༢༠༡༢ ཟླ་ ༦ ཚེས་ ༢༧ རེས་གཟའ་ལྷག་པ།
སྐུ་པར་ཇེ་རེ་མི་ར་སེལ་ནས།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཕྱོགས་ཨི་ཊ་ལིར་རྟེན་གཞི་བྱས་པའི་མ་ཊེ་རའི་ (Matera) གྲོང་ཁྱེར་གྱི་ཉེ་འདབས་སུ་ལྕམ་སྐུ་བྷེ་ཊི་ཝིལ་ཡེམ་སི་མཆོག་གིས་གསར་འཛུགས་གནང་བའི་ཞི་བའི་གྲོང་། ཞེས་པ་དེར་འཚམས་གཟིགས་སོགས་ཁུལ་དེའི་མཛད་འཕྲིན་རྣམས་ཡོངས་སུ་ལེགས་གྲུབ་ཀྱིས་བྱང་ཕྱོགས་ཨི་ཊ་ལིའི་གྲོང་ཁྱེར་མི་ལན་ནོར་(Milano) ཆིབས་སྒྱུར་བསྐྱངས་ཏེ་གྲོང་ཁྱེར་དེའི་སི་ཊི་ཧོལ་ (City Hall) ཞེས་པ་དེར་༸ཞབས་སོར་བདེ་བར་འཁོད་ཡོད། སྐབས་དེར་མི་ལན་ནོའི་གྲོང་སྡེའི་སྤྱི་ཁྱབ་པ་སྐུ་ཞབས་ཇུ་ལི་ཡ་ནི་པི་ས་པི་ཡ་ (Giuliani Pisapia) མཆོག་གིས་ཕེབས་བསུ་གཟབ་རྒྱས་ཞུས་ཡོད།
སྐུ་པར་ཇེ་རེ་མི་ར་སེལ་ནས།
སྐུ་པར་ཇེ་རེ་མི་ར་སེལ་ནས།
དེ་རྗེས་༸གོང་ས་མཆོག་གིས་མི་ལ་ནོའི་གྲོང་སྡེའི་ལྷན་ཚོགས་ཀྱི་ཚོགས་མི་རྣམས་ལ་བཀའ་སློབ་སྩལ་དོན། གྲོང་སྡེ་སྤྱི་ཁྱབ་པ་མཆོག་དང་གྲོང་སྡེ་ལྷན་ཚོགས་ཀྱི་ཚོགས་གཙོ་མཆོག དེ་བཞིན་ཆོས་གྲོགས་ཕོ་མོ་བཅས་ལ་འཚམས་འདྲི་ཞུ་རྒྱུ་ཡིན། ངོས་ཀྱིས་རྣམ་པ་ཚོའི་ཐོབ་གོ་སའི་མིང་ནས་མ་འབོད་པར་ཆོས་གྲོགས་ཕོ་མོ་ཞེས་འབོད་རྒྱུ་དེ་ནི། ཐོབ་གོ་ས་དེ་དག་དུས་ཡུན་ལོ་འགའ་ཤས་རིང་ལས་ཐོབ་རྒྱུ་མིན་པ་དང།
ཆོས་གྲོགས་ཕོ་མོའི་འདུ་ཤེས་དེ་ནི་ང་ཚོ་སྐྱེས་པ་ནས་བཟུང་མ་འཆི་བར་གནས་རྒྱུ་ཡིན། ངོས་ཀྱིས་དེང་སྐབས་དཔལ་འབྱོར་ཐོག་དཀའ་ངལ་འཕྲད་བཞིན་པ་རྣམས་ཀྱིས་མ་འོངས་པར་ལྟ་ཕྱོགས་དེ་ཧ་ལམ་རེ་བ་མེད་པ་ལྟ་བུ་ཡོད་པ་གོ་ཐོས་བྱུང།
སྐུ་པར་ཇེ་རེ་མི་ར་སེལ་ནས།
