གཞི་དང་འབྲེལ་བའི་རྒྱལ་སྤྱིའི་ལྷན་ཚོགས་ Rio+20 ཞེས་པའི་སྐབས་ཕྱི་དྲིལ་ཁོར་ཡུག་ཚན་པའི་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་ཕྱི་ལོ་ ༢༠༡༢ ཟླ་ ༦ ཚེས་ ༡༨ ཉིན་བོད་ཀྱི་ཁོར་ཡུག་སྐོར་གོ་རྟོགས་རྒྱ་ཆེ་སྤེལ་ཡོད། ལྷན་ཚོགས་སྐབས་ཀྱི་བརྗོད་གཞི་གཙོ་བོ་གཉིས་ཡོད་པ་ནི།
ཁོར་ཡུག་དང་མཐུན་པའི་རྒྱུན་སྲིང་ཕུགས་བརྟན་འཕེར་བའི་དཔལ་འབྱོར་ཡར་རྒྱས་ཐོག་ནས་དབུལ་ཕོངས་ཀྱི་དཀའ་ངལ་སེལ་རྒྱུ་དང། དེ་དོན་ལག་བསྟར་ཆེད་སྒྲིག་གཞི་ཟུར་གསལ་ཐོག་སྒྲིག་འཛུགས་བཀོད་སྒྲིག་བྱ་རྒྱུ་ཡིན་འདུག
ཕྱོགས་མཚུངས་བསྟན་པ་རྒྱལ་མཚན་ལགས་ཀྱིས་ཨིན་ཌོ་ནེ་ཤི་ཡར་རྟེན་གཞི་བྱས་པའི་འཛམ་གླིང་རི་དྭགས་སྲུང་སྐྱོབ་ཐེབས་རྩ་དང་། (World Wildlife Fund) རྒྱ་དགྲམ་ལྗང་ཁུས་ (Green Cross) གོ་སྒྲིག་ཞུས་པའི་རྒྱལ་མཚམས་མེད་པའི་ཆུ་དང་གནམ་གཤིས་བདག་གཅེས་བྱེད་ཕྱོགས། ཞེས་པའི་ལྷན་ཚོགས་ཀྱི་ཞར་བྱུང་ཚོགས་འདུའི་ནང་དུའང་མཉམ་ཞུགས་གནང་སྟེ་མཐོ་སྒང་བོད་ནས་རྒྱུག་བཞིན་པའི་ཨེ་ཤི་ཡའི་རྒྱུག་ཆུ་ཆེ་ཁག་དྲུག་གི་གནས་སྟངས་སྐོར་དང། རྒྱ་ནག་གཞུང་གིས་རྒྱུག་ཆུའི་གཤམ་འོག་ཏུ་གནས་པའི་མི་མང་ཐེར་འབུམ་མང་པོའི་འཚོ་གནས་ཐོག་སེམས་འཚབ་གང་ཡང་མེད་པར་རྒྱུག་ཆུ་དེ་དག་ཐོག་ཆུ་མཛོད་རྒྱག་བཞིན་པའི་སྐོར་གསལ་བཤད་གནང་ཡོད་པ་མ་ཟད། ཁུངས་སྐྱེལ་ཡིག་ཆ་སོགས་ཀྱི་ལམ་ནས་རྒྱུག་ཆུ་དེ་འབྱུང་འགྱུར་གནས་ཐུབ་མིན་ཐད་དངོས་ར་འཕྲོད་པའི་གཏམ་བཤད་གནང་སྐབས་ཚོགས་བཅར་བ་མང་པོས་དཀའ་ངལ་དེ་དག་དངོས་འབྲེལ་ཡིན་པར་བརྟེན་རྒྱབ་སྐྱོར་གྱི་རྣམ་འགྱུར་ཡང་བསྟན་ཡོད། ་
ཐེངས་འདིར་བསྟན་པ་རྒྱལ་མཚན་ལགས་ལ་ལྕམ་སྐུ་རུ་ཐི་སལ་ཌན་ཧ་ལགས་ཀྱིས་བརྒྱུད་ (Ruth Saldanha) བྷར་སིལ་ཡུལ་གྱི་ཁོར་ཡུག་བློན་ཆེན་ལྕམ་སྐུ་ཨི་ས་བྷེལ་ལ་ Ms. Izabella Teixeira མཆོག་དང་མཇལ་རྒྱུའི་གོ་སྐབས་བྱུང་ཡོད། སྐབས་དེར་ཁོང་གིས་བློན་ཆེན་མཆོག་ལ་ཕྱི་དྲིལ་ཁོར་ཡུག་ཚན་པས་བོད་ཀྱི་ཁོར་ཡུག་གནས་སྟངས་སྐོར་གྱི་གནས་ཚུལ་ཕྱོགས་སྒྲིག་བྱས་པའི་དཔེ་དེབ་གཅིག་ཀྱང་ཕུལ་ཏེ་གསལ་བཤད་གནང་ཡོད།
