༢༠༡༢ ཟླ་ ༦ ཚེས་ ༢༡ རེས་གཟའ་ཕུར་བུ།

༸གོང་ས་མཆོག་གི་ཕྱག་གཡས་སུ་ཚོགས་གཙོ་མཆོག སྐུ་པར་སྐུ་སྒེར་ཡིག་ཚང་ནས།

༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཇིའི་རྒྱལ་ས་ལོན་ཌོན་དུ་ཉིན་མཐའ་མའི་མཛད་འཕྲིན་སྐབས་ཐོག་མར་དཔལ་འབྱོར་རིག་པའི་སློབ་གཉེར་ཁང་དུ་ (London School Of Economics) ཆིབས་སྒྱུར་བསྐྱངས་ཏེ་བཟོད་བསྲན་སྐོར་དགེ་ལས་སློབ་ཕྲུག་རྣམས་ལ་བཀའ་སློབ་སྩལ།

དེ་རྗེས་ཝེ་སི་མིན་སི་ཊར་ཨེ་བྷེ་ཡི་སྙན་གྲགས་ཆེ་བའི་ཡི་ཤུའི་མཆོད་ཁང་ (Westminster Abbey) དུ་ཆོས་ལུགས་རིས་མེད་ཀྱི་དབུ་ཁྲིད་ཁག་གཅིག་དང་ལྷན་ཆོས་ལུགས་མཐུན་སྒྲིལ་ཆེད་སྨོན་ལམ་གསུང་འདོན་མཛད་རྗེས་བཀའ་སློབ་སྩལ།

དེ་ནས་༸གོང་ས་མཆོག་ལ་དབྱིན་ཇིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཇོན་བྷེར་ཀོ་ (John Bercow) མཆོག་གིས་གསོལ་སྟོན་འབུལ་ལམ་ཞུས་ཡོད། དེ་རྗེས་༸གོང་ས་མཆོག་གིས་དབྱིན་ཇིའི་གྲོས་ཚོགས་ཀྱི་ཟ་འབྲུ་དང་བདེ་འཇགས་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་ལྟར་དབྱིན་ཇིའི་གྲོས་ཚོགས་ཀྱི་ཚོགས་ཁང་ཞིག་ཏུ་ཆིབས་སྒྱུར་བསྐྱངས་ཏེ་བཀའ་སློབ་སྩལ།

ཕྱོགས་མཚུངས་ཉིན་དེར་༸གོང་ས་མཆོག་དང་དབྱིན་ཇིའི་རྒྱལ་སྲས་པི་རིན་སི་ཅལ་སི་མཆོག་དང་ཁོང་གི་སྐུ་ཟླ་ལྕམ་སྐུ་ཀེ་མི་ལ་མཆོག་རྣམ་གཉིས་དང་མཇལ་འཕྲད་མཛད་ཡོད།

དེ་ཡང་ཁུལ་དེའི་མཛད་འཕྲིན་ཁག་ལེགས་པར་གྲུབ་རྗེས་༸གོང་ས་མཆོག་སི་ཀོ་ཊ་ལན་ཌིར་(Scotland) ཆིབས་ཞལ་བསྒྱུར་ཏེ་ཕྱི་ཚེས་ ༢༢ ཉིན་ཁུལ་དེའི་རྒྱལ་ས་ཨི་ཌེན་བྷག་ (Edinburgh)
གི་ཨུ་ཤར་ཚོགས་ཁང་དུ་ (Usher Hall) ཆོས་ལུགས་ཀྱི་རྒྱ་ལས་བརྒལ་བའི་བཟང་སྤྱོད་སྐོར་བཀའ་སློབ་སྩལ་རྒྱུ་ཡིན་འདུག་པ་བཅས།།