༢༠༡༢ ཟླ་ ༦ ཚེས་ ༢༢ རེས་གཟའ་པ་སངས།
སྐུ་པར་ཇེ་རེ་མི་ར་སེལ་གྱིས་བཏང།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་༸གོང་ས་༸སྐྱབས་མགོན་ཆེན་པོ་མཆོག་དབྱིན་ཇིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཇོན་བྷེར་ཀོ་མཆོག་གིས་ཁོང་གི་ལས་ཁུངས་ཀྱི་ཚོགས་ཁང་ཞིག་ཏུ་གདན་འདྲེན་ཞུས་ཏེ་གསོལ་སྟོན་ཞིག་འབུལ་ལམ་ཞུས་ཡོད། སྐབས་དེར་༸གོང་ས་མཆོག་གིས་བོད་དང་ལོ་རྒྱུས་ཐོག་ཡུན་རིང་གི་འབྲེལ་བ་ཟབ་མོ་ཡོད་པའི་དབྱིན་ཡུལ་ནང་མགོན་པོ་གང་ཉིད་མཆོག་ལ་མཛའ་བརྩེ་ལྡན་པའི་གསོལ་སྟོན་འབུལ་ལམ་ཞུས་པར་ཆེ་མཐོང་ཐོབ་པ་ཞིག་བྱུང་ཞེས་ཐུགས་རྗེ་ཆེ་ཞུའི་བཀའ་སློབ་སྩལ།
སྐུ་པར་ཇེ་རེ་མི་ར་སེལ་གྱིས་བཏང།
དེ་རྗེས་༸གོང་ས་མཆོག་གིས་གྲོས་ཚོགས་ཀྱི་ཚོགས་ཁང་དུ་དབྱིན་ཇིའི་གྲོས་ཚོགས་ཀྱི་ཟ་འབྲུ་དང་བདེ་འཇགས་ཚོགས་ཆུང་གི་གྲོས་ཚོགས་འཐུས་མི་བརྒྱ་དང་དགུ་བཅུ་ལྷག་ལ་བཀའ་སློབ་སྩལ་དོན།
ལུས་ལ་ཟས་བཅུད་དགོས་པ་བཞིན་སེམས་ལའང་དེ་མཚུངས་དགོས། གལ་ཏེ་སེམས་ནང་ཞི་བདེ་བག་ཕེབས་མེད་ཚེ་ཕྱིའི་རྒྱུ་དངོས་ཀྱིས་ཕན་ཐོགས་དེ་ཙམ་མེད། དེ་ལས་ལྡོག་སྟེ་ལུས་ལ་དཀའ་ངལ་འཕྲད་སྐབས། གལ་ཏེ་སེམས་ནང་ཞི་བདེ་ཡོད་ན་དཀའ་ངལ་དེར་ལས་སླ་པོའི་ཐོག་ནས་གདོང་ལེན་བྱེད་ཐུབ།
ཅེས་བཀའ་སློབ་སྩལ་བ་དང་སྦྲགས། མགོན་པོ་གང་ཉིད་མཆོག་གིས་འགྲོ་བ་མིའི་ནང་གི་བཟང་སྤྱོད་དང་འབྲེལ་བའི་བྱམས་པ་དང་བརྩེ་བ། བཟོད་བསྲན་སོགས་རིན་ཐང་སྐོར་བཀའ་སློབ་སྩལ་བ་མ་ཟད། དུས་རབས་ ༢༡ འདིའི་ནང་འཛམ་གླིང་མི་རྣམས་དེ་སྔ་ལས་ལྷག་པའི་ཕན་ཚུན་གཅིག་ལ་གཅིག་བརྟེན་དགོས་པ་ཆགས་ཡོད་པར་བརྟེན། བཟང་སྤྱོད་དེ་དག་ཉམས་ལེན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་སོགས་ཀྱི་བཀའ་སློབ་སྩལ། གྲོས་ཚོགས་ནང་གི་མཛད་འཕྲིན་ཁག་ལེགས་པར་གྲུབ་བསྟུན། དབྱིན་ཇིའི་རྒྱལ་སྲས་ཅལ་སི་མཆོག་དང་ཁོང་གི་སྐུ་ཟླ་ཀེ་མི་ལ་མཆོག་རྣམ་གཉིས་མཇལ་འཕྲད་ཆེད་ཀེ་ལེ་རེན་སི་ཧའུ་སིར་ཆིབས་སྒྱུར་བསྐྱངས་ཡོད་པ་བཅས།།