ལྟ་སྟངས་དེ་ནི་ནོར་བ་ཞིག་ཡིན། དུས་རབས་ ༢༠ ནང་བཟང་ཕྱོགས་ཀྱི་འགྱུར་བ་མང་པོ་ཕྱིན་ཡོད་པར་བརྟེན། རེ་བ་བཟང་ས་ནས་རྒྱག་རྒྱུའི་རྒྱུ་མཚན་མང་པོ་ཡོད། ཅེས་སོགས་ཀྱི་བཀའ་སློབ་སྩལ།
དེ་རྗེས་༸གོང་ས་མཆོག་ཁུལ་དེར་རྟེན་གཞི་བྱས་པའི་དགེ་འཕེལ་གླིང་ཆོས་ཚོགས་སུ་ཆིབས་སྒྱུར་བསྐྱངས། སྐབས་དེར་ཆོས་ཚོགས་ཀྱི་དབུ་བླ་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག་གིས་༸གོང་ས་མཆོག་སྟོན་འཁོར་དང་བཅས་པར་སྣེ་ལེན་གྱིས་ཕེབས་བསུ་གཟབ་རྒྱས་ཞུས་ཡོད། ༸གོང་ས་མཆོག་ལ་སྐབས་དེར་ཆོས་ཚོགས་སུ་ནང་ཆོས་ནས་གསུངས་པའི་གྲུབ་མཐའི་རྣམ་གཞག་ལ་སློབ་སྦྱོང་བྱེད་བཞིན་ཡོད་སྐོར་སྙན་སྒྲོན་ཞུ་སྐབས། མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་གནའ་བོའི་རྒྱ་གར་གྱི་སྲོལ་རྒྱུན་ནང་ཆོས་ལུགས་གཞན་གྱི་གྲུབ་མཐར་དོ་སྣང་ཙམ་མིན་པར་སློབ་སྦྱོང་བྱ་རྒྱུའི་གོམས་སྲོལ་ཡོད་པ་དེ་དག་བསྔགས་འོས་སུ་གྱུར་བ་ཞིག་ཡིན་པར་བརྟེན། མིག་དཔེ་ལེན་ཐུབ་པ་དགོས་སྐོར་དང་།
སྐུ་པར་ཇེ་རེ་མི་ར་སེལ་ནས།
གྲུབ་མཐའ་དང་བློ་སྦྱོང་ལ་སློབ་སྦྱོང་བྱེད་སྐབས་སེམས་ཀྱི་རྣམ་གཞག་དང་འབྲེལ་བ་ཡོད། གཙོ་བོ་སེམས་ལ་བསྒྱུར་བཅོས་གཏོང་རྒྱུ་དེ་ཡིན། དེར་བརྟེན་བསྒྱུར་བཅོས་གཏོང་ཡུལ་དང་གཏོང་མཁན། བསྒྱུར་བཅོས་གཏོང་ཐབས་བཅས་ཚང་མ་སེམས་རང་ཉིད་ཀྱི་སྟེང་ནས་ཡོང་དགོས་པ་སོགས་སེམས་ལ་ཡང་ཡང་དྲན་སྐུལ་གཏོང་ཐུབ་ཚེ་དགེ་མཚན་ཡོད། ཅེས་སོགས་ཀྱི་བཀའ་སློབ་སྩལ།
ཉིན་གུང་ལྗགས་སྨིན་མཛད་རྗེས་ཕྱེད་ཡོལ་༸གོང་ས་མཆོག་གིས་ཌལ་ཝར་མེ་ཚོགས་ཁང་དུ་ (Dal Verme Theatre) གཙུག་ལག་སློག་སློབ་གྲྭའི་སློབ་ཕྲུག་གྲངས་ ༡༥༠༠ བརྒལ་བར་བཀའ་སློབ་སྩལ་ཡོད་པ་བཅས།།
