༢༠༡༢ ཟླ་ ༦ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཇིའི་རྒྱལ་ས་ལོན་ཌོན་དུ་དབྱིན་ཇིའི་གྲོས་ཚོགས་ཀྱི་ཕྱོགས་འགལ་ཚོགས་པའི་ཚོགས་གཙོ་སྐུ་ཞབས་ཨེ་ཌི་མི་ལི་བྷན་ཌི་ Ed Millibandམཆོག་དང་མཇལ་འཕྲད་མཛད་ཡོད།

སྙན་གྲགས་ཆེ་བའི་རོ་ཡལ་ཚོགས་ཁང་ཆེན་མོ།

དེ་ཡང་ཐོག་མར་༸གོང་ས་མཆོག་གིས་རྒྱལ་ས་ལོན་ཌོན་དུ་རྟེན་གཞི་བྱས་པའི་སྙན་གྲགས་ཅན་གྱི་རོ་ཡལ་ཨེལ་བྷ་ཊི་(Royal Albert Hall) ཚོགས་ཁང་ཆེན་མོའི་ནང་༸ཞབས་སོར་འཁོད་དེ་མི་གྲངས་ ༦༠༠༠ ཙམ་ལ་དོན་དམ་གྱི་འགྱུར་བ་ནང་སེམས་ནས་ཡོང་དགོས། ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། ཆོས་གྲོགས་ཕོ་མོ་ཚོ། ངོས་རང་འདིར་ནང་སེམས་ཀྱི་རིན་ཐང་གོང་མཐོར་གཏོང་ཐབས་སྐོར་སྐད་ཆ་ཤོད་རྒྱུའི་གོ་སྐབས་ཐོབ་པར་ཧ་ཅང་དགའ་པོ་བྱུང། རིན་ཐང་དེ་དག་བྱམས་བརྩེའི་བསམ་པར་རག་ལུས་ཡོད། གལ་ཏེ་མིའི་རྣམ་དཔྱོད་དེར་བཟང་སྤྱོད་ཀྱིས་རྒྱབ་རྟེན་བྱེད་མ་ཐུབ་ཚེ་ཕྱི་ལོ་ ༢༠༠༡ ཕྱི་ཟླ་ ༩ ཚེས་ ༡༡ ཉིན་ཨ་རིའི་གྲོང་ཁྱེར་ནིའུ་ཡོཀ་ཏུ་ཨ་རིའི་ཚོང་ལས་ཀྱི་ཁང་ཆེན་གཉིས་འཇིགས་སྐུལ་རིང་ལུགས་པས་རྩ་མེད་བཟོས་པ་སོགས་ཀྱི་གནས་ཚུལ་ཡོང་རྒྱུ་ཡིན་སྐོར་ལུང་འདྲེན་མཛད།
དེ་རྗེས་མང་ཚོགས་ཀྱི་དྲི་བར་བཀའ་ལན་མཛད་ཡོད། ཕྱི་ཚེས་ ༢༠ ཉིན་༸གོང་ས་མཆོག་གིས་ལོན་ཌོན་དཔལ་འབྱོར་ཚན་རིག་གི་སློབ་གྲྭར་ London School of Economics ཆིབས་སྒྱུར་བསྐྱངས་ཏེ་བཟོད་བསྲན་སྐོར་བཀའ་སློབ་སྩལ་རྒྱུ་མ་ཟད། འཛམ་གླིང་ནང་སྙན་གྲགས་ཆེ་བའི་ཝེ་སི་མིན་སི་ཊར་ཨེ་བྷེ་ཟེར་བའི་ཡི་ཤུའི་མཆོད་ཁང་དེར་ཆོས་ལུགས་མཐུན་སྒྲིལ་གྱི་ལྷན་ཚོགས་སུ་ཆིབས་སྒྱུར་བསྐྱངས་རྗེས། ཝེ་སི་མིན་སི་ཊར་རྒྱལ་ཁང་ནང་དུ་དབྱིན་ཇིའི་གྲོས་ཚོགས་འཐུས་མི་རྣམས་དང་མཇལ་འཕྲད་མཛད་རྒྱུ་ཡིན་འདུག་པ་བཅས།།