༢༠༡༢ ཟླ་ ༦ ཚེས་ ༢༧ རེས་གཟའ་ལྷག་པ།
༄༅། །འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ཕྱི་ལོ་ ༢༠༡༢ ཟླ་ ༦ ཚེས་ ༢༧ ཉིན་གྱི་སྔ་དྲོ་ཆུ་ཚོད་ ༨ པའི་ཐོག་རྡ་ས་ནས་ཌལ་ཧོར་དུ་ཕེབས་ཐོན་གྱིས་ཕྱེད་ཡོལ་ཆུ་ཚོད་ ༢ པའི་ཐོག་མི་མང་ལ་འཕྲོད་བསྟེན་སྐོར་ལམ་སྟོན་གསུང་བཤད་གནང་ཡོད། དེ་བཞིན་ལྷན་བཅར་སྨན་པ་བསོད་ནམས་དོན་གྲུབ་ལགས་ཀྱིས་ཌལ་ཧོར་གཏན་འཇགས་སློབ་གྲྭའི་སློབ་ཕྲུག་རྣམས་ཀྱི་གཟུགས་གཞིར་བརྟག་དཔྱད་གནང་ཡོད། ཕྱི་ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བཀའ་བློན་མཆོག་གིས་གཏན་སློབ་ཀྱི་སློབ་ཕྲུག་རྣམས་ལ་འཕྲོད་བསྟེན་དང་འབྲེལ་བའི་ལམ་སྟོན་གསུང་བཤད་གནང་རྒྱུ་མ་ཟད། སློབ་གྲྭར་གཟིགས་སྐོར་ཡང་གནང་རྒྱུ་ཡིན་འདུག
ཕྱོགས་མཚུངས་སྨན་པ་བསོད་ནམས་དོན་གྲུབ་ལགས་ཀྱིས་འཕྲོད་བསྟེན་དང་འབྲེལ་བའི་སྐོར་སློབ་གསོ་དང་མི་མང་ཚོར་གཟུགས་གཞི་བརྟག་དཔྱད་གནང་རྒྱུ་ཡིན་འདུག དེ་བཞིན་བཀའ་བློན་མཆོག་གིས་ས་གནས་ཀྱི་བོད་རིགས་གནད་ཡོད་མི་སྣ་ཁག་ལ་ཐུག་འཕྲད་གནང་གྲུབ་མཚམས་རྡ་སར་ཕྱིར་ཕེབས་གནང་རྒྱུ་ཡིན་འདུག་པ་བཅས། །