ཡང་ཁོང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡུན་གནས་ཐུབ་པའི་དཔལ་འབྱོར་འཛུགས་སྐྲུན་ལྷན་ཚོགས་ཀྱི་སྤྱི་ཁྱབ་དྲུང་ཆེ་རྒྱ་རིགས་སྐུ་ཞབས་ཧྲ་ཊུ་ཁང་ (Mr. Sha Zhukang) མཇལ་འཕྲད་གནང་སྐབས་ཕྱི་དྲིལ་ཁོར་ཡུག་ཚན་པས་བཀོད་སྒྲིག་གནང་བའི་བོད་ཀྱི་ཁོར་ཡུག་གི་གནས་སྟངས་སྐོར་གྱི་གནས་ཚུལ་ཕྱོགས་བསྡུས་ཀྱི་ལག་དེབ་དེ་ཕུལ་ཐུབ་ཡོད། ཕྱོགས་མཚུངས་ཁོང་གིས་གོ་ལ་འཛིན་སྐྱོང་ཆེད་བཟང་སྤྱོད་ཀྱི་ཁྲིམས་ལུགས་གཏན་འབེབས། ཞེས་པའི་བརྗོད་གཞིའི་ཐོག་ལྷན་ཚོགས་སྐབས་མཉམ་ཞུགས་གནང་སྟེ་རྒྱ་ནག་གཞུང་གིས་བོད་མི་འབྲོག་པ་རྣམས་བཙན་ཤེད་ཀྱིས་གནས་སྤོ་བྱེད་བཅུག་པ་མ་ཟད། སྲིད་བྱུས་དེ་དག་ཁོར་ཡུག་སྲུང་སྐྱོབ་ལ་བསྙད་འདོགས་བྱས་པ་ཞིག་ཡིན་སྐོར་དང། བོད་མི་རྣམས་ལོ་ངོ་སྟོང་ཕྲག་རིང་ནས་འབྲོག་པའི་འཚོ་བ་སྐྱེལ་བཞིན་པ་མ་ཟད། འབྲོག་པའི་སྐྱས་སྤོས་བྱ་རྒྱུའི་གོམས་སྲོལ་དེས་ཁོར་ཡུག་ལ་ཕན་པ་ལས་གནོད་པ་གང་ཡང་བཟོ་ཡི་མེད་སྐོར་ཞིབ་ཕྲ་གསལ་བཤད་གནང་ཡོད།
གཞན་ཡང་སྐུ་ཞབས་བསྟན་པ་རྒྱལ་མཚན་ལགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་དང་གཞུང་འབྲེལ་མིན་པའི་ཚོགས་པ་ལྔས་གོ་སྒྲིག་ཞུས་པའི་རྒྱ་ནག་ནང་ཁོར་ཡུག་སྲུང་སྐྱོབ་ཀྱི་ལས་གཞི་ལག་བསྟར་ཐུབ་བམ། ཞེས་པའི་ཞར་བྱུང་ལྷན་ཚོགས་སུ་ཕེབས་རྗེས་རྒྱ་རིགས་ཁོར་ཡུག་དོན་གཉེར་བ་གཞོན་སྐྱེས་ཁག་གཅིག་དང་ཐུག་སྟེ་མཐོ་སྒང་བོད་ཀྱི་ཁོར་ཡུག་སྲུང་སྐྱོབ་ཐོག་ལས་གཞི་ཇི་སྤེལ་ཐུབ་པའི་སྐོར་གྲོས་མོལ་གནང་ཡོད། སྤྱིར་བསྟན་པ་རྒྱལ་མཚན་ལགས་ཀྱིས་ལྷན་ཚོགས་ཐོག་མར་འགོ་འཛུགས་ཀྱི་ཉིན་གྲངས་འགའ་ཤས་རིང་རྒྱལ་ཁབ་འདྲ་མིན་གྱི་སྐུ་ཚབ་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་མང་པོ་དང་ཐུག་འཕྲད་གནང་ཡོད།
ཕྱི་ཚེས་ ༡༩ ཉིན་བསྟན་པ་རྒྱལ་མཚན་ལགས་ཀྱིས་ལྷན་ཚོགས་ཤིག་ཏུ་སླར་ཡང་མཐོ་སྒང་བོད་ཀྱི་གནམ་གཤིས་སྐོར་གསལ་བཤད་དང་གོ་རྟོགས་རྒྱ་ཆེ་སྤེལ་རྒྱུ་ཡིན་འདུག་པ་བཅས།།
