༢༠༡༢ ཟླ་ ༦ ཚེས་ ༢༨ རེས་གཟའ་ཕུར་བུ།

༄༅། །རྒྱ་གར་གྲོས་ཚོགས་གོང་མའི་འཐུས་མི་བཅུ་རྡ་སར་ཕེབས་ཡོད་པ་རྣམས་ནི། ལྕམ་སྐུ་མ་ཡཱ་སིངྒ་མཆོག་དང་ Maya Singh དང་། སྐུ་ཞབས་བྷཱ་ར་ཏི་ཀུ་མཱར་རོ་ཌི་མཆོག Dr. Bharat Kumar Raut, སྐུ་ཞབས་རཱ་མ་ལིང་གམ་མཆོག Dr. K.P. Ramalingam, སྐུ་ཞབས་ར་བི་ནཱ་རཱ་ཡན་མོ་ཧ་པ་ཏྲ་མཆོག Rabinarayan Mohapatra, སྐུ་ཞབས་བྷུ་པེན་དར་ཡཱ་ཌོ་མཆོག Bhupender Yadav, སྐུ་ཞབས་ཨེ་ཧ་མ་ཌ་ས་ཡི་ཌི་མ་ལི་ཧ་བྷ་ཌི་མཆོག Ahmad Saeed Malihabadi, སྐུ་ཞབས་ ཤན་ཏཱ་རམ་ནེཀ་མཆོག Shantaram Naik, སྐུ་ཞབས་ཇེ་སུ་ད་སུ་ས་ལིམ་མཆོག Jesudasu Seelam, སྐུ་ཞབས་ཨ་ལི་ཨན་ཝར་ཨན་སཱ་རི་མཆོག Ali Anwar Ansari, སྐུ་ཞབས་ཇ་ནར་དན་ཝག་མཱ་རེ་མཆོག Dr. Janardhan Waghmare  བཅས་ཡིན་ཞིང། ཁོང་རྣམས་ནི་གྲོས་ཚོགས་ཀྱི་ཚོགས་ཆུང་ཞིག་གི་ལས་དོན་ཆེད་བཞུགས་སྒར་རྡ་ས་འབྱོར་བར་ Punjab national bank  པན་ཇབ་དངུལ་ཁང་དང་འབྲེལ་ལམ་བརྒྱུད་ཕྱི་ཟླ་ ༦ ཚེས་ ༢༥ ཉིན་གྱི་དགོང་མོར་བོད་ཀྱི་ཟློས་གར་ཚོགས་ཁང་དུ་ཁོང་རྣམས་ལ་གཟིགས་མོ་ཕུལ་བ་དང་སྐབས་དེར་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་མཇལ་དར་སྒྲོན་འབུལ་གྱི་སྣེ་ལེན་ཞུས་ཡོད། གཟིགས་མོ་གྲུབ་རྗེས་ཁོང་རྣམ་པ་ཚང་མས་བོད་ཀྱི་རིག་གཞུང་ཞབས་བྲོ་ཁག་ལ་བསྔགས་བརྗོད་དང་ཐུགས་རྗེ་ཆེ་ཞུས་ཡོད། ཕྱི་ཚེས་ ༢༦ ཉིན་དངོས་སུ་གངས་སྐྱིད་སྤྱི་འཐུས་ལྷན་ཁང་དུ་ཡོང་གི་ཡིན་ཞེས་གསུངས་པ་ལྟར་ཕྱི་ཚེས་ ༢༦ ཉིན་གྲོས་ཚོགས་གོང་མའི་འཐུས་མི་ཁག་གཅིག་ཆེད་ཕེབས་གནང་བར་བོད་མི་མང་སྤྱི་འཐུས་རྒྱུན་ལས་ཀྱིས་ཕེབས་བསུའི་སྣེ་ལེན་ཞུས་པ་དང་བོད་དོན་སྐོར་ངོ་སྤྲོད་ཀྱི་བཞུགས་མོལ་གནང་ཡོད་པ་བཅས།།